“எ
ந்தக் கட்சிக்கும் தங்களது அரசியல் முடிவைத் தீர்மானிக்கும் உரிமை உண்டு. யார் மனத்தையும் புண்படுத்தும் சொற்களைப் பேச வேண்டாம்” என்று தொடக்கத்திலேயே தொண்டர்களுக்குத் தி.மு.க. தலைவர் மு.க. ஸ்டாலின் கூறியிருந்தார். சென்னை அறிவாலயத்தில் மாற்றுக் கட்சியினர் கழகத்தில் இணையும் விழாவில் பேசிய ஸ்டாலின், “திமுக ஆட்சிக்கு வர வேண்டும் என்பதற்காக, நம்மோடு கூட்டணி அமைத்த கட்சிகளின் தயவில் தான் தமிழ்நாட்டில் ஒரு ஆட்சி நடந்து கொண்டிருக்கிறது. நாங்கள் செல்கிறோம் என்று சொன்ன போது, அது உங்கள் விருப்பம்; அது உங்களுக்கு இருக்கும் ஜனநாயகம்; அதை நான் தடுக்க மாட்டேன்” என்று அந் நிகழ்ச்சியில் பேசும்போது குறிப்பிட்டுள்ளார்.
2026 நடைபெற்ற சட்டமன்றத்தேர்தலில் திமுக கூட்டணியில் பங்கேற்று, ஒரு ராஜ்யசபா இடமும் 28 சட்டமன்ற தொகுதி இடங்களை பெற்றது காங்கிரஸ். ஐந்து இடங்களில் மட்டும் வெற்றி பெற்ற காங்கிரஸ் கட்சியானது; இதற்காக தமிழ்நாடு முழுவதும் பிரச்சாரம் செய்தார் மு.க.ஸ்டாலின் ஆனால், காங்கிரஸ் கட்சித் தலைவர் இராகுல் காந்தி; தேர்தல் பரப்புரையின் போது, திமுக தலைவர் தளபதி ஸ்டாலினுடன் பங்கேற்றுப் பிரச்சாரம் செய்ய முன் வரவில்லை. தேர்தல் முடிந்த பின்னரும் திமுக தலைமைக்கு நன்றி கூடக் கூற வரவில்லை. அந்தக் காங்கிரஸ் கட்சியானது நான்கு கால் பாய்ச்சலில் த.வெ.க. கூட்டணி அரசில் பங்கேற்று அமைச்சர்கள் பதவி பெற்று பூவோடும் பொட்டோடும் மங்கல வாழ்க்கை நடத்திக் கொண்டு இருக்கிறது. த.வெ.க. அமைச்சரவையில் சேர்ந்த காங்கிரஸ் கட்சி திமுகவின் முதுகில் குத்தி துரோகம் செய்துவிட்டு இப்பொழுது ‘இண்டியா’ கூட்டணி அழைப்பு விடுத்திருப்பதை திமுக அதில் பங்கேற்காமல் புறக்கணித்துள்ளது.
உலக வரலாற்றில் நடைபெற்ற அரசியல் துரோகம் என்பது ஜூலியஸ் சீசர் படுகொலை செய்தது தான். சீசரின் அதீத அதிகார வளர்ச்சி கண்டு பயந்த ரோமானிய நாடாளுமன்ற உறுப்பினர்கள் (செனட்) சிலர் சூழ்ந்து நின்று சீசரைக் கத்திப் பாய்ச்சல் நடத்திய போது, எதிர்பாராத வகையில் சீசரின் நண்பன் மார்க்கஸ் ஜூனியர் புருட்டஸ்சும் திடீரெனக் கத்தியால் அடி வயிற்றில் குத்தினான். “நீயுமா புருட்டஸ் (ET tu Brute? (you too, Brutes?...) என்றவாறு துரோகிகளிடம் 23 கத்திக் குத்துகளை வாங்கிய சீசர் மரணத்தின் மடியில் சரிந்து விழுந்தான். இது கி.மு.44 இல் மார்ச் 15 இல் சீசரைக் கொன்ற வரலாறு. ஆனால், காங்கிரஸோ பதவிவெறி பிடித்த காங்கிரஸோ கூட்டணித் தர்மத்தை மீறித், தனது துரோகச் செயல்பாடுகளால் நன்றி மறந்து அரசியல் படுகொலைகள் நடத்திக் கொண்டிருக்கின்றது.
