திருப்பூர், ஜூன். 12–
ரூ.50 லட்சம் கேட்டு 2 வாலிபர்களை கடத்தி கொலை மிரட்டல் விடுத்ததாக திருப்பூர் - நல்லூர் காவலர்கள் உட்பட 4 பேரை காவல்துறையினர் கைது செய்து விசாரணை நடத்தி வருகின்றனர்.
கோவை போத்தனூர் அடுத்த சீத்தனபுரம், இந்திரா நகரைச் சேர்ந்தவர் பரமேஸ்வரி (31). இவரது தம்பி நவீன் (29) இவர் வெள்ளலூர் ஹவுசிங் யூனிட் பகுதியில் உள்ள ஒரு வீட்டில் தங்கிருந்து ஆன்லைன் டிரேடிங் வேலை செய்து வந்தார்.
கடந்த 8ம் தேதி மதியம், பரமேஸ்வரியின் செல்போனுக்கு ஒரு அழைப்பு வந்தது. அதில் பேசிய மர்மநபர், “உன் தம்பி நவீனை நாங்கள் கடத்தி வைத்துள்ளோம். அவர் உயிரோடு வேண்டும் என்றால் உடனடியாக ரூ.50 லட்சம் பணம் தர வேண்டும்” என்று கூறிவிட்டு இணைப்பை துண்டித்துள்ளார்.
இதனால் அதிர்ச்சி அடைந்த பரமேஸ்வரி, பதறியடித்துக் கொண்டு தம்பியின் வீட்டிற்குச் சென்று பார்த்தார். அப்போது வீடு பூட்டப்
பட்டிருந்தது, பல்வேறு இடங்களில் தேடி பார்த்தும் கிடைக்க வில்லை.
செல்போனில் தொடர்பு கொண்ட போது சுவிட்ச் ஆப் செய்யப்பட்டிருந்தது. இதற்கிடையே நவீனின் நண்பர் நிர்மல்குமார் (29) என்பவரின் மனைவி ஜெனிதா, பரமேஸ்வரியைத் தொடர்பு கொண்டு மதியம் 12 மணி முதல் தன் கணவரையும் காணவில்லை என தெரிவித்துள்ளார்.
தொடர்ந்து அன்று இரவு ஜெனிதாவின் செல் போனுக்கு நவீனின் எண்ணில் இருந்து ஒரு அழைப்பு வந்துள்ளது. அதில் பேசிய கடத்தல்காரர்கள், “நவீன் மற்றும் நிர்மல்குமார் ஆகிய இருவரையும் நாங்கள் தான் கடத்தியுள்ளோம். கேட்கும் பணத்தைக் கொடுக்காவிட்டால் இருவரையும் கொலை செய்துவிடுவோம்” என மிரட்டியுள்ளனர்.
இதனால், பயந்து போன குடும்பத்தினர் உடனடியாக போத்தனூர் காவல் நிலையத்தில் புகார் அளித்தனர். அதன்பேரில் காவல்துறையினர் வழக்குப்பதிவு செய்தனர். இதையடுத்து காவல்துறையினர் அவர்கள் இருவரும் பணம் கொடுக்கல், வாங்கல் தகராறில் கடத்தப்பட்டார்களா? அல்லது திட்டமிட்டு பணம் பறிக்கும் கும்பல் இதில் ஈடுபட்டுள்ளதா? என்று பல்வேறு கோணங்களில் தனிப்படை அமைத்து தீவிரமாக விசாரித்து வந்தனர்.
காவல் துறையினர்
மடக்கிப் பிடித்தனர்!
தொடர்ந்து காவல்துறையினர் மர்ம நபர்கள் அழைத்த செல்போன் எண் மற்றும் சிசிடிவி காட்சிகளை வைத்து தேடி வந்தனர். இதற்கிடையே காவல்துறையினர் பணத்தை தயார் செய்து நவீன் மற்றும் நிர்மல்குமாரின் குடும்பத்தினரிடம் கொடுத்து கடத்தல்காரர்களிடம் எங்கு வர வேண்டும் என கேட்குமாறு கூறியுள்ளனர்.
கடத்தல் காரர்கள் திருப்பூர் வந்து பணத்தை கொடுத்து இருவரையும் மீட்டு செல்லும் படி தெரிவித்துள்ளனர். இதையடுத்து இருவரது குடும்பத்தினரும் திருப்பூர் சென்றனர். அவர்களை காவல்துறையினர் சாதாரண உடையில் பின் தொடர்ந்தனர். அப்போது, பணத்தை வாங்க வந்த இருவரை போத்தனூர் காவல்துறையினர் மடக்கிப் பிடித்தனர்.
அதில் அவர்கள் இருவரும் திருப்பூர் நல்லூர் காவல் நிலையத்தில் காவலர்களாக பணிபுரிந்து வரும் மோகன் (37) மற்றும் ஆனந்த் (38) என்பது தெரியவந்தது. காவல்துறையினர் அவர்களை கோவை அழைத்து வந்து விசாரணை நடத்தியதில் நவீன் மற்றும் நிர்மல்குமார் ஆகியோரை திருப்பூரை சேர்ந்த காளிதாஸ் (31) மற்றும் ராம்குமார் (31) ஆகியோர் திருப்பூரில் ஒரு பகுதியில் அறையில் மறைத்து வைத்திருப்பதாக கூறியுள்ளனர். காவல்துறையினர் அதிரடியாக அங்கு சென்று இருவரையும் மீட்டு, கடத்தல்காரர்கள் காளிதாஸ் மற்றும் ராம்குமாரையும் பிடித்தனர். அவர்களை காவல் நிலையம் அழைத்து வந்து விசாரணை நடத்தினர். விசாரணையில், அவர்கள் பணம் கொடுக்கல், வாங்கல் தகராறில் இருவரையும் கடத்தியதாகவும், தங்களுக்கு திருப்பூர் காவலர்கள் இருவரும் உதவியதாகவும் தெரிவித்துள்ளனர். இதைத்தொடர்ந்து காவலர்கள் மோகன், ஆனந்த் மற்றும் காளிதாஸ், ராம்குமார் ஆகிய 4 பேரை கைது செய்து கடத்தலுக்கு வேறுயாரெல்லாம் உதவி உள்ளார்கள்? திருப்பூர் காவலர்களுக்கு கடத்தலில் என்ன தொடர்பு என்பது குறித்து தொடர்ந்து விசாரணை நடத்தி வருகின்றனர். இந்த கடத்தப்பட்ட சம்பவம் கோவையில் பெரும் பரபரப்பை ஏற்படுத்தியுள்ளது.
ஆன்லைன் லாட்டரி விற்பனை-!
கடத்தப்பட்ட நவீன் மற்றும் நிர்மல்குமார் பல்வேறு ஆன்லைன் வேலைகளை செய்து வந்துள்ளனர். அதேபோல தடை செய்யப் பட்ட ஆன்லைன் லாட்டரி விற்பனையிலும் ஈடுபட்டு வந்ததாக தெரிகிறது. அதில் மோசடியில் ஈடுபட்டதால் அவர்கள் கடத்தப்பட்டதாகவும் கூறப்படுகிறது. இதனால் காவல்துறையினர் நவீன் மற்றும் நிர்மல்குமாரிடம் விசாரணை நடத்தி உள்ளனர். இதில் அவர்கள் ஆன்லைன் லாட்டரி விற்பனை செய்தது உறுதி செய்யப்பட்டதாக தெரிகிறது.இதனால் காவல்துறையினர் அவர்கள்மீதும் வழக்கு பதிவு செய்து விசாரணை நடத்த திட்டமிட்டு உள்ளனர்.