தி
ராவிட முன்னேற்றக் கழகமும் தாய்க் கழகமான
திராவிடர் கழகமும், ஒரே திசை வழியில் சமூக - பொருளாதார - கல்வி - பெண்ணுரிமை - சாதி - மத வேறுபாடற்ற பகுத்தறிவுள்ள சமத்துவ சகோதரத்துவ சமுதாயம் என்ற அடிப்படைக் கட்டமைப்புக்கள், அனைத்து மக்களுக்குமானதாகவும், சமத்துவமாகவும், மக்களாட்சியின் மூலம் பெற்றிட வேண்டுமென தந்தை பெரியார் பேரறிஞர்அண்ணா ஆகிய சிந்தனையாளர் களால் உருவாக்கப்பட்ட இயக்கங்கள் என்பதை தமிழ்நாட்டின் வரலாறு தெளிவாகப் பதிவு செய்துள்ளது. இன்றைய இந்த சமுதாய - அரசியல் அடிப்படைக் கட்டமைப்புகள் எந்த அளவிற்கு, திராவிட இயக்கங்களின் பல்லாண்டுகாலப் பிரச்சாரங்களின் பயனாகவும், அரசியல் அதிகாரத்தின் உரிய அமலாக்கத்தாலும், அடித்தட்டு மக்களுக்கும் விளிம்பு நிலை மக்களுக்கும் இதன் தாக்கம் சென்றடைந்திருக்கிறது என்பதை எந்த சக்தியாலும் எந்தக் காலத்திலும் மறைக்கவோ, மறுக்கவோ இயலாது.
இந்திய ஒன்றிய நிலப்பரப்பில் விடுதலைக்குப் பின்னர், அனைத்துத் துறைகளிலும் முன்னேறிய மாநிலமாக உருவாகியிருப்பதற்கு; திராவிட முன்னேற்றக் கழகத்தின் பங்கு என்பது மகத்தானது மட்டுமல்ல வியப்பிற்குரியது! தமிழ்நாடு இந்த உயர்ந்த நிலையை அடைந்ததற்கு திராவிட முன்னேற்றக் கழகம் பயணித்த வழித்தடங்கள் கரடுமுரடானவை என்பது தமிழ்நாட்டின் வரலாற்றை அறிந்தவர்களுக்குத் தெளிவாகவே புரியும்.
திராவிட முன்னேற்றக் கழகம் அத்தகைய தடைகளைத் தகர்த்து தொடர்ந்து அரசியல் பயணத்தை அச்சமின்றி மேற்கொண்டுவரும் ஓர் உயிரோட்டமுள்ள இயக்கம்தான் திராவிட முன்னேற்றக் கழகம். ஆம்! தமிழ் மண்ணுக்கும் தமிழ் மக்களுக்கும் தமிழ் மொழிக்கும் என்றும் அரணாகவும், அகழியாகவும் அகலாது நிலைத்து நின்று பாதுகாக்கும் இயக்கமாகும்.
1925 ஆம் ஆண்டு தந்தை பெரியாரால் தொடங்கப்பட்ட சுயமரியாதை இயக்கம் தொடர்ந்து நீதிக்கட்சியின் வழியாக 1944 ஆம் ஆண்டு திராவிடர் கழகமாகப் பரிணாம வளர்ச்சி பெற்று, 1949 ஆம் ஆண்டு செப்டம்பர் திங்கள், திராவிட முன்னேற்றக் கழகமாக சமூக - அரசியல் களத்தில் தன் பணியினை அடையாளப்படுத்திக்கொண்டு, 1957ஆம் ஆண்டு தேர்தல் களத்தில் தொடங்கி, அரசியல் வெற்றி தோல்விகளுக்குப் பின்னரும் திராவிட முன்னேற்றக் கழகம் தமிழ்நாட்டிலும், இந்திய ஒன்றியத்திலும் ஒரு நிராகரிக்க முடியாத நிரந்தர அரசியல் சக்தியாக தொடர்ந்து கொண்டிருக்கிறது என்பது இந்த இயக்கத்தின் வரலாறாகும். தேர்தல் தோல்விகண்டு துவண்டு போகாமலும், வெற்றி கண்டு வெறியாட்டம் கொள்ளாமலும், அரசியல் பண்பாட்டுடன் தொடர்ந்து மக்கள் பணியாற்றிடும் திராவிட முன்னேற்றக் கழகம் கடந்த காலங்களில் சந்திக்காத சந்தர்ப்பங்களே இல்லை, எதிர்கொள்ளாத பிரச்சி்னைகளும் இல்லை.
இந்த இயக்கம் ஒரு மாநிலக் கட்சி என்று கருதப்பட்டாலும், அகில இந்திய அரசியல் களத்தில் இந்திய அரசியல் சட்டம் வடிவமைத்துள்ள ஜனநாயக் குடியரசிற்கு (Democratic Republic) அவசரகால பிரகடனத்தின் (Declaration of Energy) மூலம், பேராபத்தை உருவாக்கிய காலகட்டத்தில் அந்தக் கொடிய நகர்வை எதிர்த்து மிகப்பெரிய போராட்டத்தில் ஈடுபட்டு ஜனநாயக் குடியரசைக் காப்பாற்றிய இயக்கம் திராவிட முன்னேற்றக் கழகம் என்பதை வரலாறு பதிவுசெய்திருக்கிறது.
