தமிழ்நாட்டில் தொழில்வளம் சிறக்க பல நடவடிக்கைகளை எடுத்தது போலவே, வேளாண்மை செழித்தோங்குவதற்கான செம்மையான செயல்பாடுகளை மேற்கொண்ட காவிரி மண்ணின் மைந்தரான முத்தமிழறிஞர் கலைஞர், தனது ஆட்சிக்காலத்தில் 41 அணைகளைக் கட்டினார்.

விவசாயத்திற்கு மும்முனை மின்சாரத்தை இலவசமாக வழங்கிய கலைஞரின் திட்டத்தால், ஆறுகள் வறண்ட காலத்திலும் வயல்களில் பம்புசெட் மூலம் தண்ணீர் பாய்ந்தது. நிலத்தில் விளைந்தவற்றை விவசாயிகளிடமிருந்து கொள்முதல் செய்வதற்கு ஒழுங்கு முறை விற்பனைக் கூடத்தை உருவாக்கினார்.

நேரடி நெல்கொள்முதல் நிலையங்கள் மூலம் அரசே விவசாயிகளிடமிருந்து நெல் மூட்டைகளைப் பெற்றது. அதனை பொது விநியோகத் திட்டத்தின் மூலம் மக்களுக்கு சீராக வழங்கியதால், விவசாயிக்கும் உரிய விலை கிடைத்தது.

மக்களுக்கும் உரிய வகையில் உணவு தானியம் கிடைத்தது. காவிரி நதி நீர்ப் பிரச்சினையில் மாநிலங்களுக்கிடையே சுமூக தீர்வும், தமிழ்நாட்டுக்குரிய தண்ணீரைப் பங்கிடவும் காவிரி நடுவர் மன்றத்தை அமைத்திட கலைஞர் மேற்கொண்ட சட்டரீதியான முயற்சிகளே இன்றளவும் தமிழ்நாட்டின் டெல்டா மாவட்டங்களுக்கு பயன் தந்து வருகிறது.

சோழ மன்னர்கள் காலத்திற்குப் பிறகு, டெல்டா மாவட்ட ஆறுகள் பலவும் கலைஞர் ஆட்சிக்காலத்தில் தூர் வாரப்பட்டன.

தமிழ்நாட்டின் பிற மாவட்டங்களில் விளையக்கூடிய உணவுப் பயிர்கள், பயறு வகைப் பயிர்கள், வணிகப் பயிர்கள் என அனைத்து வகைப் பயிர்களின் வளர்ச்சிக்கும் ஏற்ற வகையில் ஆராய்ச்சி மையங்களை உருவாக்கி, குறைந்த பரப்பில்-குறைந்த காலத்தில் அதிக விளைச்சல் கிடைக்கச் செய்தார்.

உழவர்கள் தாங்கள் விளைவித்த காய்கறிகளை இடைத்தரகர்களின் இடைஞ்சல் இல்லாமல் நேரடியாக பொதுமக்களிடம் விற்பதற்கு வசதியாக கலைஞர் கொண்டு வந்த உழவர் சந்தை திட்டம் வேளாண்மையில் தற்சார்பு நிலைக்கான சிறந்த எடுத்துக்காட்டாகும்.