திருப்பூர், ஜூன். 4–
திருப்பூர் மாநகராட்சி, ஜெய்வாபாய் பெண்கள் மாதிரி மேல்நிலைப் பள்ளியில் மாவட்ட நிர்வாகம் மற்றும் பள்ளி கல்வித்துறையும் இணைந்து நடத்திய அரசு பள்ளி மாணவர்களுக்கான கோடைகால சிறப்பு முகாமில் சிறப்பாக பங்கேற்ற மாணவர்களுக்கான பாராட்டு விழா நிகழ்ச்சி நடைபெற்றது. இதில், கால்நடைத் துறை அமைச்சர் கமலி, மாவட்ட ஆட்சித் தலைவர், சட்டமன்ற உறுப்பினர்கள் மற்றும் அரசு அதிகாரிகள், பெற்றோர்கள் கலந்து கொண்டனர்.
இந்நிகழ்ச்சியில் கோடைகால பயிற்சி முகாம்களில் சிறப்பாக செயல்பட்டு வெற்றி பெற்ற மாணவர்களுக்கு பரிசுகளையும் சான்றிதழ்களையும், அமைச்சர் வழங்கினார். மாநகராட்சிக்குட்பட்ட பகுதியில் நடத்தப் பட்ட இந்த அரசு நிகழ்ச்சியில் அதே பகுதியில் இருக்கும் மாநகராட்சி பொறுப்பு மேயர் எம்.பாலசுப்ரமணியம் மற்றும் மாநகராட்சி கல்விக்குழு தலைவர் பெ.திவாகரன் ஆகியோருக்கு எந்தவித அழைப்பும், தகவலும் தெரிவிக்கப்படவில்லை. விழாவிற்குவந்த மாநகராட்சி கல்விக்குழு தலைவர் பெ.திவாகரன் இதுகுறித்து அரசு அதிகாரிகளிடம் விளக்கம் கேட்டு உள்ளார். இதனைத்தொடர்ந்து நிகழ்ச்சியின் பாதியிலிருந்து வெளியேறினார்.
இதுகுறித்து மாநகராட்சி கல்வி குழு தலைவர் பெ.திவாகரன் பத்திரிக்கையாளர்களிடம் கூறியதாவது :-
அரசு சார்பில் நடைபெறும் இந்த நிகழ்ச்சியில் அதுவும், மாநகராட்சிக்குட்பட்ட பகுதியில் நடத்தப் ப்பட்ட இந்த நிகழ்ச்சியில் மாநகராட்சி (பொறுப்பு) மேயருக்கும், இந்த பகுதியின் மாமன்ற உறுப்பினரும், கல்விக்குழு தலைவருமான எனக்கு எந்த வித அழைப்பிதழும் தகவலும் தெரிவிக்கப்படவில்லை. எதிர்க்கட்சி என்ற காரணத்தால் வேண்டுமென்றே புறக்கணித்து உள்ளனர். அரசு அதிகாரிகள் தரப்பில் இருந்தும் எங்களுக்கு எந்த விதமான அழைப்புகளோ, தகவலோ தெரிவிக்கப்படாது ஏமாற்றத்தை அளிக்கிறது. மக்களால் தேர்ந்தெடுக்கப்பட்டு மாநகராட்சியின் மாமன்ற உறுப்பினர்களாக இருக்கும் எங்களிடம் தகவல் தெரிவிக்காமல் இதுபோன்ற தனிப்பட்ட முறையில் அரசின் நிகழ்ச்சிகளை நடத்துவது பெரும் ஏமாற்றத்தை கொடுக்கிறது என்று கூறினார்.