மா
ற்றுக் கட்சியினர் அணி அணியாக தி.மு.கவில் இணையும் காட்சிகளை அன்றாடம் பார்த்துவருகிறோம். தி.மு.க. கடந்த சட்டமன்றத் தேர்தலில் ஒரு பின்னடைவை சந்தித்தபிறகும் இவர்கள் தி.மு.க.வில் வந்து இணைவதன் பொருள் என்ன? வென்றவர்களிடம் போய் சேர்ந்துகொள்வதுதான் உலக இயல்பு. ஆனால் சமீபத்தில் பெரிய தேர்தல்கள் எதுவும் இல்லாத நிலையிலும்கூட இந்த இணைப்புகள் எதைக்காட்டுகின்றன?
தமிழ்நாட்டில் உறுதியான எதிர்காலம் உள்ள ஒரே கட்சி தி.மு.க.தான் என்பதுதான் கள எதார்த்தம். தனக்கென கொள்கையுள்ள ஒரே கட்சியாகவும் மாநில நலன் சார்ந்த சமரசமற்ற போர்க்குணம் கொண்ட தலைவரைக்கொண்ட இயக்கமாகவும் தி.மு.க. மட்டுமே இருக்கிறது. இன்று காற்றில் வண்ணமயமாக இருக்கும் நீர்க்குமிழிகள் உடைவதற்கு அதிக நேரமாகாது. தி.மு.க. எந்த நேரத்திலும் பலமடங்கு வலிமையுடன் எழுந்துவரும் என்பது அரசியலில் அடிப்படை அறிந்த அனைவருக்கும் தெரியும். இந்த இணைப்புகள் மேலும் மேலும் தொடரப்போகின்றன. தற்காலிக ஆதாயங்களுக்காக தி.மு.க.விட்டு விலகிச் சென்றவர்கள் தங்கள் கட்சிகளை இழந்து கொண்டிருக்கிறார்கள் என்பதுதான் உண்மை.
முத்துவேல் கருணாநிதி ஸ்டாலின் எனும் நம்பகமான தலைவர்!
தி,மு,க.வை அரசியல் ரீதியாக எதிர்க்கும் கட்சிகளுக்குக் கூட தி.மு.க.விற்கு இழைக்கப்பட்ட துரோகம் பெரும் அதிர்ச்சியை அளித்துள்ளன. இந்திய பிரதமர் மோடி சில தினங்களுக்கு முன்பு காங்கிரஸ் தி.மு.க.விற்கு இழைத்த துரோகத்தை சுட்டிக் காட்டிப் பேசினார். நாம் தமிழர் கட்சி ஒருங்கிணைப்பாளர் சீமான் தி.மு.க. கூட்டணி மூலம் காங்கிரஸ் பெற்ற பத்து நாடாளுமன்ற இடங்களை ராஜினாமா செய்துவிட்டு தி.மு.க. கூட்டணியைவிட்டு வெளியேறட்டும் என்றார். அ.ம.மு.க. கட்சி பொதுச் செயலாளர் டி.டி.வி. தினகரன்’ தி.மு.க.வின் கூட்டணிக் கட்சிகளின் கருணையால் விஜய் ஆட்சி நடத்துகிறார். த.வெ.க. அரசிற்கு ஆதரவளிக்கும் கட்சிகள் விரைவில் வருத்தபடுவார்கள்’ என்று கூறியிருக்கிறார். தி.மு.க.வை சுற்றி நடப்பவை அனைத்தும் இன்று தமிழ்நாட்டின் அன்றாட பேசு பொருளாகியுள்ளன.
