தோ ன்றிற் புகழோடு

தோன்றியவர் கலைஞர்தான்

பிறப்பு முதல் இறப்பு வரை

எதிர்ப்புகளைமுறியடித்துச்

சிறப்புகளைப் பெற்றிட்ட

செந்தமிழ்த் தலைவன் நீதான்!

போட்டிகளைப் பற்றியெல்லாம்

எள்ளளவும் கவலையின்றி

வேட்டி கட்டிய தமிழனாக

வெற்றிகளைக் குவித்தவர்!

அடக்குமுறைகளை எதிர்த்தே

அரசியல் பயணம் தொடங்கியதால்

அடக்கம் செய்வதற்குக் கூட

அடக்குமுறைகளை

எதிர்த்து வென்றாய்!

உலகத் தலைவர்களில்

உனக்கிருந்த எதிரிகளைப் போல்

ஒருவருக்கும் இருந்ததில்லை

நீயோ

ஒருபோதும் அஞ்சியதில்லை!

இறந்தவரிடம் பகைமறந்து

நடப்பதைத்தான் இதுவரை பார்த்துள்ளோம்

இறந்த பின்னும் பகைவரோடு

போராடி வென்றவர்

நீ ஒருவன் தான் தலைவா!

வள்ளற்பெருமான் சொல்லிய

மரணமில்லாப் பெருவாழ்வு

வாழ்பவர் நீங்கள் மட்டும்தான்

மரணத்திற்குப் பின்னும்!

அரசியல் வானில் தோன்றிய

அதிசய விண்மீன்

இலக்கிய உலகில் வந்த

இணையில்லா இமயம்!

தரமாக மற்றவரை

மதித்திட்ட தமிழ்ப்பண்பு

இலக்கியவாதிகளை

நேசித்த தாயன்பு!

தமிழ்ச்சமுதாயம்

சுவாசித்த மூச்சுக் காற்று

தமிழ்மானம் காத்திட்ட

தன்னேறில் கவிதை ஊற்று!

எதிரிகளையே கண்டு கண்டு

களை எடுத்த புதிர்

ஏழையர்க்கு வாழ்வளிக்கத்

தோன்றிய கதிர்!

திருக்குவளை தந்திட்ட

தீப்பிழம்பு

அருட்கொடையாய் தளபதி

மு.க. ஸ்டாலின் எனும்

கருணைக் கொடை வழங்கிய

முத்தமிழ் அறிஞர்

கலைஞரின்

புகழ் போற்றி வணங்குகிறேன்!