காங்கிரஸ் கட்சி இப்பொழுது மட்டுமல்ல; 1952இல் சுதந்திர இந்தியாவில் சென்னை மாகாணச் சட்டமன்றத்திற்கு நடந்த முதல் தேர்தலில், தி.மு.க. போட்டியிடவில்லை. எனினும், திமுகவின் ஆதரவு பெற்று அதன் “திராவிட நாடு திராவிடருக்கே” கொள்கை, மாநில உரிமைக் கொள்கை, பொருளாதாரக் கொள்கையை ஏற்று விழுப்புரம் எஸ்.எஸ். இராமசாமி படையாட்சியின் உழைப்பாளர் கட்சி (Tamil Nadu Toilors Party TTP) யும், மாணிக்கவேலு நாயக்கரின் தலைமையில் உள்ள பொதுவுடமைக் கட்சி எனும் காமன் வீல் (Common Weal Party) கட்சியும் அண்ணா தலைமையிலான தி.மு.க.வின் உறுதிமொழிப் பத்திரத்தில் (Affidavit) கையெழுத்துபோட்டுவிட்டு நின்றனர்.
அவர்களில் 8 பேர் பாராளுமன்ற உறுப்பினர்களும், 42 பேர் சட்டமன்றத்திற்கும் வெற்றி பெற்றுத் தேர்ந்தெடுக்க பட்டிருந்தனர். மொத்தம் 376 சட்டமன்ற உறுப்பினர்களில் 152 பேர் மட்டுமே காங்கிரஸ் இருந்ததால், போதிய பெரும்பான்மையின்றி ஆட்சி அமைக்க இயலவில்லை. உடனே, காமராஜர் களத்தில் இறங்கியதால், கழகத்தின் ஆதரவோடு வெற்றி பெற்றவர்கள் பலர் ஒப்பந்தத்தை மறந்து ஆயாராம், காயாராம் போன்று கட்சி மாறிகளாகப் பயன்பெற்று அமைச்சர்களாக்கப்பட்டனர். இரு கட்சிகளையும் சுயேச்சைகளையும் விலைபேசி இராஜாஜி தலைமையில் காங்கிரஸ் ஆட்சி அமைத்த வரலாறு இன்றும் காங்கிரஸ் செய்த தேர்தல் துரோகம் பற்றிப் பேசும். கட்சி மாறிப் பதவி பெற்றவர்களுக்கு எதிராக அண்ணாவின் ஆலோசனை பேரில் வாலாஜாபாத்தில் திமுக கருப்புக்கொடி காட்டியது.
தி.மு.க. கூட்டணியில் இருந்து வெற்றி பெற்று ஆளுங்கட்சி அமைச்சரவையில் பங்குப்பெற்ற கட்சியின் சில தலைவர்கள், திமுக பற்றி விமர்சனங்கள் செய்து வருகிறார்கள்.
மக்கள் வரிப்பணத்தில் இயங்கி வரும் அரசின் தலைமைச் செயலகமானது, த.வெ.க.வின் தலைமை அலுவலகமாக மாறி விட்டது. பிற அரசியல் கட்சியினரைக் சேர்ப்பதும், காங்கிரஸ் கட்சி மூத்த தலைவர் ப. சிதம்பரமே சென்று அரசியல் பேசி மாநிலங்களவை எம்.பி. சீட் வாங்குவதுமான கரை வேட்டிகள் நடமாடும் அரசியல் கட்சிகள் தற்போது கோட்டையில் கொடிகட்டிப் பறக்கின்றன.
