#Title

தோல்வியைக் கண்டு துவண்டு விட மாட்டோம்! ஆட்சியை விட ஜனநாயகம்தான் முக்கியம் எனக் கருதும் இயக்கம் தி.மு.க.! அ.தி.மு.க. கட்சியினர் 1200க்கும் மேற்பட்டோர் கழகத்தில் இணைந்த நிகழ்ச்சியில் – கழகத் தலைவர் மு.க.ஸ்டாலின் உரை! தொடர்ச்சி 3–ஆம் பக்கம்

சென்னை, ஜூன் 7 –

காஞ்சிபுரம் வடக்கு மாவட்டத்தில் இருந்து அ.தி.மு.க. கட்சியினர் 1200க்கும் மேற்பட்டோர் கழகத்தில் இணைந்த நிகழ்ச்சியில் வரவேற்று உரையாற்றிய கழகத் தலைவர் மு.க.ஸ்டாலின் அவர்கள், “தோல்வியைக் கண்டு துவண்டு விட மாட்டோம்” என்றும் “ஆட்சியை விட ஜனநாயகம்தான் முக்கியம் எனக் கருதும் இயக்கம் தி.மு.க.” என்றும் குறிப்பிட்டார்.

சென்னை அண்ணா அறிவாலயத்தில் நேற்று (06.06.2026) நடைபெற்ற நிகழ்ச்சியில், செங்கல்பட்டு சட்டமன்றத் தொகுதியில் அ.தி.மு.க. வேட்பாளராகப் போட்டியிட்ட – காட்டாங்கொளத்தூர் வடக்கு ஒன்றிய அ.தி.மு.க. செயலாளர் கஜா (எ) கஜேந்திரன் அவர்கள் தலைமையில் 1200க்கும் மேற்பட்ட மாற்றுக்கட்சியினர் கழகத்தில் இணையும் விழாவில், கழகத் தலைவர் மு.க. ஸ்டாலின் அவர்கள் ஆற்றிய உரை வருமாறு: –

தாய்க் கழகமாம் திராவிட முன்னேற்றக் கழகத்தில் தங்களை இணைத்துக் கொள்வதற்காக வருகை தந்திருக்கும் உங்கள் அனைவரையும் வருக, வருக, வருக என நான் வரவேற்க விரும்புகிறேன்.

அண்ணா அறிவாலயத்திற்கு வந்திருக்கிறீர்கள்; கலைஞர் அரங்கத்தில் உட்கார்ந்திருக்கிறீர்கள். அந்த உணர்வோடு வந்திருக்கும் உங்கள் அனைவரையும்மீண்டும் மீண்டும் நான் வரவேற்கிறேன்.

75 ஆண்டு காலம் தன்னுடைய லட்சியப் பயணத்தைத் தொடர்ந்து நடத்தி, பவள விழா கொண்டாடி இருக்கும் திராவிட முன்னேற்றக் கழகத்திற்கு நீங்கள் வந்திருக்கிறீர்கள்.

மீண்டும் மீண்டும் வருக

வருக என வரவேற்கிறேன்!

அதுமட்டுமல்ல, ஒரு முறை அல்ல, ஆறு முறை தமிழ்நாட்டில் ஆட்சி நடத்தியதிராவிட முன்னேற்றக் கழகத்தில் தங்களைஇணைத்துக் கொள்ள வந்திருக்கிறீர்கள். நவீன தமிழ்நாட்டை உருவாக்கித் தந்திருக்கும் தலைவர் கலைஞர் அவர்களால் உருவாக்கப்பட்டிருக்கும் இந்த அண்ணா அறிவாலயத்திற்கு நீங்கள் எல்லாம் வந்திருக்கிறீர்கள். எனவே, வந்திருக்கும் அனைவரையும் நான் மீண்டும் மீண்டும் வருக, வருக என வரவேற்கிறேன்.

எப்போதுமே ஒரு இயக்கத்தில் இருந்து இன்னொரு இயக்கத்திற்குப் பிரிந்து போகிறார்கள் என்று சொன்னால், ஏதோ ஒரு லாபத்தை அடிப்படையாக வைத்து, ஏதோ வசதியை மனதில் கொண்டு, ஆளுங்கட்சியை நோக்கித்தான் அதிகமாகப் போவது உண்டு. அதைத்தான் நாமும் பார்த்திருக்கிறோம்.

ஆனால் இன்றைக்கு தி.மு.க. ஆளுங்கட்சி அல்ல; ஆளுங்கட்சியாக இருந்து, இப்போது எதிர்க்கட்சியாக மாறி இருக்கிறது. அதனால் எதிர்க்கட்சியை நோக்கி நீங்கள் எல்லாம் வந்திருக்கிறீர்கள் என்று சொன்னால், பதவிக்காக நீங்கள் வரவில்லை, சொகுசாக வாழ வேண்டும் என்பதற்காக நீங்கள் எல்லாம் வரவில்லை. பணியாற்ற வேண்டும், இந்த இயக்கத்திற்குத் துணை நிற்க வேண்டும், தமிழ் சமுதாயத்திற்கு நாம் பாடுபட வேண்டும், இழந்திருக்கும் ஜனநாயகத்தைப் பாதுகாக்க வேண்டும் என்ற உணர்வோடு வந்திருக்கிறீர்கள். அப்படி வந்திருக்கும் உங்களை எல்லாம் நான் மீண்டும் மீண்டும் வரவேற்கிறேன்.

கழகத் தலைவர் மு.க.ஸ்டாலின் அவர்கள் முன்னிலையில், நேற்று, சென்னை – அண்ணா அறிவாலயத்தில், அ.தி.மு.க.வைச் சேர்ந்த காட்டாங்குளத்தூர் வடக்கு ஒன்றியச் செயலாளர் எம்.கஜா (எ) கஜேந்திரன் தலைமையில் அ.தி.மு.க. கட்சியைச் சேர்ந்த 1200க்கும் மேற்பட்டோர் கழகத்தில் இணைந்தனர். அதுபோது கழகப் பொருளாளர் டி.ஆர்.பாலு எம்.பி., சட்டமன்ற எதிர்க்கட்சித் தலைவர் உதயநிதி ஸ்டாலின், கழக முதன்மைச் செயலாளர் கே.என்.நேரு, காஞ்சிபுரம் வடக்கு மாவட்டச் செயலாளர் தா.மோ.அன்பரசன், பல்லாவரம் இ.கருணாநிதி, மாமல்லபுரம் வெ.விசுவநாதன், வரலட்சுமி மதுசூதனன் ஆகியோர் உள்ளனர்.