திருவள்ளூர், ஜூன் 14:-
திருவள்ளூர் மாவட்டம், சோழவரம் ஒன்றியத்திற்குட்பட்ட ஆரணி தமிழ் காலனி சுடுகாடு அருகே கஞ்சா பதுக்கி வைத்திருந்ததாக கிடைத்த ரகசிய தகவலின் அடிப்படையில் ஆரணி காவல் நிலைய போலீசார் நடத்திய சோதனையில், மூன்று பேரை கைது செய்து அவர்களிடமிருந்து 3 கிலோ 250 கிராம் கஞ்சா மற்றும் 3 செல்போன்களை பறிமுதல் செய்தனர்.
கைது செய்யப்பட்டவர்கள் ஆரணி சுப்ரமணியன் நகரைச் சேர்ந்த பாலாஜி என்ற சந்தோஷ் (24), நரேஷ் (22), மற்றும் எஸ்.பி. கோவில் தெருவைச் சேர்ந்த சிரஞ்சீவி (26) என அடையாளம் காணப்பட்டனர். அவர்கள் மீது வழக்குப் பதிவு செய்யப்பட்டு, பொன்னேரி முதல் நிலை குற்றவியல் நீதிமன்றத்தில் ஆஜர்படுத்தப்பட்டதைத் தொடர்ந்து, நீதிமன்ற உத்தரவின் பேரில் புழல் மத்திய சிறையில் அடைக்கப்பட்டனர்.
இந்த சம்பவத்தைத் தொடர்ந்து, த.வெ.க. ஆட்சி பொறுப்பேற்றது முதல் மாநிலத்தின் பல்வேறு பகுதிகளில் கஞ்சா மற்றும் போதைப்பொருள் விற்பனை சம்பவங்கள் தொடர்ச்சியாக வெளிச்சத்துக்கு வந்து கொண்டிருப்பதாக பொதுமக்கள் மற்றும் சமூக ஆர்வலர்கள் குற்றம்சாட்டுகின்றனர். பள்ளி, கல்லூரிகள், குடியிருப்பு பகுதிகளுக்கு அருகிலும் போதைப்பொருள் நடமாட்டம் அதிகரித்து வருவது சமூகத்தில் பெரும் அச்சத்தை ஏற்படுத்தியுள்ளதாக அவர்கள் தெரிவிக்கின்றனர்.
தேர்தல் பிரச்சாரத்தின் போது “தமிழ்நாட்டில் போதைப்பொருளை முற்றிலும் ஒழிப்போம்” என்று வாக்குறுதி அளித்து ஆட்சிக்கு வந்த அரசு, தற்போது அதிகரித்து வரும் போதைப்பொருள் விற்பனையை கட்டுப்படுத்துவதில் போதிய தீவிரம் காட்டவில்லை என்ற விமர்சனமும் வலுத்து வருகிறது.
குற்றவாளிகளை முழுமையாக ஒடுக்குவதற்குப் பதிலாக, விளம்பரங்கள், புகைப்படங் கள், சமூக வலைதள பதிவுகள் மற்றும் ரீல்ஸ் போன்ற விளம்பர அரசியலிலேயே அரசு அதிக கவனம் செலுத்துவதாக பொதுமக்களும் சமூக ஆர்வலர்களும் குற்றம்சாட்டுகின்ற னர்.
“மக்களின் பாதுகாப்பை உறுதி செய்ய வேண்டிய அரசு, போதைப்பொருள் ஒழிப்பில் உறுதியான நடவடிக்கை எடுப்பதற்குப் பதிலாக காட்சிப்படுத்தும் அரசியலில் ஈடுபட்டுள்ளது. இதனால் இந்த ஆட்சி ‘ரீல்ஸ் மாடல் ஆட்சி’ என்ற விமர்சனத்திற்கு ஆளாகியுள்ளது. இனியும் தாமதிக்காமல் மாநிலம் முழுவதும் போதைப் பொருள் விற்பனையை முழுமையாக ஒழிக்க கடுமையான நடவடிக்கைகளை அரசு உடனடியாக மேற்கொள்ள வேண்டும்” என பொதுமக்கள் மற்றும் சமூக ஆர்வலர்கள் வலியுறுத்தியுள்ளனர்.