ஊழல் தவறே செய்யாத நபர் என்றும் உத்தமபுத்திரர்கள் என்றும் பாராட்டு தெரிவித்து நடிகர் விஜய் ஆட்சிக்கு ஆதரவும் அமைச்சரவையில் பங்கு பெற்றும் பேசி வருகிறார்கள் சிலர். அது உண்மையா? சென்னை உயர் நீதிமன்றமே உறுதிப்படுத்துகிற அளவுக்கு, தான் நடித்த திரைப்படத்தில் வாங்கிய ரூபாய் 15 கோடி வருமானத்தைக் கணக்கு காட்டாமல் மறைத்த ஊழல் “புலி” அல்லவா அந்த நடிகர்? சட்டமன்றத் தேர்தலில் தனது அசையும் சொத்து விவரம் கொடுத்த போது, பெரம்பூர் வேட்பு மனுவில் ரூபாய் 115.13 கோடி என்றும், திருச்சி கிழக்கு தொகுதியில் ரூபாய் 220.15 கோடி என்றும், சுமார் 105 கோடிக்கு மேல் ஏமாற்றிக் கணக்கு காட்டிய இந்த உத்தம நபர் மீது உயர்நீதிமன்றத்தில் இன்று வழக்கு நடைபெற்றுக் கொண்டிருக்கிறது. வருமானவரித் துறைக்கும் தேர்தல் ஆணையத்துக்கும் நோட்டீஸ் அனுப்பப்பட்டுள்ளது. இவர் தான் ஊழலை ஒழிக்கப் போகிறாராம்? இப்படிபட்ட நபரை நம்பி, அரசில் அமைச்சர்களாகப் பங்கேற்றும் அரிச்சந்திர மகாராஜா இவர் தான் என்று சில கட்சிகள் த.வெ.க. அரசுக்கு ஆதரவு கொடுக்கின்றனவா?
கழகக் கூட்டணியில் இருந்தபோது தேர்தல் பரப்புரையில் வி.சி.க. கட்சித் தலைவர் நண்பர் திருமாவளவன் என்ன பேசினார்?... இன்றும் அவருடைய பேச்சுகள் வீடியோ காணொளிப் பேழையில் பதிவாகிச் சாட்சியங்களாக இருக்கின்றன. “யாரிடம் வாலாட்டுகிறாய்? பதவியைப் பார்த்துப் பல்லை இளிக்கிறவன் இல்லை இந்தத் திருமாவளவன்... பதவி இந்தத் தலையில் இருக்கும் முடிக்குச் சமமாகக் கருதுகிறவன்”
அதுமட்டுமா பேசினார். “தம்பி சீமானும், தம்பி விஜய்யும் ஆர்.எஸ்.எஸ். பெற்று எடுத்த பிள்ளைகள்; அவர்கள் பா.ஜ.க.வின் பிள்ளைகள் என்பது அம்பலமாகி இருக்கிறது! தி.க. காரர்கள், தி.மு.க.காரர்கள் பேசாமல் வாய் மூடி மௌனித்திருக்கலாம்... ஆனால், திருமாவளவனால் அப்படி இருக்க முடியாது!..... நீங்கள் தமிழுக்காகவும், தமிழ்நாட்டு மக்களுக்காகவும், தமிழ் மண்ணுக்காகவும் போராடக் கட்சி தொடங்கவில்லை; தி.மு.க.வை வீழ்த்துவதற்கு ஆர்.எஸ்.எஸ்.க்காகக் கட்சி தொடங்கி இருக்கிறீர்கள். பெரியார், அம்பேத்கர் பேசிய அரசியலையும் சேர்த்து வீழ்த்துவதற்கு நீங்கள் போராடிக் கொண்டிருக்கிறீர்கள்!.... “விசில்” அடிப்பவர்களைத் தியேட்டருக்கு அனுப்புங்கள்; சட்டசபைக்கு வேண்டாம்!.. சட்டசபையில் விசில் அடிக்க முடியாது. தியேட்டருக்கு வேண்டுமானால் அனுப்புங்கள்!..” என்று சிம்மக் குரல் எழுப்பி ஓங்கிப் பேசியவர் தான் நம் நண்பர் திருமாவளவன்.
