#Title

இது மக்கள் ஆட்சியா.. இல்லை ரீல்ஸ் ஓட்டும் ஆட்சியா?” தேர்தல் வாக்குறுதிகளை மறந்த த.வெ.க. முதலமைச்சரே வசனம் பேசுவதை விடுத்து மின்வெட்டு, சட்டம் - ஒழுங்கைச் சரி செய்யுங்கள்! கோவையில் வி.செந்தில் பாலாஜி எம்.எல்.ஏ. பேட்டி!

கோவை, ஜூன் 7–

இது மக்கள் ஆட்சியா.. இல்லை ரீல்ஸ் ஓட்டும் ஆட்சியா?” தேர்தல் வாக்குறுதிகளை மறந்த த.வெ.க. வசனம் பேசுவதை விடுத்து மின்வெட்டு, சட்டம் - ஒழுங்கைச் சரி செய்யுங்கள் என்று செய்தியாளர்கள் சந்திப்பில் கழக மேற்கு மண்டலப் பொறுப்பாளர், கோவை தெற்கு சட்டமன்ற உறுப்பினர், முன்னாள் அமைச்சர் வி.செந்தில் பாலாஜி கூறினார்.

செய்தியாளர்களுக்கு அவர் அளித்த பேட்டி வருமாறு:–

கேள்வி:- முதலமைச்சர் பேசும் போது தி.மு.க. மீது தான் குற்றச்சாட்டு வச்சு தொடர்ந்து விமர்சித்து வருவது பற்றி!

பதில்: திரையில் வசனங்கள் பேசலாம். திரைத்துறையில் வசனங்கள் பேசலாம். திரைப்படங்களில் வசனங்கள் பேசலாம். ஒரு அரசு பொறுப்பேற்று முதலமைச்சராக பொறுப்பேற்ற காலத்திற்குள் என்ன அவசர தேவைகள் இருக்கிறது? என்ன அத்தியா வசிய தேவைகள் இருக்கிறது என்பதை உணர்ந்து செய்ய வேண்டியது இந்த அரசினுடைய கடமை. எங்களுடைய கழகத் தலைவர் 2021-ம் ஆண்டு ஆட்சி பொறுப்பேற்கின்ற பொழுது கொரோனா காலம் மிக மோசமான ஒரு சூழலில் இருந்த அந்த நிலையில் வெற்றி பெற்றவுடன் அரசு பொறுப்பேற்பதற்கு முன்பாகவே அரசு அதிகாரிகளை அழைத்து, அரசு எடுக்க வேண்டிய நடவடிக்கைகளை அவர்களோடு கலந்து ஆலோசித்து பல்வேறு சீரிய நடவடிக்கைகளை எடுத்ததன் மூலமாக அன்னைக்கு தமிழ்நாடு மக்கள் காப்பாற்றப்பட்டார்கள். இன்று பொறுப்பேற்றிருக்கக்கூடிய அரசு தொடர்ந்து திராவிட முன்னேற்றக் கழகத்தின் மீது குற்றச்சாட்டு களை வைப்பதில் மட்டுமே குறியாக இருக்கின்றார்களே தவிர மக்களுக்கு சொன்ன வாக்குறுதிகளை நிறைவேற்றுவதில் கவனம் செலுத்தவில்லை. அந்தந்த துறையினுடைய அமைச்சர்கள் துறையினுடைய ஆய்வுக் கூட்டங்களை நடத்தி அந்த துறையை எப்படி எடுத்துச் செல்லலாம் என்பதில் கவனம் செலுத்தவில்லை. அதற்கு மாறாக முதலமைச்சர் உட்பட திராவிட முன்னேற்றக் கழகத்தின் மீது குற்றச்சாட்டு களை சுமத்துவதில் மட்டுமே குறியாக இருந்து கொண்டிருக்கின்றார்கள். திராவிட மாடல் அரசு எங்களுடைய கழகத் தலைவர் தளபதி அவர்கள் தமிழ்நாட்டு மக்களுக்கு வழங்கிய வரலாற்று சிறப்புமிக்க திட்டங்கள் மக்கள் இன்றும் நினைவில் வைத்திருக்கின்றார்கள். இன்றும் அதை நினைவில் வைத்து எங்களுடைய கழகத் தலைவருக்கு தொடர்ந்து ஆதரவை வழங்குவதற்கு மக்கள் தயாராகத்தான் இருக்கின்றார்கள். இந்த புதிய அரசை பொறுத்தவரைக்கும் குறைகளை சொல்வதை விட்டுவிட்டு மக்களிடத்தில் செய்ய வேண்டிய திட்டங்களை முன்னெடுப்பது அவர்களுக்கு இந்த நேரத்தில் அவர்கள் செய்ய வேண்டிய அந்த பணிகளை மறந்து வசனங்களை பேசிக் கொண்டிருக்கின்றார்கள். திருச்சியில் கூட பொதுக்கூட்டங்கள் நன்றி அறிவிப்பு கூட்டம் என்று சொல்லிட்டு தி.மு.கவை குறை சொல்றதுதான் குறியா வச்சிருக்காங்க தவிர செய்ய வேண்டிய நடவடிக்கைகளை, அவங்க எடுக்க வேண்டிய முன்னெடுப்பு களை செய்யறதுக்கு அவங்க ஒன்னும் செய்யல. இதற்கு எங்களுடைய துணை பொதுச் செயலாளர் ராஜா எம்.பி., மிகத் தெளிவான ஒரு புள்ளி விவரத்தை கொடுத்திருந்தாங்க. இந்த அரசாங்கம் மீது மக்கள் நம்பிக்கையை இழந்து விட்டார்கள். அரசு தவறு செய்கின்ற பொழுது அதனை சுட்டிக்காட்டுவது எதிர்க் கட்சிகளின் கடமை அதை நாங்கள் செய்து கொண்டிருக்கிறோம் என்று தெரிவித்தார்.