தமிழ்நாடு அரசியலில் மட்டுமல்ல, இந்திய அரசியலுமே தி.மு.க.வை மையமிட்டே சுழல்கின்றன. இந்தியா கூட்டணியிலிருந்து தி.மு.க. வெளியேறும் முடிவு பல கட்சிகளையும் அதிர்ச்சியடைச் செய்துள்ளது. பதினைந்து ஆண்டுகளாக பா.ஜ.கவிற்கு எதிராக தேசிய அளவில் சமரசமற்ற போராட்டத்தை நடத்தி இந்தியா கூட்டணியை வலிமைபெறச் செய்தவர் தி.மு.க. தலைவர். அவர் இந்தியா கூட்டணியின் தேசிய முகம். பல்வேறு மாநில- தேசிய தலைவர்களிடம் கலைஞருக்கு நிகரான மதிப்பும் நட்புணர்வும் கொண்டவர். பா.ஜ.க. எதிர்ப்பின் நம்பகமான தலைவர் என்ற நிலையினை
நீண்டகாலமாக காத்துவருபவர். மேலும் தேசிய அளவில் எந்தப் பதவியையும் கோராதவர் என்பதால் எவருக்கும் அவரோடு போட்டியில்லை. அவர் இந்தியா கூட்டணியின் மையப் புள்ளி. தி.மு.க. இந்தியா கூட்டணியிலிருந்து வெளியேறுவது அந்த கூட்டணியை எவ்வளவு தூரம் பலவீனப்படுத்தும் என்பது கூட்டணியிலிருக்கும் எல்லாக் கட்சிகளுக்கும் தெரியும். கூட்டணியின் பல தலைவர்கள் முரண்பட்டு நின்ற நேரத்தில்கூட அதைப் பாதுகாத்தவர் முத்துவேல்
கருணாநிதி ஸ்டாலின்.
ஆனால் இந்த அஸ்திவாரத்தையே அசைக்கும் வேலையை தமிழ்நாட்டில் தி.மு,கவிற்கு எதிராக மட்டுமல்ல பல மாநிலங்களில் தங்களது பல நண்பர்களுக்கு எதிராக காங்கிரஸ் செய்திருக்கிறது. காங்கிரஸிற்கு என்று தேசிய அளவில் கூட்டணிக் கொள்கைகளோ ஒன்றுபட்ட தேசிய நலன்களோ கிடையாது. அந்தந்தந்த தேர்தல்களில் அந்தந்த மாநிலத்தில் உள்ளூர் காங்கிரஸ் தலைவர்களின் அரசியல் ஆதாயங்களுக்காக
தங்கள் தேசியக் கூட்டணி நண்பர்களுக்கு எதிராக குழி தோண்டுவது. பிறகு அதே கட்சிகளை நோக்கி ‘’வாருங்கள்…பா.ஜ.க.வை எதிர்த்து காங்கிரஸை ஆட்சியில் அமர்த்துவோம் ‘’என்று அழைப்பது. இப்படி ஒரு குரூரமான அரசியலை காங்கிரஸ் தொடர்ந்து நடத்துவதால்தான் இந்தியா கூட்டணி தொடர்ந்து பலவீனமடைந்து வந்திருக்கிறது. காங்கிரசின் இந்த இரட்டைக்குதிரை சவாரிக்குத்தான் தி.மு.க. இப்போது முடிவு கட்டியிருக்கிறது.
பீகார் மற்றும் பல மாநிலங்களில் மாநிலக் கட்சிகளை நிர்பந்தித்து கூடுதல் இடங்களைப் பெற்று அவற்றில் பெருமளவு தோற்று அக்கட்சிகளையும் பலவீனப்படுத்துவது, தாங்க எதிர்த்தவர்களிடமே குதிரை பேரங்களில் ஈடுபட்டு கட்சிதாவல் நடவடிக்கைகளில் ஈடுபடுவது போன்றவையெல்லாம் காங்கிரஸின் வழக்கமான செயல்முறைகளாகியுள்ளன.