அதுமட்டுமல்ல; சென்னை ஒய்.எம்.சி.ஏ. திடலில் நடைபெற்ற தி.மு.க. பவள விழாவில் (17-09-2024) கலந்துகொண்ட திருமாவள வன் பேசும்போது “தி.மு.க.,தி.க.; எனும் இரட்டைக் குழலுடன் மூன்றாவது குழலாக வி.சி.க. இருக்கும்...” எனச் சத்தியம் செய்து நெஞ்சை நிமிர்த்திக் கட்டபொம்பனாக மாறி அரசியல் பேசிய திருமாவளவனது மூன்றாவது துப்பாக்கிக் குழல் என்ன ஆனது? பொம்மைத் “துப்பாக்கி”ப் பட கதாநாயகனின் ஆட்சியில் அவரது கட்சியும் அவரும் பங்கேற்று இருக்கின்றனர். மதவெறி பிடித்த சக்திகளை வீழ்த்துவதற்குத் தி.மு.க. அணியில் பங்கேற்று இருந்தவர்களின் கொள்கையானது; இன்று ஒரே ஒரு அமைச்சர் பதவிக்காகத் தனது மூன்றாவது குழாய் துருப்பிடித்து உடைந்து போய்விட்டது போலும்!
தி.மு.க. கூட்டணியில் எட்டு இடங்களைப் பெற்ற வி.சி.க. இரண்டு இடங்களில் வெற்றி பெற்றது. தேர்தல் பிரச்சாரத்தில் நாடு முழுவதும் சென்று திரும்பிய நிலையில்; களைப்புற்று இளைப்பாறாமல் திண்டிவனம் தொகுதியில் நின்ற வன்னி அரசை ஆதரித்து வெற்றி பெற வைப்பதற்காக தி.மு.க. இளைஞரணிச் செயலாளர் உதயநிதி ஸ்டாலின் பிரச்சாரத்தில் கலந்து கொண்டார். அவர் பேசிய போது,” எனது சேப்பாக்கம் தொகுதிக்குக் கூட நான் பிரச்சாரத்திற்கு முழுமையாகச் செல்ல முடியவில்லை. ஆனால், நம் அண்ணன் வன்னி அரசு வெற்றி பெற வேண்டும் என்பதற்காக உங்களிடத்தில் வாக்கு கேட்கிறேன். வெற்றி பெற வைப்பீர்களா?.... உறுதியாக வெற்றி பெறச் செய்யுங்கள்!” என்று வாக்காளர்ப் பெருமக்களிடத்தில் மூச்சு இறைக்க, இறைக்க பேசினார். அதில் வெற்றி பெற்ற வன்னி அரசு,’’ தூய சக்தி ஆட்சி?” யில் இன்று அமைச்சராக்கப்பட்டு மஞ்சள் குங்குமம் கொள்கை உறுதியோடு அமைச்சரவையில் இருந்து செயல்பட்டு வருகிறார்.
2001 இல் அ.தி.மு.க. கூட்டணியில் நின்று மங்களூர் சட்டமன்றத் தொகுதியில் நின்று வெற்றி பெற்ற திருமாவளவன் பின்பு திமுக கூட்டணிக்கு மாறினார். 2004 இல் பிப்ரவரியில் மங்களூர் சட்டமன்ற உறுப்பினர் பதவியை ராஜினாமா செய்தார். அதற்குக் காரணம், சிதம்பரம் மக்களவைத் தொகுதியில் நிற்க, தனக்கு வாய்ப்பு வழங்கவில்லை என்றும், ஈழத் தமிழர் விவகாரத்தில் அதிருப்தி ஏற்பட்டதாகவும் கூறிக் கூட்டணித் தர்மம் கருதி ராஜினாமா செய்வதாகக் கூறினார். அப்படியெல்லாம் சுயமரியாதை கொண்டு கூட்டணித் தருமம் காத்து வந்த திருமா அவர்கள்... இன்று கூட்டணித் தர்மத்தை விட்டுக் கொள்கையைக் குழி தோண்டிப் புதைத்து விட்டுத் தேர்தல் ஈரம் காய்வதற்குள் த.வெ.க அமைச்சரவையில் சேர்ந்தது எப்படி? என்று சொல்ல வேண்டும்...
