மு தல் தலைமுறை பட்டதாரிக்கு கல்லூரிகளில் ஒதுக்கீடு வழங்கி, கல்விக்கட்டணத்தை அரசே ஏற்கும் என அறிவித்தவர் முத்தமிழறிஞர் கலைஞர். அதன்காரணமாக ஒவ்வொரு வீட்டிலும் பட்டதாரிகள், டாக்டர்கள், இன்ஜினியர்கள், வழக்கறிஞர்கள் உருவாகும் நிலை ஏற்பட்டது. அதற்கேற்ப, தனது ஒவ்வொரு ஆட்சிக்காலத்திலும் உயர் கல்வி வளர்ச்சிக்கேற்ப புதிய பல்கலைக்கழகங்கள், அரசு கலை–அறிவியல் கல்லூரிகள், அரசு பொறியியல் கல்லூரிகள், மருத்துவக் கல்லூரிகள், வேளாண் மற்றும் சட்டப் பல்கலைக்கழகங்களை உருவாக்கினார். கல்விதான் ஒரு சமுதாயத்தின் வளர்ச்சிக்கு அடித்தளம் என்பதே திராவிட இயக்கத்தின் சமூக நீதிக்கொள்கை. அதனை நடைமுறைப்படுத்தும் வகையில் உயர்கல்வித் துறையை வளர்த்ததுடன், பள்ளிக்கல்வியிலேயே கணினிப் பாடத்திட்டத்தை அறிமுகப்படுத்தினார். தொழிற்கல்வி படிப்புகளுக்கான பொதுநுழைவுத் தேர்வை ரத்து செய்து, +2 பொதுத்தேர்வு மதிப்பெண்கள் அடிப்படையில் ஒற்றைச் சாளர முறையில் தங்களுக்கான கல்லூரியைத் தேர்ந்தெடுக்கும் வாய்ப்பை மாணவர்களுக்கு வழங்கியது கலைஞர் அரசு.