ஈழத்தமிழர்களின் வாழ்க்கை சிதைக்கப்பட்டு சின்னாபின்னமாக்கப்பட்டபொழுது, ஈழத்தமிழர்களுக்காக பலபோராட்டக் களங்களை எதிர்கொண்டு கழக ஆட்சியே விலையாக கொடுத்த இயக்கமும்தான் திராவிட முன்னேற்றக் கழகம். எனவே, திராவிட முன்னேற்றக் கழகம் என்பது தேர்தல் வெற்றி, தோல்விகளின் தாக்கத்தால் கழகத்தின் பயணத்தில் என்றும் வேகம் குறையாது. மாறாக, வேகமும் வீரியமும் பன்மடங்கு அதிகரிக்கும். திராவிட முன்னேற்றக் கழகத்தினுடைய நெடிய இந்த தொடர் பயணத்தில் எதிர்கொண்ட எத்தகைய சூழ்நிலைகளும், திராவிட முன்னேற்றக் கழகம் என்ற இந்த வரலாற்றுப் பேரியக்கத்திற்கு எத்தகைய சிதைவினையும் ஏற்படுத்த இயலவில்லை, இனியும் ஏற்படுத்த இயலாது என்பது உறுதி!
திராவிட முன்னேற்றக் கழகம் தேர்தல் களத்திலே வெற்றி பெற்று ஆட்சியமைக்குமானால், தாங்கள் பிரகடனப்படுத்திய கொள்கைக்கோட்பாடுகளுக்கு சட்ட வடிவமும், திட்ட வடிவமும் கொடுத்து நிறைவேற்றிக் காட்டியுள்ளது. அப்படிப்பட்ட வரலாற்றுச் சாதனைகளையும், கடந்த காலத்தில் நிகழ்த்தி இருக்கிறது. எனவே, இந்த 2026 ஆம் ஆண்டு நடைபெற்ற தமிழ்நாடு சட்டமன்றத் தேர்தலில் திராவிட முன்னேற்றக்
கழகம் வெற்றி வாய்ப்பை இழந்திருந்தாலும் அதனால் துவண்டு போய்விடாமல், அறிவியல் அடிப்படையில் ஆய்ந்தறிந்து புறம்தள்ள வேண்டியவைகளைப் புறந்தள்ளிவிட்டு, ஈர்க்கப்பட வேண்டிய சக்திகளை உள்வாங்கிக் கொண்டுஅடுத்த அரசியல் தேர்தல் களத்திற்கு எள்ளின் முனையளவு கூட தொய்வின்றி தன் பணிகளை விரைந்து மேற்கொள்ளக்கூடிய அற்புதமான பேரியக்கம்தான் திராவிட முன்னேற்றக் கழகம்.
இந்தத் தேர்தலில் தமிழக வெற்றிக் கழகம் வெற்றி பெற்று, கூட்டணி ஆட்சி அமைத்திருப்பதனால் திராவிட முன்னேற்றக் கழகம் எந்தப் பின்னடைவையும் சந்திக்கப் போவதில்லை. மாறாக, முன்னைவிட பன்மடங்கு உற்சாகத்துடனும், உந்து சக்தியோடும் பணியாற்றுவதற்கான படிக்கட்டாகவே இந்த தோல்வியை திராவிட முன்னேற்றக் கழகம் மாற்றி அமைத்துக் கொள்ளும். தமிழக வெற்றிக் கழகம் இந்த சட்டமன்றத் தேர்தலில் பெற்றிருக்கக் கூடிய வெற்றி என்பது சாதனைகளை அடித்தளமாகக் கொண்ட வெற்றி அல்ல. மாறாக, அறிவியல் நவீன கைபேசித் தொடர்பு மூலம் உருவாக்கிய மாயத் தோற்றத்தின் அடிப்படையில் உருவாக்கப்பட்ட வெற்றிதான் இந்த தமிழக வெற்றிக் கழகத்தின் வெற்றி!
இனிவரும் காலங்களில், மக்கள் குறிப்பாக திராவிட முன்னேற்றக் கழகம் சாதித்த சாதனைகளைவிட இந்த அரசிடமிருந்து எதிர்பார்ப்புகள் அதிகமாகவே இருக்கும் என்பதில் ஐயமில்லை. ஆனால், மக்களின் அந்த எதிர்பார்ப்புகளை தமிழ்நாட்டில் ஆட்சி அமைத்துள்ள தமிழக வெற்றிக் கழகம்சாதிக்க முடியுமா? என்பதும் மிகப்பெரிய கேள்விக்குறியாகும்.
இதற்கிடையில் வருங்கால சமுதாயத்தின் வார்படங்களாம் இளைஞர்களுக்கு ஒன்றை தெளிவுபடுத்துவது தங்களின் மூத்த சகோதரன் என்ற அடிப்படையில் எனது கடமை என்பதை உணர்ந்து தெரிவிக்க விரும்புகிறேன்.
