சென்னை, ஜூன் 2–
முத்தமிழறிஞர் கலைஞர் அவர்களின் 103வது பிறந்த நாள் விழாவை முன்னிட்டு, தமிழ்நாடு முழுவதும் மின்கழகத் தொமுச சார்பாக நலஉதவிகள் வழங்கப்படும் என மின்கழகத் தொமுச பொதுச்செயலாளர் பா.மணிமாறன் அறிக்கையில் குறிப்பிட்டுள்ளார்.
அவரது அறிக்கை வருமாறு:
ஓய்வறியாச் சூரியன், தமிழ்நாட்டின் நவீனசிற்பி, முத்தமிழறிஞர் கலைஞர் அவர்கள், தமிழ்நாடு மின்சார வாரியத்தில் பணிபுரியும், தொழிலாளர்கள், பொறியாளர்கள் மற்றும் அலுவலர்களுக்கு பல சலுகைகளை வழங்கி அவர்களின் வாழ்வாதாரத்தை உயர்த்தியவர்.
தமிழ்நாட்டின் பல அனல் மின் நிலையங்கள், நீர்மின் நிலையங்கள், காற்றாலை மின்நிலையங்கள், சூரிய மின் நிலையங்கள் என பல மின் நிலையங்களை துவக்கி தமிழ்நாடு மக்களுக்கு தடையில்லா மின்சாரம் வழங்கி, தமிழ்நாட்டை மின்மிகை மாநிலமாக மாற்றியவர் முத்தமிழறிஞர் கலைஞர்.
மின்வாரியத்தில் பணிபுரிந்து 74000 ஒப்பந்த தொழிலாளர்களை பணி நிரந்தரம் செய்து அவர்களின் குடும்பத்தில் ஒளிவிளக்கை ஏற்றியவர் முத்தமிழறிஞர் கலைஞர் அவர்கள்.
முத்தமிழறிஞர் கலைஞர் அவர்களின் 103வது பிறந்தநாளில் 03.06.2026ல் தமிழ்நாடு முழுவதும் உள்ள மின்கழகத் தொமுச நிர்வாகிகள் மற்றும் உறுப்பினர்கள் தங்கள் திட்டத்தில் / கோட்டத்தில் பேரவைக் கொடி ஏற்றி, கலைஞர் அவர்களின் திருவுருவப் படத்திற்கு மலர் அஞ்சலி செலுத்தி, இனிப்புகள் வழங்கி, நலிந்த தொழிலாளர்களுக்கு நல உதவிகள் வழங்குமாறு கேட்டுக்கொள்கின்றேன்.
தமிழ்நாடு மின்வாரியத் தலைமை அலுவலகத்திலுள்ள மின்கழகத் தொமுச தலைமைச் சங்க அலுவலகத்தில் 03.06.2026 அன்று காலை 10 மணியளவில் பேரவை கொடி ஏற்றி, மின்வாரிய தொழிலாளர்கள், பொறியாளர்கள் மற்றும் அலுவலர்களுக்கு இனிப்புகள் வழங்கப்படும். பின்னர் மின்வாரியத்தில் பணிபுரியும் காவல் பணியாளர்கள் / தூய்மை பணியாளர்கள் / பொதுமக்கள் என நல உதவிகள் ரூ.1500 மதிப்புள்ள தரமான அரிசி மற்றும் மளிகை பொருட்கள் 500 பேர்களுக்கு வழங்கப்படும்.
நம் அனைவரின் நெஞ்சங்களிலும், நீங்காமல் இடம் பெற்றிருக்கும் முத்தமிழறிஞர் கலைஞர் அவர்கள் 103வது பிறந்தநாளை தமிழ்நாடு முழுவதும் மின்கழகத் தொமுச சார்பாக சிறப்பாக கொண்டாடப்படுகிறது.
இவ்வாறு மின்கழகத் தொமுச பொதுச்செயலாளர் பா.மணிமாறன் அறிக்கை வெளியிட்டுள்ளார்.