உளுந்தூர்பேட்டை,ஜூன் 15–
உளுந்தூர்பேட்டை தொகுதியில் குடிநீர் பிரச்னையை தீர்த்ததாக சோபா மாடல் ஆட்சியில் ரீல்ஸ் போட்ட தவெக நிர்வாகி களுக்கு கிராம மக்கள் கடும் எதிர்ப்பு தெரிவித்த சம்பவம் பெரும் பரபரப்பை ஏற்படுத்தியது.
கள்ளக்குறிச்சி மாவட்டம், உளுந்தூர்பேட்டை தொகுதி, திருநாவலூர் ஒன்றியம், சேந்தநாடு கிராம ஊராட்சிக்கு உட்பட்டது ஒல்லியாம்பாளையம் கிராமம். இந்த கிராமத்தில் கடந்த சில நாட்களுக்கு முன்னர்குடிநீர் பிரச்னை ஏற்பட்டதால் கிராமத்தை சேர்ந்த பெண்கள் உள்ளிட்ட பொதுமக்கள் சாலை மறியல் போராட்டத்தில் ஈடுபட்டனர்.
இதுகுறித்து கிராமத்தை சேர்ந்த பொதுமக்கள் உளுந்தூர்பேட்டை திமுக எம்எல்ஏ ஜி.ஆர்.வசந்தவேலுவிடம் குடிநீர் பிரச்னையை தீர்க்க கோரிக்கை வைத்தனர். இதனை தொடர்ந்து திருநாவலூர் வட்டார வளர்ச்சி அலுவலரிடம் உடனடியாக பேசி குடிநீர் பிரச்னையை தீர்க்கு மாறு கூறினார். இதனை தொடர்ந்து உடனடியாக
குடிநீர் பிரச்னை தீர்க்கப்பட்டுபொதுமக்களுக்கு குடிநீர் வினியோகம் செய்யப்பட்டது.
இந்நிலையில் தவெக நிர்வாகிகள் குடிநீர் பிரச்னையை உடனடியாக தங்களது முயற்சியால் சரி செய்யப்பட்டது என வீடியோ காட்சிகள் பதிவு செய்து ரீல்ஸ் போட்டனர். இது தொடர்பாக சமூக வலைதளங்களில் கடும் வாக்குவாதம் நடைபெற்று வந்த நிலையில் நேற்று முன்தினம் அந்த கிராமத்தை சேர்ந்த ஏராளமான பெண்கள் மற்றும் பொதுமக்கள் குடிநீர் பிரச்னையை தீர்க்க திமுக எம்எல்ஏ வசந்தவேல் தான் உடனடியாக நடவடிக்கை எடுத்தார் என்றும், தவறான தகவல் போட்டு ரீல்ஸ் போட்ட தவெக நபர் உடனடியாக கிராமத்திற்கு வரவேண்டும் என போனில் பேசி கடும்வாக்குவாதத்தில் ஈடுபட்டனர். தொடர்ந்து இதுபோல் ரீல்ஸ் போட்டு வந்தால் போராட்டம் நடத்துவோம் என கூறியதால் உளுந்தூர்பேட்டை பகுதியில் சோபா மாடல் ஆட்சியில் ரீல்ஸ் போடும் விளம்பர குறிப்பிற்கு கிராம பொதுமக்கள் பதிலடி கொடுத்த இந்த சம்பவம் பெரும் பரபரப்பு ஏற்படுத்தியது.