#Title

அரசு அலுவலகங்களில் அத்துமீறி நுழைந்து ஆய்வு என்ற பெயரில் அச்சுறுத்தி வரும் த.வெ.க.வினர் மீது அரசு கடும் நடவடிக்கை எடுக்க வேண்டும்! விழுப்புரம் தெற்கு மாவட்ட தி.மு.க. பொறுப்பாளர் டாக்டர் பொன்.கௌதமசிகாமணி கண்டனம்!

விழுப்புரம், ஜூன் 12 –

விழுப்புரம் தெற்கு மாவட்ட கழக பொறுப்பாளர் டாக்டர் பொன்.கௌதமசிகாமணி அறிக்கை வருமாறு :–

அரசு அலுவலகங்களில் அத்துமீறி நுழைந்து , ஆய்வு என்ற பெயரில் அரசு அலுவலர்களை அச்சுறுத்தி அவர்களின் பணிகளுக்கும் பொதுமக்களுக்கும் இடையூறு ஏற்படுத்தும் செயல்களில் ஆளும் கட்சி நிர்வாகிகள் என்கிற அதிகாரத் துடன் தமிழக வெற்றிக் கழகத்தினர் தமிழகம் முழுவதும் ஈடுபட்டு வருகிறார்கள்.

இந்த அதிகார அத்து மீறல் தற்போது எல்லை மீறி அரசு பள்ளியில் அனுமதியின்றி நுழைந்து வகுப்பறையில் மாணவர்களிடம் அவர்கள் கட்சியை பற்றி பிரச்சாரம் செய்யுமளவிற்கு சென்றுள்ளது.

வகுப்பறைக்குள் ரீல்ஸ்

எடுக்கும் த.வெ.க.வினர்!

கடந்த 09.06.2026, செவ்வாய்க்கிழமை அன்று, விக்கிரவாண்டி சட்டப்பேரவைத் தொகுதிக்கு உட்பட்ட காணை ஊராட்சி ஒன்றியம், மாம்பழப்பட்டு அரசு மேல்நிலைப்பள்ளிக்கு சென்ற தமிழக வெற்றிக் கழகத்தின் காணை தெற்கு ஒன்றிய செயலாளர் ஜான் பீட்டர் மற்றும் மாம்பழப்பட்டு கிராமத்தை சேர்ந்த த.வெக.வினர் பள்ளியின் தலைமை ஆசிரியர் ( பொறுப்பு ) தினகரனிடம் பள்ளியின் பெற்றோர் - ஆசிரியர் சங்க நிர்வாகிகள் நியமனம் தொடர்பாக வாக்குவாதத்தில் ஈடுபட்டுள்ளனர்.

தொடர்ந்து கல்வித்துறையினர் அனுமதி இல்லாமல் அத்துமீறி வகுப்பறைகளுக்குள் நுழைந்து ஆய்வு என்ற பெயரில் மாணவர்களிடம் அரசியல் குறித்து பேசியதோடு வகுப்பறைக்குள் ரீல்ஸ் எடுத்தும் வெளியிட்டுள்ளனர்.

எந்த அரசுப் பொறுப்பிலும் இல்லாதவர்களின் போக்கு மிகவும் ஆபத்தானது!

எந்த அரசுப் பொறுப்பிலும் இல்லாதவர்களின் இத்தகைய போக்கு மிகவும் ஆபத்தானது. குறிப் பாக கல்வித்துறையில் இத்தகைய விதிமீறல்கள் தவறான முன்னுதாரணமாக அமைந்துவிடும் என்பதுடன் அரசு கல்வி நிலையங்களை அரசியல் மேடைகளாக மாற்றும் ஆளும் த.வெ.க. வினரின் செயலுக்கு விழுப்புரம் (தெற்கு) மாவட்ட தி.மு.க. தனது கடும் கண்டனத்தை தெரிவித்துக் கொள்வதோடு வகுப்பறைகளுக்குள் அனுமதியின்றி நுழைந்த த.வெ.க. ஒன்றிய செயலாளர் ஜான் பீட்டர் உள்ளிட்டவர்கள் மீது சட்டப்படியான நடவடிக்கைகள் எடுக்க பள்ளிக்கல்வித்துறையை கேட்டுக்கொள் கிறது.

மேலும் இதுபோன்ற அதிகார அத்துமீறல்கள் அரசின் எந்த துறையிலும் தொடராத வகையில் த.வெ.க. வினர் மீது தமிழ்நாடு அரசு கடும் நடவடிக்கை எடுக்க வேண்டும் எனவும் விழுப்புரம் தெற்கு மாவட்ட தி.மு.க. கேட்டுக் கொள்கிறது.

இவ்வாறு விழுப்புரம் தெற்கு மாவட்டப் பொறுப்பாளர் டாக்டர் பொன்.கௌதமசிகாமணி கண்டனம் தெரிவித்துள்ளார்.