ஒவ்வொருவருக்கும் தங்கள் குடும்பம் வாழ்வதற்கு சொந்தமாக ஒரு நிலம் வேண்டும் என்ற எண்ணம் உண்டு. ஏழைகளுக்கு அது கனவு. அவர்களின் கனவை நனவாக்கியவர் முத்தமிழறிஞர் கலைஞர். அரசு புறம்போக்கு நிலங்களில் தொடர்ந்து 5 ஆண்டுகளாக குடியிருப்போருக்கு அந்த மனையை அவர்களுக்கே சொந்தமாக்கித் தரும் வகையில் பட்டா வழங்கும் திட்டத்தை கலைஞர் அரசு செயல்படுத்தியது. பின்னர், 3 ஆண்டுகள் வசித்திருந்தாலே வீட்டு மனைப் பட்டா என்ற நிலையையும் கலைஞர் உருவாக்கினார். அவருடைய ஆட்சிக்காலத்தில் 8 லட்சத்து 30ஆயிரத்து 495 ஏழைக் குடும்பத்தினருக்கு இலவச வீட்டு மனைப்பட்டா வழங்கப்பட்டது. இதை ‘கலைஞர் பட்டா’ என்றே மக்கள் அழைத்தனர். வீட்டு மனை போலவே, விவசாய நிலங்களையும் உழுபவர்களுக்கே வழங்கிடும் வகையில், குத்தகைதாரர் பாதுகாப்பு சட்டம் மூலம் ஏறத்தாழ ஒன்றரை இலட்சம் ஏக்கர் நிலங்களை உழவர்களுக்கு சொந்தமாக்கினார் கலைஞர். இரத்தம் சிந்தி பெற வேண்டிய உரிமையை ஒரு துளி மையால் கையெழுத்திட்டு சாதித்திருக்கிறார் கலைஞர் என்று கம்யூனிஸ்ட் தலைவர் மணலி கந்தசாமி இதனைக் குறிப்பிட்டார்.