கேள்வி:- கோவை மாவட்டத்திற்கு தற்போது இரண்டு அமைச்சர்கள் இருப்பது பற்றி!

பதில்:- முதலில் அவர்கள் என்ன திட்டங்களை முன்னெடுக் கிறார்கள், என்ன கொள்கைகளில் உள்ளார்கள் என்று பார்க்க வேண்டும், மாற்றம் என்று கூறி மக்களை ஏமாற்றி வெற்று கவர்ச்சியில் மக்களிடம் ஓட்டுகளை வாங்கியுள்ளார்கள் என்றும் மாற்றம் என்றால் என்னவென்று முதலில் அவர்கள் கூற வேண்டும்.

கல்வி, மருத்துவம், தொழில் துறை ஆகியவற்றில் மாற்றம் என்று அவர்கள் கூறுகிறார்கள் கல்வி மற்றும் மருத்துவத்தில் தமிழ்நாடு ஏற்கனவே முதலிடத்தில் தான் உள்ளது.

கேள்வி:- மகளிர் பாதுகாப்பு படையை அமைப்பேன் என்று முதல்வர் கூறிய நிலையில் மூன்று முறை அதை தள்ளி போட்டு உள்ளார்கள் – இது பற்றி

பதில்:- சூலூர் சம்பவம் அனைவருக்கும் தெரியும் இவ்வாறான சட்டம் ஒழுங்கு பிரச்சினைகளில் நடவடிக்கை எடுப்பதற்கு ஆறு மாத காலம் பொறுத்திருக்க வேண்டுமா?

எங்கள் கழக தலைவர் ஆட்சியில் மின்வெட்டு இல்லாத ஆட்சியாக இருந்தது, ஆனால் தற்பொழுது மின்வெட்டு காரணமாக பல்வேறு இடங்களில் மக்கள் போராட்டங்கள் நடைபெற்று வருகிறது. இவ்வாறான சூழலில் மின்சாரத்துறை அமைச்சர் உடனடியாக இதுகுறித்து அதிகாரிகளுடன் ஆய்வு கூட்டங்களை நடத்தி நடவடிக்கை எடுக்க வேண்டும். விளையாட்டுத்துறை அமைச்சர் எங்கள் கழகத் தலைவர் துவக்கி வைத்ததை ஏதோ புதிதாக துவக்கியதை போல அறிவிக்கிறார். என்றும் நாங்கள் பொறுப்பேற்கும் பொழுதே மின்சாரத் துறையில் ரூ 1.5 லட்சம் கோடி கடன் இருந்தது வருடத்திற்கு 15,000 கோடி வட்டி கட்ட வேண்டி இருந்தது என்றும் வசனங்களையும், கருத்துக்களையும் பேசுவதை விட்டுவிட்டு துறையையும், அரசையும் நல்ல முறையில் எடுத்துச் செல்ல வேண்டும், அதற்கான நடவடிக்கைகளை மேற்கொள்ள வேண்டும், மேலும் போதைப் பொருட்கள் என்னென்ன மாநிலங்கள் வழியாக வந்தது அதற்கு என்னென்ன நடவடிக்கைகள் எடுக்கப்பட்டுள்ளது என்று எங்களுடைய முதல்வர் விளக்கம் அளித்திருந்தார் ஆனால் தற்பொழுது உள்ள அரசு என்னென்னமுயற்சிகளை முன்னெடுத்துள்ளதுஎன்பதை கூற வேண்டும்.

