சென்னை, ஜூன். 11–

தமிழ் சினிமாவில் இயக்குனர் இமயம் என அழைக்கப்பட்ட இயக்குனர் பாரதிராஜா அவர்கள், (வயது 84), உடல்நலக்குறைவால் நேற்று (10.6.2026– புதன்கிழமை) காலை இயற்கை எய்தினார் என்பதை அறிவிக்க பெரிதும் வருந்துகிறோம்.

இச்செய்தியறிந்ததும் கழகத் தலைவர் மு.க.ஸ்டாலின், சட்டமன்ற எதிர்க்கட்சித் தலைவர் உதயநிதி ஸ்டாலின் உள்பட அரசியல் கட்சித் தலைவர்கள், திரையுலக பிரமுகர்கள் திரளாகச் சென்று மறைந்த இயக்குனர் பாரதிராஜா அவர்களின் உடல் மீது மலர் மாலை வைத்து இறுதி அஞ்சலி செலுத்தினர்.

தேனி மாவட்டம் அல்லிநகரத்தில் 1941ம் ஆண்டு ஜூலை 17ல் பிறந்தவர் பாரதிராஜா. இவருக்கு சகோதரிகள் மூவர். சகோதரர்கள் மூவர். பாரதி ராஜாவின் இயற்பெயர் சின்னசாமி ஆகும். சினிமா மீதுள்ள ஆர்வத்தால் சென்னைக்கு வந்த பாரதிராஜா, இயக்குநர் பிபுல்லையாவிடம் உதவி யாளராக பணிபுரியும் வாய்ப்பு கிடைத்தது. அதன் பின் பிரபல கன்னட இயக்குநரான புட்டண்ணா கனகலிடம் சேர்ந்து சினிமாவின் நுணக்கங்கள் அனைத்தையும் கற்றார்.

16 வயதினிலே படத்தின் மூலம் இயக்குநராக அறிமுகம் ஆனார். தொடர்ந்து கிழக்கே போகும் ரயில், சிகப்பு ரோஜாக்கள், டிக் டிக் டிக், காதல் ஓவியம், வாலிபமே வாவா, மண் வாசனை, புதுமைப்பெண், ஒரு கைதியின் டைரி, முதல் மரியாதை, கடலோர கவிதைகள், வேதம் புதிது, கொடி பறக்குது, என்னுயிர் தோழன், புது நெல்லு புது நாத்து, நாடோடி தென்றல், கேப்டன் மகள், கிழக்கு சீமையிலே, கருத்தம்மா, பசும்பொன், தமிழ் செல்வன், அந்தி மந்தாரை, தாஜ்மகால், கடல் பூக்கள், ஈரநிலம், கண்களால் கைது செய், பொம்ம லாட்டம், அன்னக்கொடி, மீண்டும் ஒரு மரியாதை உள்ளிட்ட படங்களை இயக்கி உள்ளார்.

ஸ்டுடியோவுக்குள் நடந்த சினிமாவை கிராமத்துக்கு அழைத்து சென்று மண்வாசனையுடன் படத்தை கொடுத்தவர். இயக்கம் தாண்டி தயாரிப்பாளர், நடிகர் என பன்முகத் திறமை கொண்டவர் பாரதிராஜா பல்வேறு நடிகர், நடிகைகளை அறிமுகப்படுத்தியவர் என்ற பெருமைக்குறியவரும் ஆவார்.

மகன், நடிகர் மனோஜ் குமார் மறைவுக்கு பின் மனதளவிலும், உடலளவிலும் பாதிக்கப்பட்ட பாரதிராஜா சில மாதங்கள் மருத்துவமனையில் சிகிச்சை பெற்று வந்தார். ஒரு மாதத்திற்கு முன் வீடு திரும்பிய அவர் வீட்டில் ஓய்வெடுத்து வந்தார். இந்நிலையில் நேற்று (10.6.2026) அதிகாலை இயக்குனர் பாரதிராஜா அவர்கள் மறைவுற்றார்.

