சென்னை, ஜூன் 7 –
மின்கட்டணம் தொடர்பாக பொதுமக்களிடம் தமிழ்நாடு மின்சார ஒழுங்குமுறை ஆணையம் கருத்து கேட்பதால், தமிழ்நாட்டில் மின்கட்டணத்தை உயர்த்த த.வெ.க. அரசு திட்டமிட்டுள்ளதாக தகவல் வெளியாகியுள்ளது.
மின்கட்டணம் தொடர்பான கருத்துகளையும், ஆலோசனைகளையும் பொதுமக்களிடம் தமிழ்நாடு மின்சார ஒழுங்கு முறை ஆணையம் கேட்டுள்ளது.
15 நாட்களுக்குள் பொதுமக்கள் கருத்துக்களை தெரிவிக்க வலியுறுத்தப்பட்டிருந்தது. கடந்த 2025 ஆம் ஆண்டில் வீட்டு நுகர்வோர்களுக்கான உயர்த்தப்பட்ட மின் கட்டணத்தை அரசே ஏற்கும் என, முந்தைய திராவிட மாடல் அரசு தெரிவித்திருந்தது. மின்கட்டண உயர்வு என்பது 6 சதவீதத்தை விட அதிகரிக்க கூடாது அல்லது ஏப்ரல் மாத நுகர்வோர் விலை குறியீட்டு எண் ஆகிய இரண்டில் எது குறைவோ அதனடிப்படையில் உயர்த்த வேண்டும் என விதியாக வகுக்கப்பட்டுள்ளது. அதன்படி, ஏப்ரல் மாதத்திற் கான நுகர்வோர் குறியீட்டு எண் 3.48 வரை கணக்கிடப் பட்டுள்ளதாக தகவல் வெளியாகியுள்ளது. இதையடுத்து, திருத்தியமைக்கப்பட்ட புதிய மின் கட்டணத்தை மின்சார ஒழுங்குமுறை ஆணையம் விரைவில் அறிவிக்க வாய்ப்புள்ளதாகவும் கூறப்படுகிறது. உயர்த்தப்படும் மின் கட்டணத்தை வீட்டு நுகர்வோர்களுக்கான கட்டணத்தை முந்தைய திமுக அரசை போன்று த.வெ.க. அரசு ஏற்குமா என்ற கேள்வியும் எழுந்துள்ளது.
சென்னையில்
பெண் காவலர் மீது தாக்குதல்!
சென்னை, ஜூன் 7 –
சென்னை மயிலாப்பூரில் உள்ள காவல் குடியிருப்பைச் சேர்ந்தவர் ரேவதி. இவர் மெரினா காவல் நிலையத்தில், தலைமை போக்குவரத்து காவலராக பணியாற்றி வருகிறார். இந்நிலையில், வீட்டுக்குத் தேவையான காய்கறிகளை வாங்குவதற்காக தனது மகளுடன் பாரிமுனைக்கு சென்றுள்ளார். அப்போது, காய்கறி கீழே விழுந்த விவகாரத்தில் காவலர் ரேவதியிடம் கடை வியாபாரி காவியா தகராறில் ஈடுபட்டு தாக்குதல் நடத்தியுள்ளார்.
மேலும் தடுக்க வந்த ரேவதியின் மகள் மீதும் அவர் தாக்குதல் நடத்தினார். தொடர்ந்து காவியாவுடன் 10க்கும் மேற்பட்டோர் சேர்ந்து பெண் காவலரை கொடூரமாக தாக்கியுள்ளனர். இதனால் அங்கு பரபரப்பு ஏற்பட்டது. காயமடைந்த பெண் காவலர், மருத்துவமனையில் சிகிச்சை பெற்று வீடு திரும்பியுள்ளார். இந்நிலையில், இந்த விவகாரத்தில் காவல்துறை நடவடிக்கை எடுக்கவில்லை என குற்றச்சாட்டு எழுந்துள்ளது.