#Title

திருவாரூர் தமிழ்நாடு மத்திய பல்கலைக் கழகம் 516 ஏக்கர் சொந்த இடத்தில் இயங்கும் ஒரே பல்கலைக் கழகம்! துணைவேந்தர் எம். கிருஷ்ணன் தகவல்!

திருவாரூர்,ஜூன்-11-–

மண்ணின் மைந்தர் முத்தமிழ் அறிஞர் கலைஞர் அவர்களின் பெரும் முயற்சியால் திருவாரூரில் கொண்டுவரப்பட்ட தமிழ்நாடு மத்திய பல்கலை கழகத்தில் , சென்னை பத்திரிகை தகவல் அலுவலகம் சார்பில் ஊடகம் மற்றும் தொடர்பியல் துறையில் ஊடகவியலாளர்களுக்கான பயிலரங்கு நடைபெற்றது. நிகழ்ச்சிக்கு பல்கலைக்கழகத்தின் துணைவேந்தர் பேராசிரியர் எம்.கிருஷ்ணன் தலைமை ஏற்றார்.

அவர் தமது உரையில் “இப்பல்கலைக்கழகத்தில் பயிலும் தமிழ்நாட்டை சேர்ந்த மாணவர்களின் எண்ணிக்கை குறிப்பாக கிராமப்புற மாணவர்களின் எண்ணிக்கை 300லிருந்து தற்போது கிட்டத்தட்ட 1300 என்ற அளவுக்கு உயர்ந்துள்ளது. அகில இந்திய அளவில் சுமார் 516 ஏக்கர் பரப்பளவில் சொந்த இடம் உள்ள ஒரே பலகலைகழகம் இந்த மத்திய பல்கலை கழகம் . நுழைவுத்தேர்வை தமிழில் அறிமுகப்படுத்தியதும், பல்கலைக்கழகத்தின் சமுதாயக் கல்லூரியின் மூலம் பயிற்றுவிக்கப்படும் திறன் வளர்ச்சி சார்ந்த பாடப்பிரிவுகள் மாணவர்களின் உயர்கல்விக்கு பெரிதும் பங்காற்றியுள்ளன . பட்டம் பெறுவது மட்டுமே கல்வியின் நோக்கம் அல்ல சமூக மாற்றம் மற்றும் வளர்ச்சிக்காகக் கல்வியைப் பயன்படுத்துவதே உண்மையான கல்வியின் வெளிப்பாடு” என்றும் குறிப்பிட் டார்.

பயிலரங்கில் தலைமையுரை ஆற்றிய தென் மண்டல தலைமை இயக்குனர் வி.பழனிச்சாமி அவர்கள், ஊடகவியலாளர்கள் காலத்திற்கேற்ப தொழில்நுட்பத் திறன்களை வளர்த்துக்கொள்ள வேண்டும் என்றும், செய்திகளை வெளி யிடும்போது அவற்றின் உண்மைத்தன்மையை அறிந்து வெளியிட வேண்டும் என்றும் தெரிவித்தார்.

இந்திய வானிலை ஆராய்ச்சி மையத்தின் சார்பில், கடந்த 12 ஆண்டுகளின்சாதனைகள் மற்றும் பருவநிலை மாற்றம் டெல்டா மாவட்டங்களில் ஏற்படுத்தும் விளைவுகள் குறித்து மூத்த விஞ்ஞானி அசோக் ராஜா விளக்கினார்.

திறன் மேம்பாட்டுத் துறையின் சார்பில் சம்சுதீன், கடந்த 12 ஆண்டுகளில் திறன் வளர்ச்சிக்காக அரசு செயல்படுத்தி வரும் நலத் திட்டங்கள் குறித்து விளக்கினார்.

பயிலரங்கின் நிறைவாக, செயற்கை நுண்ணறிவு தொழில்நுட்பம் ஊடகவியலாளர்களுக்கு எவ்வாறு உதவும் என்பது குறித்து தமிழ்நாடு மத்திய பல்கலைக் கழகத்தின் ஊடகம் மற்றும் தொடர்பியல் துறையின் பேராசிரியர் பாலசுப்ரமணிய ராஜா விளக்கினார்.

நிகழ்ச்சியில், சென்னை பத்திரிகை தகவல் அலுவலகத்தின் இயக்குனர் அருண்குமார், தேர்வு கட்டுப்பாட்டு அலுவலர் சுலோச்சனா சேகர், புல முதன்மையர், சமூக அறிவியல் மற்றும் மொழிபுலம் பேராசிரியர் ச. இரவி , மக்கள் தொடர்பு அலுவலர் பிரபஞ் பத்திரிகை மற்றும் ஊடகவியாளர்கள் கலந்துகொண்டனர்.