இன்றைய இளைஞர்கள்தான் எதிர்கால சமுதாயம். எனவே, அத்தகைய இளைஞர்கள் முறையாகப் பயிற்றுவிக்கப்பட்டு, சமுதாயத்தின் ஒளிவிளக்காக உருவாக்கப்பட வேண்டும் என்பதில் தொடர்ந்து அக்கறையும் ஆர்வமும் கொண்ட இயக்கம்தான் திராவிட முன்னேற்றக் கழகம்.
பேரறிஞர் அண்ணாவின் கடிதங்கள் அனைத்தும் “தம்பிக்கு” என்றுதான் தொடங்கும். முத்தமிழறிஞர் கலைஞரின் கடிதங்கள் அனைத்தும் “உடன்பிறப்பே” என்றுதான் தொடங்கும், இன்றைய கழகத்தலைவர் தளபதியாரின் கடிதங்கள் அனைத்தும் “உங்களில் ஒருவன்” என்றுதான் தொடங்கும். இந்த முப்பெரும் தலைவர்களின் கடிதங்கள் குறிப்பாக இளைஞர்களுக்காக எழுதப்படுகிறது என்பதை உணர்த்துவதற்காகத்தான் இந்த முப்பெரும் தலைவர்களின் கடிதங்களில் “தம்பிக்கு” என்றும், “உடன்பிறப்பு” என்றும், “உங்களில்
ஒருவன்” என்றும் விளிக்கப்படுகிறது.
இதுமட்டுமல்ல, திராவிட முன்னேற்றக் கழகத்தின் சார்பாக இளைஞர்களுக்கு விழிப்புணர்வை உருவாக்கிட நடத்தப்பட்ட மேடைப்பேச்சுகள், கருத்தரங்குகள், பட்டிமன்றங்கள், நாடகங்கள் ஆகிய நிகழ்ச்சிகள் மூலம் பல்வேறு பொருள்கள் பற்றிய கருத்துக்களும், உலகளாவிய செய்திகளும், வரலாறுகளும் பல்வேறு கோணங்களில் எடுத்து வைக்கப்படும், விவாதிக்கப்படும். இந்த நிகழ்வுகளைக் கண்டுகளித்த அறிஞர் பெருமக்கள் திராவிட முன்னேற்றக் கழகத்தை
மாலை நேரத்துப் பல்கலைக்கழகம்
என்று விமர்சிப்பார்கள். இந்த அளவிற்கு இளைஞர்களின்பால் அக்கறை எடுத்துக்கொண்ட திராவிட முன்னேற்றக் கழகம் இனியும் உரிய கவனமும், அக்கறையும் எடுக்கத் தயங்காது, தொடர்ந்து எந்த நேரமும் தயாராகவே இருக்கும். வற்றாத ஜீவநதியும் வான்மழையும் முறைப்படுத்தப்படா விட்டால், கடல்நீரோடு, பயனின்றிக் கலந்துவிடும். ஆனால், வற்றாத ஜீவநதியையும் வான்மழையையும் அணைகள் மூலம் தடுத்து நிறுத்தி முறைப்படுத்திப் பயன்படுத்தினால் மனித குலத்திற்கு எத்தகையப் பயன்களை விளைவிக்கும் என்பதனை விளக்கத் தேவையில்லை என்றே கருதுகிறேன்.
ஏழை - பணக்காரன் என்ற வேறுபாட்டை தவிர்த்து ஏழையை வாழ்விக்க வேண்டும் என்ற உணர்வை இளைஞர் மத்தியில் உருவாக்க வேண்டும் என்பதற்காகவே பேரறிஞர் அண்ணாவால் முன்மொழியப்பட்ட “கருத்துப் பெட்டகம்தான்” “ஏழையின் சிரிப்பில் இறைவனைக் காண்போம்” என்பதாகும். மக்களாட்சியின் மாண்புகளை உணர்த்தும் முறையில் பேரறிஞர் அண்ணாவால் இளைஞர்களுக்காக தெரிவிக்கப்பட்ட சொல் ஓவியம்தான் “எதையும் தாங்கும் இதயம் வேண்டும்” என்பதாகும். “மாற்றான் தோட்டத்து மல்லிகைக்கும் மனமுண்டு” என்ற பொருள் பொதிந்த வாசகங்களாகும்!
இப்படி இளைஞர்களைப் பக்குவப்படுத்தி தமிழ் மண்ணையும், மக்களையும், தமிழ்மொழியையும் காப்பாற்றுவதற்காக வாளாகவும் கேடயமாகவும் பயன்பட்ட திராவிட முன்னேற்றக் கழகம் என்றும் இளைஞர்களின் பாசறைதான்.
ஆம்! தமிழக இளைஞர்களின் தாய்வீடும் - பாசறையும் திராவிட முன்னேற்றக் கழகம்தான் என்பதை உணர்வீர் - திராவிட முன்னேற்றக் கழகத்தின் பாசறை நோக்கி உங்கள்
பயணம் தொடரட்டும்!!