இந்தியாவில் உண்மையான கூட்டாட்சி அமைய வேண்டுமென்றால், மாநிலங்கள் சுயாட்சியுடன் இருக்க வேண்டும் என்பதுதான் அண்ணா வழியில் ஆட்சி நடத்திய முத்தமிழறிஞர் கலைஞரின் நிலைப்பாடாகும். 1969ல் முதலமைச்சர் பொறுப்பேற்றதும், ராஜமன்னார் குழுவை அமைத்து, மாநில சுயாட்சிக்கானப் பரிந்துரைகளைப் பெற்றார். 1974ல் அந்தப் பரிந்துரைகளின் அடிப்படையில் தமிழ்நாடு சட்டமன்றத்தில் மாநில சுயாட்சித் தீர்மானத்தை நிறைவேற்றினார். இத்தகைய தீர்மானத்தை நிறைவேற்றிய முதல் மாநிலம் தமிழ்நாடுதான். மாநில சுயாட்சியின் அடையாளமாக சுதந்திர தினத்தில் அந்தந்த மாநிலத் தலைமைச் செயலகத்தில் அந்தந்த மாநில முதலமைச்சரே கொடியேற்றும் உரிமையைப் பெற்றுத் தந்தவர் கலைஞர். தேசிய கீதம் போல மாநிலப் பாடலாக தமிழ்த்தாய் வாழ்த்தை அறிமுகப்படுத்தி, அரசு நிகழ்ச்சிகளில் அதை இசைக்கும்போது அனைவரும் எழுந்து நிற்கச் செய்தார். திருவள்ளுவர் ஆண்டுக் கணக்கு, தமிழுக்கு செம்மொழித் தகுதி ஆகியவையும் தமிழ்நாடு எனும் மாநிலத்தின் தனித்த அடையாளங்களாகத் திகழும்படி செய்த பெருமை கலைஞருக்கேயுரியது.