தமிழ்நாட்டின் தலைநகரில் தமிழ் மொழி–பண்பாட்டின் அடையாளமாக வள்ளுவர் கோட்டத்தை உருவாக்கியவர் முத்தமிழறிஞர் கலைஞர். திருவாரூர் தேர் வடிவில் அமைக்கப்பட்ட வள்ளுவர் கோட்டத்தின் தேரில் திருவள்ளுவர் சிலை நிறுவப்பட்டது. திருக்குறளின் சிறப்பை விளக்கும் குறள் மண்டபம், ஒரே நேரத்தில் 2000 பேர் அமரக்கூடிய அரங்கம், திருக்குறள் ஆய்வு நிகழ்வுகள் என மிகச் சிறப்பான முறையில் வள்ளுவர் கோட்டத்தை உருவாக்கினார் முதலமைச்சர் கலைஞர். கோட்டத்தின் திறப்புவிழாவுக்காக தேதி குறிக்கப்பட்ட நிலையில், 1976 ஜனவரியில் தி.மு.க ஆட்சி ஜனநாயக விரோத முறையில் கலைக்கப்பட்டது. திறப்பு விழாவிற்கான அழைப்பிதழ் கூட கலைஞருக்கு முறைப்படி வழங்காமல் ஒன்றிய அரசு விழாவை நடத்தியது. ஒவ்வொரு கல்லாகப் பார்த்துப் பார்த்து அவர் வடிவமைத்த வள்ளுவர் கோட்டத்திற்கு முதலமைச்சராகத்தான் மீண்டும் செல்வேன் என சபதம் எடுத்தார் கலைஞர். எடுத்த சபதத்தை நிறைவேற்றும் வகையில் 1989ஆம் ஆண்டு மீண்டும் முதலமைச்சராக, வள்ளுவர் கோட்டத்தில் பதவியேற்பு விழாவை நடத்தி சபதத்தை நிறைவேற்றியவர் கலைஞர்.