சேலம், ஜூன் 2 –
தேர்தல் வாக்குறுதிப்படி விவசாயிகளுக்கு பயிர்க் கடன் தள்ளுபடியை முழுமையாக வழங்காத விஜயை கண்டித்து தமிழ்நாட்டின் பல்வேறு
பகுதிகளில் விவசாயிகள் ஆர்ப்பாட்டங்களில் ஈடுபட்டு வருகின்றனர்.
தேர்தல் அறிக்கையில் தெரிவித்தபடி விவசாயிகளுக்கு பயிர்க் கடன் தள்ளுபடி வழங்காத த.வெ.க. அரசுக்கு எதிராகப் போராட்டங்கள் வெடித்துள்ளன. இதன் ஒரு பகுதியாக தமிழக விவசாயிகள் பாதுகாப்பு சங்கம், காவிரி உபரி நீர் நடவடிக்கை குழு உள்ளிட்ட பல்வேறு விவசாயி கள் சங்கத்தின் சார்பில் சேலத்தில் ஆர்ப்பாட்டம் நடைபெற்றது.
ஆர்ப்பாட்டத்தில் 500க்கும் மேற்பட்ட விவசாயிகள் கலந்து கொண்டு விவசாயிகளுக்கு 50 சதவீத கடன் தள்ளுபடியை அறிவிப்பை உடனடியாக வெளியிட வேண்டும் என முழக்கங்களை எழுப்பினர். விவசாயத்தை விட விளையாட்டு மிகக் கஷ்டம் எனக் கூறிய ஆதவ் அர்ஜுனாவுக்கும் விவசாயிகள் கடும் கண்டனத்தை தெரிவித்தனர்.
திருப்பூர்
சென்னையில் நேற்று முன் தினம் நடைபெற்ற நிகழ்ச்சியில் பேசிய விளையாட்டுத் துறை அமைச்சர் ஆதவ் அர்ஜூனா விவசாயத்தை விட விளையாட்டு கடினமானது என பேசியிருந்தார். இதற்கு நாட்டின்மக்களுக்கு உணவளிப்பது முக்கியமா? அல்லது விளையாட்டா? என்று திருப்பூரில் விவசாயிகள் கண்டனம் தெரிவித்து ஆர்ப்பாட்டத்தில் ஈடுபட்டனர்.
நாட்டின் ஒட்டுமொத்த மக்களும் பஞ்சம், பசி, பட்டினியால் வாடக் கூடாது என்பதற்காகவே, இயற்கைச் சீற்றங்களான மழை, புயல், வெள்ளம், வாட்டி வதைக்கும் வெயில் என அத்தனையையும் தாங்கி விவசாயிகள் உழைத்து வருகின்றனர். மீள முடியாத கடன் சுமை மற்றும் அதன் காரணமாக ஏற்படும் தற்கொலைகள் போன்ற கொடூரமான வாழ்வாதாரப் போராட்டங்களையும் தினசரி எதிர்கொண்டு வருகின்றனர்.
தேர்தலின் போது பொய் வாக்குறுதிகளை அள்ளி வீசி, விவசாயிகளின் வாக்குகளைப் பெற்றுவிட்டு, பின்னர் ஏமாற்றம் என அத்தனையையும் சகித்துக் கொண்டு, உணவு உற்பத்தியை ஒருபோதும் நிறுத்தாமல் விவசாயிகள் தொடர்ந்து பாடுபட்டு வருகின்றனர்.
இத்தகைய கடுமையான சூழல்களுக்கு மத்தியில் உழைக்கும் விவசாயத்தைவிட, விளையாட்டுதான் கடினமானது என்று அமைச்சர் ஆதவ் அர்ஜூனா பேசியது வன்மையாகக் கண்டிக்கத்தக்கது. அதேநேரம் விளையாட்டு வீரர்களை மதிக்கிறோம். விவசாயிகளின் வாழ்வாதார உழைப்பை குறைத்து மதிப்பிடுவதை ஏற்க முடியாது. இவ்வாறு அவர்கள் தெரிவித்தனர்.