பாரதிராஜா மறைவுக்கு கழகத் தலைவர் மு.க.ஸ்டாலின், சட்டமன்ற எதிர்க்கட்சித் தலைவர் உதயநிதி ஸ்டாலின், மதிமுக பொதுச் செயலாளர் வைகோ, நாம் தமிழர் கட்சித் தலைவர் சீமான், கவிப்பேரரசு வைரமுத்து, சூப்பர் ஸ்டார் ரஜினிகாந்த், கலைஞானி கமலஹாசன் எம்.பி., புரட்சி தமிழன் சத்தியராஜ் உள்பட பல்வேறு அரசியல் கட்சித் தலைவர்கள், திரையுலகினர், பொது மக்கள் நேரில் சென்று அஞ்சலி செலுத்தினர்.

கலைஞர் தொலைக்காட்சியில்

தொடர்களை இயக்கியவர்!

முத்தமிழறிஞர் கலைஞர் மீது மிகுந்த அன்பும், பற்றும் கொண்ட இயக்குநர் இமயம் பாரதிராஜா வெள்ளித்திரை மட்டுமின்றி சின்னத் திரையிலும் ஜொலித்துள்ளார். கலைஞர் தொலைக் காட்சியில் 3 வெற்றி தொடர்களை இயக்கியுள்ளார்.

வெள்ளித்திரையில் 40க்கும் மேற்பட்ட திரைப்படங்களை இயக்கியும், 20க்கும் மேற்பட்ட திரைப்படங்களில் நடித்தும் தமிழ் மக்களை பெரிதும் கவர்ந்தவர் இயக்குநர் இமயம் பாரதிராஜா... வெள்ளித்திரையில் வெற்றிகள்பல படைத்த அவர், சின்னத்திரையிலும் ஜொலித்தார். முத்தமிழறிஞர் கலைஞர் மீது மிகுந்த அன்பும், பற்றும் கொண்ட பாரதிராஜா, கலைஞர் தொலைக்காட்சியில் 3 தொடர்களை இயக்கி ரசிக பெரு மக்களை கவர்ந்திழுத்தார். 2008-ஆம் ஆண்டு முதல், கலைஞர் தொலைக் காட்சிக்காக தொடர்களை இயக்கினார்.. பாரதிராஜாவின் புகழ்பெற்ற திரைப் படமான ‘முதல் மரியாதை’யின் தலைப்பிலேயே கலைஞர் தொலைக் காட்சிக்காக ஒரு தொடரையும் இயக்கினார். இந்த தொடர் மிகப்பெரிய வெற்றியை பெற்றது.. இதேபோல், கிராமத்துப் பின்னணியில், “தெக்கத்தி பொண்ணு” மற்றும் கிராமத்து மக்களின் வாழ்க்கை முறை, உறவுகள் மற்றும் கலாச்சாரத்தை மையமாக வைத்து “அப்பனும் ஆத்தாளும்” ஆகிய நெடுந்தொடர்களும் கலைஞர் தொலைக்காட்சியில் வெற்றி காவியம் படைத்தது. வெள்ளித்திரையை போன்று சின்னத்திரையிலும் கலைஞர் தொலைக்காட்சி மூலம் கிராமங்களின் மண்வாசத்தையும், உறவுகளின் நேசத்தையும் அனைவரின் வீடு களுக்கும் கொண்டு சேர்த்து முத்திரை பதித்தார் பாரதிராஜா. சின்னத்திரையில் கலைஞர் தொலைக்காட்சிக்கு மட்டுமே நெடுந்தொடர்களை பாரதிராஜா இயக்கினார். பாரதிராஜா இயக்கிய இந்த 3 நெடுந்தொடர்களும் முத்தமிழறிஞர் கலைஞரின் கைவண்ணத்தால் உருவான வசந்த காவியங்க ளாகும்.

இயக்குனர் அமிர்தம்

இரங்கல்!

இயக்குநர் அமிர்தம் வெளியிட்டுள்ள இரங்கல் செய்தியில்,

தமிழ்த்திரையுலகில் புதுமையை அருமையாகப் புகுத்தி பெருமைப்பட வைத்தவர் பாரதிராஜா !

பாரதிராஜாவின் மறைவு மறக்க முடியாதது; ஈடுசெய்ய முடியாதது என்றும் இரங்கல் தெரிவித்துள்ளார்.

இறுதி ஊர்வலம்!

மறைந்த இயக்குனர் பாரதிராஜா அவர்களின் இறுதி ஊர்வலம் – அரசு மரியாதையுடன் இன்று (11.6.2026) மாலை 3 மணிக்கு தேனியில் உள்ள அவரது சொந்தத் தோட்டத்தில் இறுதிச் சடங்குகள் நடைபெறுகின்றன.