நாகர்கோவில்,ஜூன் 11 –
நாகர்கோவில் சட்டமன்றதொகுதி உறுப்பினர் ஆஸ்டின் எம்.எல்.ஏ. தொகுதிக் குட்பட்ட அனைத்து பகுதிகளிலும் வீடு வீடாகச் சென்று மக்களிடம் குறை நிறைகளை கேட்டு குறைகளை கோரிக்கைகளாக பெறும் மக்கள் சந்திப்பு நிகழ்ச்சி நாகர்கோவில் மாநகராட்சிக்குட்பட்ட 28-வது வார்டுக்கு உட்பட்ட குறுந்தெருவில் இருந்து தொடங்கியது. அந்த வார்டுக்கு உட்பட்ட அனைத்து பகுதிகளிலும் சென்று மக்களிடம் கோரிக்கை மனுக்களை பெற்றுக் கொண்டார். பின்னர் அவர் கூறியதாவது:
இந்த தொகுதி மக்கள் அதிகமானவாக்குகளை வழங்கி வெற்றிபெறச்செய்து, அவர்களுக்கு பணியாற்றக்கூடிய வாய்ப்பை எனக்கு வழங்கியிருந்தார்கள். மக்களைத் தேடி வந்து, நேரடியாக அவர்களைச் சந்தித்து, அவர்களுடைய குறைகளையெல்லாம் கேட்டு, இந்த தொகுதியை ஒரு முன்மாதிரி தொகுதியாக அனைத்துவளர்ச்சிப் பணிகளையும் நிறைவேற்றக்
கூடிய தொகுதியாக மாற்றுவோம் என்று நாங்கள் வாக்குறுதி கொடுத்திருந்தோம்.
அந்த அடிப்படையிலே, இரண்டு கட்டங்களாக மக்களைச் சந்தித்து, நேரடியாக அவரிடத்திலே மனுக்களைப் பெறக்கூடிய திட்டங்களை வகுத்து உள்ளோம். ஒன்று, ஆறு மாதத்திற்கு ஒரு முறை ஒவ்வொரு வார்டு பகுதிகளிலும், அரசு அதிகாரிகள் அனைவரையும் அழைத்துச் சென்று குறைதீர்க்கும் முகாமினை நடத்தி, நேரடியாக அந்த வார்டில் உள்ள மக்கள் தங்களுக்கு என்ன தேவைஎன்று சொல்கின்றார்களோ,அதனை நிவர்த்தி செய்து கொடுக்கக்கூடிய பணியை மேற்கொள்ளுகின்றோம்.
இரண்டாவது மக்கள் சந்திப்பு என்ற அடிப்படையிலே, ஒவ்வொரு வார்டு தோறும், வாரத்திற்கு இரண்டு வார்டு என்ற அடிப்படையிலே சனிக்கிழமை மற்றும் ஞாயிற்றுக்கிழமை, இரண்டு நாட்கள் மாலையிலே அந்த வார்டு பகுதியிலே நேரடியாகத் தெருத்தெருவாக, வீடு வீடாக மக்களைச் சந்தித்து, அவளுடைய தேவைகளைக் கேட்டறிந்து, அதை நிவர்த்திச் செய்து கொடுக்கக்கூடிய பணியை மேற்கொள்ளப்படும். அந்த வகையிலே இன்றைக்கு நாகர்கோவில் மாநகராட்சி 28-வது வார்டு பகுதியிலே முதன்முதலாக எங்களுடைய பணியைத் தொடங்கியிருக்கின்றோம்.. அடுத்த வாரத்திற்குள்ளாக, மாநகராட்சி மூலமாகவோ
அல்லது சட்டமன்ற உறுப்பினர் தொகுதி மேம்பாட்டு நிதி மூலமாகவோ அல்லது அரசினுடைய சிறப்பு நிதியைப் பெற்று, அதன் மூலமாகவோ இந்தப் பகுதிக்குத் தேவையான பணிகளை முழுமையாகச் செய்து கொடுப்போம். இவ்வாறு அவர் கூறினார்.
இந்த நிகழ்ச்சியில் மாநகராட்சி மேயர் (பொ) மேரி பிரின்சி லதா, கவுன்சிலர் அண்ணன் லட்சுமி, தி.மு.க.மாநகர செயலாளர் ஆனந்த்,துணைச் செயலாளர் ராஜன் வட்டச் செயலாளர் முத்துகிருஷ்ணன், திமுக நிர்வாகிகள் சிடி சுரேஷ், கிருஷ்ண குமார் உள்பட பலர் கலந்து கொண்டனர்.