பள்ளி மாணவர்களுக்கு உணவு வழங்கும் திட்டம் 1921ஆம் ஆண்டு திராவிட இயக்கத்தின் முதல் அரசியல் அமைப்பான நீதிக்கட்சி ஆட்சியிலேயே சென்னை மாநகராட்சிப் பள்ளிகளில் செயல்படுத்தப்பட்டது. காமராஜர் ஆட்சியில் மாநிலம் தழுவிய அளவில் மதிய உணவுத் திட்டமாகவும், எம்.ஜி.ஆர். ஆட்சியில் சத்துணவுத் திட்டமாகவும் முன்னெடுக்கப்பட்ட நிலையில், 1989ஆம் ஆண்டு மூன்றாவது முறையாக முதலமைச்சர் பொறுப்பேற்ற முத்தமிழறிஞர் கலைஞர், மாணவ சமுதாயத்தின் உடல் நலனில் அக்கறை கொண்டு, முட்டையுடன் சத்துணவு வழங்கும் திட்டத்தைக் கொண்டு வந்தார். முதலில், வாரம் ஒரு முட்டை எனத் தொடங்கப்பட்ட இத்திட்டம் 2006ஆம் ஆண்டில் கலைஞர் ஆட்சியில் வாரம் 5 முட்டைகள் என்ற நிலையை எட்டியது. முட்டை சாப்பிடாத மாணவர்களுக்கு வாழைப்பழம் வழங்கப்பட்டது. இந்தியா முழுவதுமே குழந்தைகளுக்கு புரதச் சத்து குறைபாடு இருந்த காலத்தில், தமிழ்நாட்டில் கலைஞர் கொண்டு வந்த சத்துணவுடன் கூடிய முட்டை திட்டத்தினால், பள்ளி மாணவர்களுக்குப் போதுமான அளவில் புரதச் சத்து கிடைத்தது. அவர்களின் உடல்நலன் ஆரோக்கியமாகத் திகழ்ந்தது. முட்டையுடன் சத்துணவு சாப்பிட்டு பள்ளிப்படிப்பை முடித்து, பின்னர் உயர்கல்வி கற்று தற்போது உயர்ந்த பொறுப்புகளில் உள்ள பலர், தங்கள் வாழ்க்கை அனுபவத்திலிருந்தே இதனைப் பெருமையுடன் விளக்குகிறார்கள்.