சென்னை, ஜூின் 13 –
முதலமைச்சருக்கு அனுப்பி வைக்கப்படும் ரகசிய அறிக்கையை அவர் பார்ப்பதற்கு முன்னதாகவே அவரது வியூக வகுப்பாளர், மூத்த அமைச்சர் மற்றும் முதல்வரின் பாதுகாப்புப் பிரிவு உயரதிகாரி ஒருவர் என மூன்று பேர் அந்த ரகசிய அறிக்கையை பார்த்து விடுகின்றனர். இது நடைமுறைக்கு மாறாக உள்ளது. ரகசியங்கள் கசியவும் வாய்ப்புள்ளது என்றும் இதனால் உளவுத் துறை அதிகாரிகள் அதிர்ச்சி அடைந்து உள்ளனர் என்றும் தமிழ் நாளிதழ் ஒன்று செய்தி வெளியிட்டுள்ளது.
அமைச்சர்கள், அதிகாரிகளை கண்காணிக்க அமைக்கப்பட்டுள்ள, சிறப்புக் குழு தரும் அறிக்கையை, முதல்வர் விஜய் படிப்பதற்கு முன்பே, அவரது வியூக வகுப்பாளர் ஜான் ஆரோக்கியசாமி பார்வையிடுவதால், உளவுத் துறை அதிகாரிகள் அதிர்ச்சி அடைந்து உள்ளனர்.
தமிழகத்தில், தமிழக வெற்றிக்
கழகம் தலைமையில் கூட்டணி ஆட்சி நடக்கிறது. த.வெ.க., அமைச்சர்கள் உட்பட அனைத்து அமைச்சர்களையும் கண்காணிக்க, காவல் துறையின் உளவுப் பிரிவு அதிகாரிகளுக்கு
உத்தரவிடப்பட்டு உள்ளது.
இது குறித்து, காவல் துறை வட்டாரங்கள் கூறியதாவது: அமைச்சர்களையும், உயர் அதிகாரிகளையும், உளவுத் துறை வாயிலாக கண்காணிப்பது வழக்கமான நடவடிக்கை தான். அதன்படி, முதல்வராக இருப்பவருக்கு, உளவுத் துறை ஐ.ஜி., வழியாக இந்த கண்காணிப்பு அறிக்கை, வாரம் ஒருமுறை அல்லது மாதம் இரு முறை சமர்ப்பிக்கப்படும்.
இதன் வாயிலாக, அமைச்சர்களின் நடவடிக்கைகள் அனைத்தையும், முதல்வர் தெரிந்து கொள்ள முடியும்.
இந்நிலையில், புதிதாக பொறுப்பேற்றிருக்கும் த.வெ.க., அரசில், அமைச்சர்கள், உயர் அதிகாரிகளை கண்காணிக்க, புதிதாக சிறப்புக் குழு அமைக் கப்பட்டது. அக்குழு அளிக்கும் அறிக்கைகள், முதல்வர் விஜய் மேஜைக்கு தான் முதலில் அனுப்பி வைக்கப்பட்டன.
அந்த நடைமுறை தற்போது மாறி விட்டது. அதாவது, முதல்வரின்
தனிப்பட்ட வியூக வகுப்பாளரான
ஜான் ஆரோக்கியசாமி, தற்போது தலைமைச் செயலகத்துக்கு அடிக்கடி வருகிறார். அதன்படி, முதல்வர் பார்வைக்கு உளவுத் துறை அறிக்கை செல்லும் முன்பாக, அதை ஜான்
பார்வையிட உத்தரவிடப்பட்டுள்ளது.
சில தகவல்களுக்கு நேரடியாக
உளவுத் துறை உயர் அதிகாரிகளிடம் விளக்கம் கேட்கிறார். அதேபோல்,
சீனியர் அமைச்சர் ஒருவரும், முதல்வரின் பாதுகாப்பு பிரிவில் உள்ள உயர் அதிகாரியும், உளவு அறிக்கையை, ‘வாட்ஸாப்’ வாயிலாக அனுப்பச் சொல்லி கேட்கின்றனர்.
சட்ட ரீதியாக, முதல்வர் அல்லது அரசு நியமித்த அவரது உதவியாளர் பார்வைக்குச் செல்லும் முன்பாக,
உளவுத் துறை அறிக்கையை வேறு யாரும் பார்க்கக் கூடாது. தற்சமயம் வரை, முதல்வருக்கு உதவியாளர்
நியமிக்கப்படவில்லை. எனவே, முதல்வரின் பார்வைக்கு தான் அறிக்கை முதலில் செல்ல வேண்டும்.
ஆனால், அந்த நடைமுறையை, குறுக்கே புகுந்து பலரும் கெடுக்கின்றனர். முதல்வர் விஜய் பார்வைக்கு போகும் முன்னரே உளவுத்துறை அறிக்கையை படிக்கத் துடிக்கும் மூவரணியால், அரசின் ரகசியங்கள் கசிய அதிக வாய்ப்பு இருக்கிறது. இவ்வாறு அந்த நாளிதழில் செய்தி வெளியாகி உள்ளது.