தனது ஆட்சிக்காலங்களில் பெண்களின் உரிமை சார்ந்த திட்டங்களையும், அவர்களுக்கான சட்டங்களையும் நிறைவேற்றியவர் முத்தமிழறிஞர் கலைஞர். தந்தை பெரியாரின் சுயமரியாதை இயக்க மாநாட்டில் நிறைவேற்றப்பட்ட தீர்மானத்தின்படி, இந்தியாவுக்கே முன்னோடியாக குடும்பச் சொத்தில் பெண்களுக்கு சமஉரிமை அளிக்கும்
சட்டத்தை 1989ஆம் ஆண்டு கலைஞர் அரசு நிறைவேற்றியது. அரசுப் பணிகளில் பெண்களுக்கு 30% இடஒதுக்கீடு வழங்கினார் கலைஞர். 1996ஆம் ஆண்டு உள்ளாட்சித் தேர்தலை மாநகராட்சி முதல் ஊராட்சிகள் வரை முழுமையாக நடத்தி, அதில் பெண்களுக்கு 33% இடஒதுக்கீடு வழங்கினார். ஆரம்பப் பள்ளிகளில் பெண் ஆசிரியர்களையே
நியமித்தார்.
காலம் முழுவதும் ஆண்களையே சார்ந்து வாழும் நிலையைப் பெண்கள் தவிர்த்து, தங்கள் சுயமுயற்சியில் குடும்பத்தில் உள்ள ஆண்–பெண்–குழந்தைகள் அனைவரையும் காத்திடும் வகையில் மகளிர் சுயஉதவிக் குழுக்களை உருவாக்கினார். கருவுற்ற தாய்மார்களின் நலன் காக்க டாக்டர் முத்துலட்சுமி அம்மையார் பெயரில் மகப்பேறு உதவித் திட்டத்தை அறிமுகப்படுத்தி, பிரசவத்திற்கு முன்பு 3 மாதங்களும், பிரசவத்திற்குப் பிறகு 3 மாதங்களும் தாய்மார்களின் உடல்நலன் பேண ஊக்கத்
தொகையும், சத்தான மருந்து மாத்திரைகளும் வழங்கிடச் செய்தார்.
ஏழைக் குடும்பத்து பெண்களின் திருமணக் கனவு நிறைவேறும் வகையில், மூவலூர் இராமாமிர்தம் அம்மையார் பெயரில் திருமண
உதவித் திட்டத்தை அறிவித்து, அதனைப் பெறுவதற்கான கல்வித் தகுதியையும் நிர்ணயித்து, பெண் குழந்தைகளை பெற்றோர் படிக்க வைக்கச் செய்து, திருமணம் செய்து கொடுக்கும் நிலையை உருவாக்கினார்.
விறகு அடுப்பில் நாளெல்லாம் வெந்த ஏழைக் குடும்பத்துப் பெண்கள் அதிலிருந்து மீளும் வகையில், இலவச கேஸ் அடுப்புடன் கூடிய இலவச கேஸ் சிலிண்டர் வழங்கும் திட்டத்தைக் கொண்டு வந்தார். உலக நடப்புகளை பெண்களும் அறிந்துகொள்ளவும், வீட்டு வேலைகளை முடித்து பொழுது போக்கிடவும் இலவச வண்ணத் தொலைக்காட்சிப் பெட்டியை வழங்கியவர் கலைஞர். இதனால் பெண்களும், குழந்தைகளும் பிறர் வீட்டுக்குச் சென்று, தயங்கித் தயங்கி அங்கே டி.வி. பார்க்கும் நிலை மாறி, குடிசையிலும் சுயமரியாதையுடன் டி.வி. பார்க்கும் நிலை உருவானது.