சோழர்களின் தலைநகரமாகவும் துறைமுகமாகவும் விளங்கிய பூம்புகார் (காவிரிப்பூம்பட்டினம்) இலக்கிய சிறப்பு வாய்ந்த நகரமாகும். ஏதென்ஸ், ரோம் போன்ற பழம்பெருமை வாய்ந்த நகரங்களுடன் இரண்டாயிரம் ஆண்டுகளுக்கு முன்பே தமிழர்கள் வாணிகத் தொடர்பு கொண்டிருந்த துறைமுக நகரமான பூம்புகார், இயற்கைப் பேரிடரால் கடலுக்குள் மூழ்கிவிட்டது. ரோம், ஏதென்ஸ் போன்ற நகரங்கள் இன்றும் சிறப்புடன் திகழும் நிலையில், தமிழர்களின் புகழ்மிக்க பூம்புகார் நகரம் இல்லையே என்ற ஏக்கத்தைப் போக்கும் வகையில் கடலுக்குள் மூழ்கிய பூம்புகாரை, கரை மீது கட்டமைத்த பெருமை கலைஞருக்கு உண்டு.

சிலப்பதிகாரம், பட்டினப்பாலை ஆகிய தமிழ் இலக்கியங்களில் காட்டப்படும் பூம்புகார் போலவே எழுநிலைமாடம், நெடுங்கல் மன்றம், இலஞ்சி மன்றம், பாவை மன்றம் ஆகியவற்றுடன் புதிய பூம்புகாரை 1973ஆம் ஆண்டு கலைஞர் தனது ஆட்சிக்காலத்தில் உருவாக்கி, தமிழரின் திறனை உலகறியச் செய்தார்.