சென்னை, ஜூன் 11 –
காங்கிரஸ் கட்சியின் மோசமான செயல்பாடுகளால் ‘இந்தியா’ கூட்டணி முன்பை விட அதிகமாகப் பிளவுபட்டுள்ளது என்றும், இக்கூட்டணி நாளுக்கு நாள் வலுவிழந்து வருவதாகவும் ‘தி இந்து’ ஆங்கில நாளிதழ் தெரிவித்துள்ளது.
‘தி இந்து’ ஆங்கில நாளிதழ் வெளியிட்டுள்ள தலையங்கத்தில், ‘இந்தியா’ கூட்டணி கட்சிகளின் ஆலோசனைக் கூட்டம் டெல்லியில் நடைபெற்றதாக தெரிவித்துள்ளது.
இதில், இக்கூட்டணியின் மிகவும் சக்திவாய்ந்த தென்னகத்தூணாக விளங்கிய தி.மு.க. கலந்து கொள்ளவில்லை என்றும் சுட்டிக் காட்டப்பட்டுள்ளது.
தமிழ்நாடு சட்டமன்றத் தேர்தல் முடிவுகளுக்கு பின்பு காங்கிரஸ் செய்த துரோகங்களை தொடர்ந்து இந்த கூட்டத்தை தி.மு.க. புறக் கணித்துள்ளதாக தெரிவிக்கப்பட்டுள்ளது.
இதேபோல், ‘இந்தியா’ கூட்டணியில் இருந்து ‘ஆம் ஆத்மி’ கட்சியும் விலகி இருக்க முடிவு செய்து ஒதுங்கியுள்ளதாக ‘தி இந்து’ ஆங்கில நாளிதழ் தெரிவித்துள்ளது. ‘இந்தியா’ கூட்டணியின் ஒரு அங்கமாக நாங்கள் இல்லை என்று அக்கட்சி முறைப்படி அறிவித்துள்ளதாக குறிப்பிடப்பட்டுள்ளது.
‘இந்தியா’ கூட்டணியை முதன்முதலில் தொடங்கியபோது அதில் 25க்கும் மேற்பட்ட கட்சிகள் இருந்தநிலையில், ஒவ்வொரு கட்சியாக கூட்டணியிலிருந்து விலகி வருகின்றன என்று ‘தி இந்து’ ஆங்கில நாளிதழ் தெரிவித்துள்ளது.
கூட்டணியில் இடம்பெற்றுள்ள கட்சிகள், பல்வேறு மாநில தேர்தல்களில் எதிரெதிர் திசையில் களம் கண்டதாகவும் சுட்டிக்காட்டப்பட் டுள்ளது. காங்கிரஸ் கட்சிக்கும் - இடது சாரிகளுக்கும் இடையே சமூகமான உறவு இல்லை.
இதேபோன்று திரிணாமுல் காங்கிரஸ் கட்சியும் பெரிய ஈடுபாட்டுடன் இல்லை. கூட்டணியில் உள்ள மற்ற கட்சிகளும் அதிருப்தியில்தான் உள்ளன. இதனால் எந்தவித இணக்கமும் இன்றி காணப்படும் ‘இந்தியா’ கூட்டணி நாளுக்கு நாள் வலுவிழந்து வருவதாகவும், காங்கிரஸ் கட்சியின் செயல்பாடுகளால் இக்கூட்டணி முன்பை விட அதிகமாகப் பிளவுபட்டுள்ளது என்றும் தெரிவிக்கப்பட்டுள்ளது.
இது பா.ஜ.க. முன்னேறவே வழிவகுக்கிறது என்றும் ‘தி இந்து’ ஆங்கில நாளிதழ் தலையங்கத்தில் தெரிவித்துள்ளது.