அரவிந்த் கெஜ்ரிவாலுக்கு எதிராக காங்கிரஸ் நடத்திய தாக்குதல், மேற்கு வங்கத்தில் திரிணமூல் காங்கிரஸை‘ பயங்கரவாத இயக்கம்’ என்றும் ராகுல் காந்தி வர்ணித்தது எல்லாம் அந்தக் கூட்டணியியின் வலிமையான சக்திகளை சிதறடித்துவிட்டன. கேரளத்தில் சி.பி.எம்., பா.ஜ.க.வுடன் கூட்டணியிலிருக்கிறது என்று ராகுல் காந்தி பேசியது அங்கு பெரும் கொந்தளிப்பை ஏற்படுத்தியது. காங்கிரஸ் கட்சியிடம் இதற்காக சி.பி.எம். விளக்கம் கேட்டிருக்கிறது.
இந்தியாவில் ஒரு வலிமையான மாற்று அணியை யாரால் கட்ட முடியும் என்றால் அது தேசிய பொதுநலனில் அக்கறைகொண்ட நம்பகத்தன்மை கொண்ட தி.மு.க. தலைவரால் மட்டுமே முடியும். இந்தியா கூட்டணியில் தி.மு.க. தொடரவேண்டும் என்று சில காங்கிரஸ் தலைவர்கள் கோருவது இதனால்தான். ‘தமிழ்நாடு காங்கிரஸ்தான் த.வெ.க. கூட்டணியிலிருக்கிறது, இந்திய தேசிய காங்கிரஸ் அல்ல’ என்றெல்லாம் அவர்கள் பேசுவது ம்இதனால்தான். தங்களுக்கு எது ஆதாயமோ அது மட்டுமே எங்கள் அன்றைய தின அரசியல் நிலைப்பாடு என்ற கொள்கை கொண்டவர்களை காலம் கடுமையாகத் தண்டிக்கும்.
தி.மு.க கடந்த நாற்பதாண்டுகளுக்கும் மேலாக தேசிய அரசியலில் ஒரு நிர்ணய சக்தியாகத் திகழ்ந்து வந்திருக்கிறது. பல பிரதமர்களையும் குடியரசுத்தலைவர் களையும் உருவாக்கிய கட்சி. இந்தியாவில் அரசியல் குழப்பங்கள் நிலவிய காலங்களில் நிலையான அரசுகள் உருவாக உறுதுணையாக இருந்த கட்சி. தி.மு.க. அளவு ஒன்றிய அரசுகளில் நீண்டகாலம் பங்கேற்ற மாநிலக் கட்சிகள் வேறு எதுவும் இல்லை. மாநிலத்திலும் தி.மு.க.வைபோல நீண்ட கால கூட்டணியை வேறு எந்த மாநிலக் கட்சியும் நிலை நிறுத்திய தில்லை. ஒரு கூட்டணி
ஆட்சியை ஒன்றியத்தில் எப்படி உறுதியாக நடத்தவேண்டும் என்று தி.மு.க.விற்குத் தெரியும். தேசிய அளவிலும் மாநில அளவிலும் முரண்பட்ட கட்சிகளை ஒரு குடைக்குள் கொண்டுவந்து எப்படி ஒரு வலிமையான கூட்டணியை அமைக்க வேண்டும் என்பதும் தி.மு.க.விற்குத் தெரியும்.
த.வெ.க.வின் புதிய நண்பர்களின் சங்கடங்கள்!