கூட்டணித் தலைவர் மு.க. ஸ்டாலினைச் சந்தித்த இந்திய யூனியன் முஸ்லிம் கட்சித் தலைவர் கே.எம்.காதர் மொய்தீன் அறிவாலயத்தில் செய்தியாளர்களுக்குப் பேட்டி அளித்த போது, “தி.மு.க. கூட்டணியில் நீடிப்போம்; மு.க. ஸ்டாலின் எடுக்கும் முடிவே எங்கள் முடிவு. த.வெ.க. அரசுக்கு ஆதரவோ, அல்லது அரசில் பங்கேற்கவோ மாட்டோம்” என்று உறுதித்தொனியில் பேசினார். ஆனால், முந்தைய நிலைப்பாட்டை மாற்றித் தனது கட்சியின் பாபநாசம் சட்டமன்ற உறுப்பினர் ஏ.எம். ஷாஜகானைச் சிறுபான்மைத் துறை அமைச்சராகப் பங்கேற்க வைத்தார். இது பற்றிக் கடுமையான விமர்சனங்கள் எழுந்துள்ளன.
“இது அரசியல் சந்தர்ப்பவாதம். தி.மு.க.வில் அனைத்தும் அனுபவித்து விட்டுத் தற்போது அதிகாரத்தில் பங்கு வேண்டும் என்று த.வெ.க.பக்கம் தாவி விட்டார்; முதல்வர் விஜய்யை அளவுக்கு அதிகமாகப் புகழ்கிறார்; தனது சுயநலத்தோடு பாராட்டி விஜய்யின் இரசிகர் மன்றத் தலைவர் போல் செயல்படுகிறார்; கொள்கை உறுதியில்லாமல் வாக்களித்த மக்களுக்குத் துரோகமிழைத்துள்ளார்” என்று கடுமையான விமர்சனங்கள் தமிழ்நாட்டில் சிறுபான்மை மக்கள் மற்றும் இஸ்லாமிய அமைப்புகள் மத்தியில் எழுந்துள்ளன .
“என் வலது கையில் சூரியனை யும், இடது கையில் சந்திரனையும் வைத்தாலும், நான் ஏகத்துவ பிரச்சாரத்தை இஸ்லாம் பணியை கை விட மாட்டேன்” என்று கொள்கையில் உறுதியாக நின்றவர் நபிகள் நாயகம் (ஸல்) அவர்கள். அவர் வழியில் வந்தவர்கள் நேற்று ஒரு வாசகம்; இன்று ஒரு வாசகம் சொல்லி அரசியலில் அறம் பிறழ்ந்து செல்வது எப்படி நியாயமாகும்?
1972 ஏப்ரல் மாதம் கண்ணியமிகு காயிதே மில்லத் முகமது இஸ்மாயில் சாகிப் அவர்கள் உடல் நலங் குன்றி ஸ்டான்லி மருத்துவமனையில் அனுமதிக்கப்பட்டிருந்த போது, முதல்வராக இருந்த கலைஞர், வெளியூர் நிகழ்ச்சிகளை ரத்து செய்து விட்டு வந்து சந்தித்தார். “நான் கருணாநிதி வந்திருக்கிறேன்” என்று சொன்னார். இறுதி மூச்சு நெருங்கிய நேரத்திலும், “கலைஞர் அவர்களே நீங்கள் தான் இனி இந்த இஸ்லாமியச் சமுதாயத்தின் காவலர். இவர்களை எக்காரணத்தைக் கொண்டும் கைவிட்டு விடாதீர்கள்” என்று உருக்கமாக கேட்டுக்கொண்டார். இது பற்றி நெஞ்சுக்கு நீதி நூலில் கலைஞர் எழுதிப் பதிவு செய்துள்ளார். ஏ.கே. ரிபாயி (A.K. Rifaie) என்பவரும் இச் செய்தியைத் தனது “கவ்மின் காவலர்” என்ற நூலிலும் சுட்டிக் காட்டியுள்ளார். திராவிட முன்னேற்றக் கழகம் இசுலாமியர்கள் உள்ளிட்ட சிறுபான்மை மக்களுக்காகத் தன்னை அர்ப்பணித்துக் கொண்ட சமூக நீதி இயக்கம் என்பதை யாரும் மறந்து விட முடியாது. மறுத்தும் ஒதுக்கி விட முடியாது.
சிறுபான்மை மக்கள் குறித்து தி.மு.க. தலைவராக இருந்த கலைஞரிடம் செய்தியாளர்கள் கேட்டபோது, “அவர்கள் பாதுகாக்கப்பட வேண்டியவர்கள் (Protectable Society)” என்றார். உடனே நிருபர்கள், அப்படியானால் பெரும்பான்மை மக்கள் பற்றி என்ன சொல்கிறீர்கள்? என்று கேட்டபோது, “அவர்கள் மதிக்கப்பட வேண்டியவர்கள் (Respectable Society)” என்றார்.
