திருப்பூர், ஜூன் 13 –
திருப்பூர் மாநகராட்சி, பெரியார் குடியிருப்பு பகுதியில் மாநகராட்சி அரசு நடுநிலைப்பள்ளி உள்ளது. இங்கு மாணவர்களுக்கு சமீபத்தில் தவெகவினர் மரக்கன்றுகள் வழங்குவதாக கூறியுள்ளனர்.
பொதுவாக அரசுப்பள்ளி வளாகங்களுக்குள் அரசியல் கட்சியினர் நுழைவதற்கோ, கட்சி சார்ந்த விளம்பரங்களை மேற்கொள்வதற்கோ பள்ளிக் கல்வித்துறை கடுமையான கட்டுப்பாடுகளை விதித்
துள்ளது. குறிப்பாக, பள்ளி நேரங்களில் வெளிநபர்களோ அல்லது அரசியல் அமைப்பைச் சேர்ந்தவர்களோ கல்வி அதிகாரிகளின் முறையான அனுமதியின்றி பள்ளி வளாகத்திற்குள் நுழையக்கூடாது என்றும், மாணவர்களின் பாதுகாப்பு மற்றும் தனிமனித உரிமை கருதி அவர்களைப் பெற்றோரின் அனுமதியின்றி புகைப்படம் அல்லது வீடியோ எடுக்கக் கூடாது என்றும் அரசு விதிகள் கூறுகின்றன.
மேலும், அரசுப் பள்ளிகளை எவ்வித அரசியல் பரப்புரைக்கோ, விளம்பர நோக்கங்களுக்கோ பயன்படுத்தக் கூடாது என்று விதிகள் உள்ள நிலையில், அதனைப் பொருட்படுத்தா மல் பள்ளிக்குள் நுழைந்த தவெக-வினர், அங்குள்ள ஆசிரியர்கள் மற்றும் மாணவர்களைத் தங்களது செல்போனில் புகைப்படம், வீடியோ எடுத்துள்ளனர்.
மரக்கன்று வழங்குவது போலத் தொடங்கிய இந்நிகழ்வை, அப்படியே ஒரு அரசியல் விளம்பரப் படமாக மாற்றியுள்ளனர்.
ஒரே ஒரு செடி வழங்கி மாணவர்களுடன் எடுத்த வீடியோக்களைத் தொகுத்து, பின்னணியில்சினிமா பாடல்களை ஒலிக்கவிட்டு, எம்.எல்.ஏ., நிர்வாகிகள் மற்றும் விஜய் ஆகியோரின் புகைப்படங்களுடன் கூடிய அரசியல் போஸ்டரையும் இணைத்து ரீல்ஸ் வீடியோவாக சமூக வலைதளங்களில் பதிவிட்டுள்ளனர்.
இதுகுறித்து மாவட்ட கல்வித்துறை அதிகாரிகள் உரிய விசாரணை நடத்தி விதிகளை மீறி செயல்பட்டவர்கள் மீது கடுமையான நடவடிக்கை எடுக்க வேண்டும் என பெற்றோர் கோரிக்கை விடுத்துள்ளனர்.