நாகப்பட்டினம்
தேர்தல் வாக்குறுதிப்படி கடன் தள்ளுபடி செய்யாத த.வெ.க., அரசை கண்டித்து நாகையில் விவசாயிகள் போராட்டத்தில் ஈடுபட்டனர்.
தேர்தலில் அளித்த வாக்குறுதியின்படி விவசாய கடனை தள்ளுபடி செய்ய வேண்டும், காவிரியின் குறுக்கே மேகதாதுவில் தடுப்பணை கட்ட நினைக்கும் கர்நாடக அரசின் முயற்சியை தடுத்து நிறுத்த வேண்டும் என்பன உள்ளிட்ட கோரிக்கைகளை வலியுறுத்தி தமிழ்நாடு விவசாயிகள் பாதுகாப்பு சங்கம் மற்றும் தமிழ்நாடு விவசாய சங்கங்கள் கூட்டியக்கம் சார்பில் நாகப்பட்டினம் அவுரிதிடலில் இருந்து மாவட்ட ஆட்சியர் அலுவலகம்நோக்கி பேரணியாகச் சென்று மனு கொடுக்கும் போராட்டம் நடைபெற்றது.
பேரணி மற்றும் போராட்டத்திற்கு போலீசார் அனுமதி மறுத்து மறுத்த நிலையில், அதனை மீறி மாவட்ட ஆட்சியர் அலுவலகம் நோக்கி விவசாயிகள் பேரணியாகச் சென்றனர். இதில் நாகப்பட்டினம்,திருவாரூர், காரைக்கால் மாவட்டங்களை சேர்ந்த 500க்கும் மேற்பட்ட விவசாயிகள் கலந்து கொண்டனர். த.வெ.க., அரசைக் கண்டித்து முழக்கம் எழுப்பினர். அப்போது, விவசாயிகளை போலீசார் தடுத்து நிறுத்தி கைது செய்ய முயற்சித்தனர். இதனால் வாக்குவாதம் ஏற்பட்டு தள்ளுமுள்ளு உருவானது.
நெல்லை
நெல்லை மாவட்ட விவசாயிகளும் விஜய் அரசுக்கு எதிராக ஆர்ப்பாட்டத்தில் ஈடுபட்டனர். உரம் பூச்சி மருந்து விலை உயர்வுக்கு ஏற்காடு போல் விலை பொருட்களுக்கு விலை நிர்ணயம் செய்திட வேண்டும் உள்ளிட்ட கோரிக்கைகளை ஆட்சியரை சந்தித்து மனு அளிக்க வந்த நிலையில் விவசாயிகளை வண்ணார்பேட்டை பகுதியில் காவல்துறை யினர் தடுத்து நிறுத்தினர்.
இதற்கு எதிர்ப்பு தெரிவித்து காவல்துறையினருடன் விவசாயிகள் வாக்குவாதத்தில் ஈடுபட்டதால் பரபரப்பு ஏற்பட்டது.
இதேபோல் தமிழகத்தின் பல்வேறு மாவட்டங்களிலும் விவசாயி கள் ஆர்ப்பாட்டத்தில் ஈடுபட்டனர்.
விளை பொருட்களுக்கு உடனடியாக கட்டுபடியாகக் கூடிய வகையில் விலை நிர்ணயம் செய்ய வேண்டும்; உரம், பூச்சி மருந்து விலை உயர்வை உடனடியாக தடுத்து நிறுத்த வேண்டும்; கொள்முதல் செய்யப்பட்ட விவசாயப் பொருள்களுக்கு காலதாமதமின்றி பணம் வழங்க வேண்டும்; கூட்டுறவு கடனை முழுவதுமாக தள்ளுபடி செய்ய வேண்டும் என்பன உள்ளிட்ட பல்வேறு கோரிக்கைகளை எழுப்பியும், மனுவாக ஆங்காங்குள்ள மாவட்ட ஆட்சியரிடமும் வழங்கியும் தங்களது எதிர்ப்பை விவசாயிகள் பதிவு செய்தனர்.