காலந்தோறும் வாகனங்களின் எண்ணிக்கை பெருகிக் கொண்டே இருக்கும். ஆட்சியில் இருப்பவர்கள் தொலைநோக்குப் பார்வையுடன் சாலை வசதிகளை மேம்படுத்த வேண்டும். முதலமைச்சர் பொறுப்பில் மிகச் சிறந்த நிர்வாகியாகத் திகழ்ந்த
முத்தமிழறிஞர் கலைஞர் அவர்கள் தலைநகர் சென்னையின்
போக்குவரத்து நெருக்கடியை எதிர்கொள்வதற்காக அண்ணா சாலையில் (பழைய மவுண்ட் ரோடு) கிரேடு செப்பரேட்டர் எனும் வகையிலான மேம்பாலத்தை அமைத்தார். ஒரு சாலையிலிருந்து இன்னொரு சாலைக்கு செல்வதற்கு வாகனங்கள் நெருக்கடியில் சிக்காமல், பாலத்தில் ஏறி அவரவர் செல்லும் திசைக்குப் பிரிந்து செல்லக்கூடிய வகையிலான இந்தப் பாலத்திற்கு அண்ணா மேம்பாலம் என்று பெயர் சூட்டினார். சென்னையின் இதயம் போன்ற பகுதியில் அமைந்த அண்ணா மேம்பாலம் 50 ஆண்டுகள் கடந்தும் போக்குவரத்து நெருக்கடியில்லாமல், வாகனங்கள் விரைந்து செல்ல வசதியாக அமைந்துள்ளது. கோவையிலும் இதே போன்ற மேம்பாலத்தை அமைத்த கலைஞர், நெல்லையில் போக்குவரத்து நெருக்கடியைக் குறைக்க ஈரடுக்கு மேம்பாலத்தை கட்டினார். காவிரி ஆற்றின் குறுக்கே குளித்தலைக்கும் முசிறிக்கும் இடையிலான ஒன்றரை கி.மீ. நீளமுள்ள பாலம் உள்பட தமிழ்நாட்டின் பெரும்பாலான பாலங்கள் அவர் ஆட்சியில் கட்டப்பட்டன. ஒன்றிய அரசில் தி.மு.க. பொறுப்பேற்றிருந்த காலத்தில் சென்னை கத்திப்பாரா மேம்பாலம், கோயம்பேடு மேம்பாலம் உள்ளிட்ட பாலங்கள் கட்டப்பட்டன. போக்குவரத்து வசதிக்கேற்ப சாலைகளையும் பாலங்களையும் சிறப்பாக அமைத்தவர் கலைஞர்.