காயிதே மில்லத் பிறந்தநாளின் போது, அவரது கல்லறையில் மலர்ப் போர்வை போர்த்தி விட்டுத் திரும்பிய நேரத்தில், நிருபர்கள் எழுப்பிய சிறுபான்மை மக்கள் பற்றிய கேள்வி ஒன்றுக்கு, பதிலளித்த கலைஞர், “சிறுபான்மை மக்களுக்கு ஒரு ஆபத்து, தீங்கு என்றால்; அது என் பிணத்தைத் தாண்டித் தான் நடக்கும்” என்றார். அச்செய்தி இந்தியா முழுவதும் எதிரொலித்தது மட்டுமல்லாமல் தொடர்ந்து கலைஞர் அதன்படியே நடந்து வந்தார் இயக்கத்தையும் நடத்தி வந்தார். அதே போலத் தான் நீதிக்கட்சியின் தலைவர்கள் தொடர்ந்து, பெரியார், அண்ணா, கலைஞர் மற்றும் இன்று தளபதி மு.க.ஸ்டாலின் எனக் கட்சியிலும், ஆட்சியிலும் சிறுபான்மை மக்களுக்குப் பாதுகாப்பும், நலம் சார்ந்த திட்டங்களும் செய்து கொண்டிருப்பது தி.மு.க. என்பது யாரும் மறுக்க முடியாத வரலாற்றுச் செய்திகளாகும்.
சிதம்பரம் சட்டமன்றத் தொகுதியில் நின்று வெற்றி பெற்ற மனித நேய ஜனநாயகக் கட்சியின் தலைவர் மு. தமிமுன் அன்சாரி, திமுக தலைவர் மு.க. ஸ்டாலினைச் சந்தித்து நன்றி கூற வந்த போது, “நான் எனது எம்.எல்.ஏ. பதவியை விட்டு விலகுகிறேன்; தாங்கள் அந்த இடத்தில் நின்று வெற்றி பெற்றுச் சட்டசபை செல்ல வேண்டும்” என்று ஆதங்கத்தோடு சொன்னார். ஆனால் “அப்படி ஏதும் செய்து விடாதீர்கள்; தாங்கள் சட்டமன்றத்தில் இருக்க வேண்டும்” என்று தளபதி அவர்க்கு ஆறுதலும் அறிவுரையும் கூறி அனுப்பினார்.
திருச்சியில் பேசிய ம.தி.மு.க.வின் தலைவர் வைகோவின் மகன் துரை வைகோ “திமுக கூட்டணியில் உதய சூரியன் சின்னத்தில் போட்டியிட்டது துரதிஷ்டமானது” என்று கூறி செய்திகள் வருகின்றன. உதயசூரியன் சின்னம் கொண்ட தி.மு.க.வில் தான் மாநிலங்களவைக்கு 4 முறை நின்று 24 ஆண்டுகள், மக்களவையில் ஒரு முறை 5 ஆண்டுகள் என எம்.பி. பதவி பெற்று 29 ஆண்டுகள் பொறுப்பில் இருந்தவர்தாம் வைகோ. வி.சி. கட்சி, பொதுவுடமைக் கட்சிகள் அவரவர் சின்னத்தைப் பெற்றுக் கேட்டு நின்றனர். ஆனால், வைகோ அவர்கள் உதயசூரியன் சின்னத்தில் போட்டியிட்டது ஏன்? திமுக ஆட்சியிலும், கட்சியிலும் பல்வேறு பயனடைந்தவர்கள் திமுக ஆட்சி வெற்றி பெற்று இருந்தால்; இந்தத் துரதிஷ்டப் பேச்சு நடந்து இருக்காது. மாஜி நடிகர் விஜய்யோடு தி.மு.க தலைவர் மு.க. ஸ்டாலினை இணைத்துப் பேசுவது என்பதை எந்த விதத்திலும் கழகத் தொண்டன் ஏற்றுக்கொள்ள மாட்டான்.