நெ
ஞ்சுக்கு நீதியுரைக்கின்ற வேந்தே!
நெடுவழியைக் கடந்திடவே கல்லும் முள்ளும்
பஞ்சாகக் கருதியுன்றன் கால்கள் தோய்ந்த
பச்சைரத்தம் பரிமாற்றம் மறந்தா போகும்?
பிணி, வறுமைச் சூழலிலும் கொள்கை கொண்டே
அஞ்சாமல் அயராமல் பணிகள் செய்தாய்!
ஆரூரான் உனைநினைத்தால் உதிரம் கொட்டும்!
திருக்குவளை கண்விழித்த தமிழர் முத்தே!
திராவிடர்தம் வாழ்வுயர்த்த பிறந்த கோவே!
தருக்கரையே அழிப்பதற்கெ ழுந்த ஞானி!
தலைவன்நம் அண்ணாவின் இனிய தம்பி!
உருக்கிய நல்லொளி வீசும் உயர்ந்த பொன்னாய்
உள்ளமெலாம் தமிழ்வளர்த்த உயிரே! வானில்
பெருக்கற்போல் முளைத்திருக்கும் வெள்ளிக் கூட்டப்
பெரும்படையின் தலைவனேநீ வையம் வாழ்க!
அண்ணாவின் கொள்கைத்தீ அழிந்தி டாமல்
எந்நாளும் வளர்த்திடவே எழுதிப் பேசிக்
கண்ணயராப் பணிசெய்தார்!கட்டிக் காத்தே
கழகத்தை வழிகண்ட கடமை வீரன்!
பண்ணாளும் புலவரெல்லாம் அமுதுப் பேச்சைப்
புகழ்கின்ற செந்தமிழ்ச் சொல் வாய்மைத் தீரன்!
மண்ணாளும் மடையர்கள் சூழ்ச்சி வீழ
மதிசெய்து முடித்திட்ட வல்ல சூரன்!
திரைக்கதையா? நாடகமா? எழுத்து, பேச்சின்
தினத்தாளா? கவிதைகளா? நெஞ்சை ஈர்க்கும்
உரையாடல் யாவையுமே தமிழ்தான் மூச்சு!
உணர்ச்சிதரும் கொள்கைகளில் அணிவ குப்பு!
திருக்குறளின் ஓவியமா? கவிதை கூறும்
சங்ககால இலக்கியமா? இதனில் யாரும்
நெருங்கிடாஎம் ஒப்பற்ற தலைவன் நீதான்!
நிமிர்ந்தநடை அரிமாவே கலைஞர் வாழ்க!
சோதனைகள் பலவந்து தாக்கும் போதும்
சிரிப்புடனே முகங்காட்டி வெற்றி கண்டாய்!
வேதனைகள் நெஞ்சத்தைப் பிளந்த பின்னும்
வேங்கையதாய்த் துடித்தெழுந்து பகையைக் கொன்றாய்!
சாதனைகள் செய்தவன்நீ!தமிழர் வாழ்வின்
சரித்திரத்தில் நின்றவன்நீ!அண்ணா தந்த
போதனைகள் ஏற்றவன்நீ!பெரியார் கண்ட
பகுத்தறிவுப் பாசறையைக் காத்தாய் வாழீ!
வயலெல்லாம் விளைச்சலாலே உயிரைக் காக்கும்
வடிவம்தான் நீஎமக்கு நாளும் தோன்றும்!
வயதெல்லாம் நீசெய்த தொண்டைக் கூறும்!
வரலாறு உன்பெயரைச் செதுக்கி வைக்கும்!
புயற்காற்று உன்முன்னர் பலமி ழக்கும்!
பூகம்பம்தன் முடிவை மாற்றிக் கொள்ளும்!
அயல்நாட்டார் குறிப்பெடுத்து நெஞ்சில் போற்றும்
அருளாளன் எம்கலைஞர் வாழ்க நீடே!
காட்டாறு கடந்துவந்த பாதை தோறும்
கழகத்தின் வரலாறு உன்னைக் கூறும்!
கோட்டான்கள் வழிமறித்து நின்ற போதும்
கொள்கைகளின் உறுதியினை உன்னைப் பேசும்!
ஏட்டாலும், பேச்சாலும் செந்நீர் சிந்தி
இனமொழியைக் காத்திட்ட தியாகம் சொல்லும்!
பாட்டாலும் உன்வேர்வை கொஞ்ச மன்று;
பணி செய்து கிடந்ததுதான் உனது தொண்டாம்!
உரிமையினை இழக்கலாமா? தமிழா, உன்றன்
உடம்பினிலே துணியின்றி வாழ லாமா?
நரிக்குணத்தார் பளபளப்பில் மயங்க லாமா?
நம்பெரியார், பேரறிஞர், கலைஞர் தீட்டி
வரைந்திட்ட கொள்கைகளை மறவ லாமா?
வண்டமிழர்க் கூட்டம்நீ வீழ லாமா?
திரியெழுதும் ஒளியைப்போல் நிமிர்ந்து வாழத்
திராவிடமே தளபதியார் தலைமை நிற்பாய்!