த.வெ.க. எவ்வளவு கீழ்த்தர மாக பேச முடியுமோ அவ்வளவு கீழ்த்தரமாக பேசுகிறார்கள், தேர்தலுக்கு முன்பு டாஸ்மாக் விஷயத்தில் அவர்களது நிகழ்ச்சிகளில் மோசமாக பாட்டு பாடினார்கள் என்பது அனைவருக்கும் தெரியும் ஆனால் தற்பொழுது டாஸ்மாக் விவகாரத்தில் எவற்றை கட்டுப்படுத்தி விட்டார்கள்? என்றும் கேள்வி எழுப்பினார். தேர்தலுக்கு முன்பு வண்டி மீது ஏறி நின்று பொய்யான கருத்துக்களை கூறி அவதூறு பரப்பி பாட்டு எல்லாம் பாடினார்கள் ஆனால் டாஸ்மாக் விவகாரத்தில் தற்பொழுது வரை அந்த துறையின் அமைச்சர் விளக்கத்தை மட்டுமே கொடுத்துக் கொண்டிருக்கிறார் என்றும் அப்படி என்றால் அன்று பாடிய பாட்டுக்கு என்ன பதில் என்று கேள்வி எழுப்பினார்.

யோசிக்காமல் வாக்குறுதிகளை கொடுத்துள்ளார்கள் அதனை நிறைவேற்றுவதற்கான முயற்சிகளையாவது எடுத்திருக்க வேண்டும் என்றும் என்னை பொருத்தவரை தவெக என்பது ரீல்ஸ் ஆட்சி இன்னும் அவர்கள் ரீல்ஸ் மோகத்தில் தான் உள்ளார்கள் அமைச்சர்களும், அரசும் ரீல்ஸ் மோகத்தில் தான் உள்ளது மக்களுக்கான ரியல் ஆட்சியாக இன்னும் அவர்கள் பணிகளை துவக்க வில்லைஅவர்கள் பணியை துவக்குவார்கள்என்ற நம்பிக்கையும் மக்களிடத்தில் இல்லை என்று தெரிவித்தார்.

அண்ணாமலை புதிதாக கட்சி துவங்குவதாக தகவல்கள் வெளியாவது தொடர்பான கேள்விக்கு அது போன்ற ஒரு தகவல் எனக்குத் தெரியவில்லை அவர் அவ்வாறு ஆரம்பித்தால் அதை பற்றி பேசலாம் என்று தெரிவித்தார்.

மேலும் தொழில்துறை அமைச்சர் ரீல்ஸ் மூலம் எவ்வளவு முதலீடுகளை ஈர்க்கிறார்? எவ்வளவு ஒப்பந்தங்கள் கையெழுத்து ஆகிறது? எத்தனை பேருக்கு வேலை வாய்ப்புகள் வழங்கப்பட போகிறது? எத்தனை கோடி தமிழ்நாட்டில் முதலீடு செய்யப் போகிறார்கள் என்று பொறுத்திருந்து பார்க்கலாம், பல்வேறு அமைச்சர்கள் கூறுவதைப் போலவே ஒரு மாத காலம் காத்திருந்துபார்ப்போம் தொழிலாளர்களின் பிரச்சினைகளை எல்லாம் சரி செய்து விடுவார்களா என்று பொறுத்திருந்து பார்க்கலாம் என்று தெரிவித்தார்

இந்த நிகழ்வில், கோவை மாநகர் மாவட்ட கழக பொறுப்பாளர் துரை.செந்தமிழ் செல்வன், மாநகராட்சி மேயர் கா.ரங்கநாயகி ராமச்சந்திரன், பகுதி கழக செயலாளர் பசுபதி, பொதுக்குழு உறுப்பினர் மு.ம.ச.முருகன் உள்பட கழக நிர்வாகிகள் பலர் கலந்து கொண்டனர்.