இன்று த.வெ.க.வோடு இணைந்து நிற்கும் கட்சிகள் நெருக்கடிகளை சந்திக்கத் தொடங்கியுள்ளன. த.வெ.க. அரசின் செயல்பாடுகளும் பல பிரச்சினைகளில் அவர்களது நிலைப்பாடுகளும் அவர்களை சங்கடத்தில் நெளிய வைக்கின்றன. குர்பானி மாறு அறுப்பதற்குத் தடை, திருப்பரங்குன்றம் ஆவணப்படத்திற்குத் தடை, மின் வெட்டு, அமைச்சர்களின் அராஜகங்களும் கேலிக்கூத்துகளும் என பலவற்றிற்கும் அவர்கள் பதில் சொல்ல நிர்பந்திக்கப்படுகிறார்கள். ஒரு இடதுசாரித் தலைவர்’ தி.மு.க. கூட்டணி என்ற ஒன்றே இப்போது இல்லை’ என்கிறார். இன்னொரு தலைவர்
‘நாங்கள் தி.மு.க. கூட்டணி யில் நீடிக்கிறோம்’ என்கிறார். மற்றவர்கள் கூச்சத்திலும் சங்கடத்திலும் சமாளிக்க முடியாத வற்றை எல்லாம் சமாளித்துக்கொண்டு திணறிக் கொண்டிருக்கிறார்கள். இவர்களுக்கு இன்னும் இங்கே எவ்வளவுநாள் தாக்குப் பிடிக்க முடியும் என்ற சந்தேகம் வந்துவிட்டது. கூட்ட்ணியை விட்டு வெளியேறினால் அவர்கள் அ.தி.மு.க.விடம் செல்ல முடியாதபடி ஏற்கனவே த.வெ.க., அ.தி.மு.க.வை விழுங்கி வருகிறது. பா.ஜ.க. விழுங்கியதன் மிச்சம் அது. இந்நிலையில் தமிழ்நாட்டின் நிலையான வளர்ச்சிக்கான மக்கள் நல அரசை தி.மு.க.வே கொடுக்க முடியும் என்பதை மக்கள் உணரத் தொடங்கிவிட்டார்கள். விரைவில் கூட்டணியை விட்டுச் சென்ற பறவகள் கூடு திரும்வேண்டிய காலம் வரும்.
தி.மு.க.விற்கு எதிரான
தொடர் பொய்கள்!
சமூக வலைத்தளங்களிலும் ஊடகங்களிலும் தி.மு.க. தேர்தலுக்குப்பின்னும் ஒரு பேசுபொருளாக இருப்பதன் காரணம், தி.மு.க.வை ஒரு பலவீனமான சக்தியாக காட்டுவதற்காக பொய்ச் செய்திகளும் புரட்டுகளும் தொடர்ந்து பரப்பபடு வதன் காரணம் தி.மு.க. என்ற நெருப்பு கனன்றுகொண்டிருக்கிறது, அது எந்த நேரமும் காட்டுத்தீயாக மாறும் என்பதுதான். அதை எப்படியாவது நீரூற்றி அணைத்துவிடலாம் என கனவு காண்கிறார்கள். தி.மு.க.வின் தோல்வி தொடர்ந்து போஸ்மார்ட்டம் செய்யப்படுவதும் தி.மு.க.வின் அணிகள், சில தலைவர்கள் தொடர்ந்து தாக்கப்படுவதும், விஜய் அடுத்த பதினைந்து வருடங்களுக்கு ஆட்சியில்
இருப்பார், தி.மு.க. மீளவே முடியாது என கதை அளப்பதும் தி.மு.க.வைப்பற்றிய பதற்றத்தினாலும் பயத்தினாலும்தான். தி.மு.க. மீதான எதிர்மறை பொய்ப்பிம்பங்களைக் கட்டுவதன் மூலமாக அதை அழித்துவிடலாம் என்ற அவர்களது நம்பிக்கையை தி.மு.க. தலைவரும், சட்டமன்ற எதிர்க்கட்சித் தலைவரும் தி.மு.க. பின்னால் திரளும் இளைஞர்களும் சிதறடித்து வருகிறார்கள்.
தி.மு.க. ஆட்சியில் இருந்தாலும் சரி இல்லா
விட்டாலும் சரி, தலைப்புச் செய்திகளை தி.மு.க.தான்
தீர்மானிக்கும். அன்று அரசியலில் எது பேசப்படும்
என்பதை கலைஞர் தீர்மானித்தார். இன்று முத்துவேல்
கருணாநிதி ஸ்டாலின் தீர்மானிக்கிறார்.