திருவள்ளூர், ஜூன் 17;–
திருவள்ளூர் மாவட்டம் புல்லரம்பாக்கம் காவல் நிலைய எல்லைக்குட்பட்ட பகுதியில் நடைபெற்ற வாகனச் சோதனையில் ரூ.1 லட்சம் மதிப்பிலான தமிழ்நாடு அரசால் தடை செய்யப்பட்ட புகையிலைப் பொருட்கள் பறிமுதல் செய்யப்பட்ட சம்பவம் மாவட்டம் முழுவதும் பெரும் பரபரப்பை ஏற்படுத்தியுள்ளது.
போலீசார் மேற்கொண்ட வாகனச் சோதனையின்போது, ஆந்திர மாநிலத்தில் இருந்து வந்த காரில் சுமார் 110 கிலோ எடையுள்ள ஹான்ஸ், கூல் லிப், விமல் உள்ளிட்ட தடை செய்யப்பட்ட புகையிலைப் பொருட்கள் பறிமுதல் செய்யப்பட்டதுடன், அவற்றை கடத்தி வந்த இருவரும் கைது செய்யப்பட்டனர். மேலும், கடத்தலுக்கு பயன்படுத்தப்பட்ட காரும் பறிமுதல் செய்யப்பட்டு விசாரணை நடைபெற்று வருகிறது.
இந்த சம்பவத்தைத் தொடர்ந்து, த.வெ.க. ஆட்சி பொறுப்பேற்ற பிறகு மாநிலத்தின் பல்வேறு பகுதிகளிலும் கஞ்சா, போதைப்பொருட்கள் மற்றும் அரசால் தடை செய்யப்பட்ட புகையிலைப் பொருட்களின் கடத்தல், பதுக்கல் மற்றும் விற்பனை சம்பவங்கள் தொடர்ச்சியாக வெளிச்சத்துக்கு வந்து கொண்டிருப்பதாக பொதுமக்கள் மற்றும் சமூக ஆர்வலர்கள் குற்றம்சாட்டுகின்றனர்.
கடந்த சில நாட்களாகவே திருவள்ளூர் மாவட்டத்தின் பல்வேறு பகுதிகளில் கஞ்சா பறிமுதல், போதைப்பொருள் விற்பனை, தடை செய்யப்பட்ட புகையிலைப் பொருட்கள் பறிமுதல் போன்ற சம்பவங்கள் தொடர்ந்து நடைபெற்று வருவது கவலையளிப்பதாகவும், இதனால் மாவட்டத்தில் சட்டம்–ஒழுங்கு மற்றும் கண்காணிப்பு நடவடிக்கைகள் எந்த அளவில் செயல்படுகின்றன என்ற கேள்வி எழுந்துள்ளதாகவும் அவர்கள் தெரிவிக்கின்றனர்.
குறிப்பாக, ஆந்திர மாநில எல்லையை ஒட்டியுள்ள பகுதிகள் வழியாக தடை செய்யப்பட்ட பொருட்கள் தமிழ்நாட்டிற்குள் எளிதாக நுழைந்து பல்வேறு மாவட்டங்களுக்கு கொண்டு செல்லப்படுவதாக கூறப்படுவது, எல்லை கண்காணிப்பு மற்றும் தடுப்பு நடவடிக்கைகளில் கூடுதல் கவனம் தேவைப்படுவதை வெளிப்படுத்துவதாக சமூக ஆர்வலர்கள் சுட்டிக்காட்டுகின்றனர்.
பள்ளிகள், கல்லூரிகள், தொழிற்பேட்டைகள் மற்றும் குடியிருப்பு பகுதிகளை குறிவைத்து போதைப்பொருட்கள் மற்றும் தடை செய்யப்பட்ட புகையிலைப் பொருட்கள் விற்பனை செய்யப்படுவதாக எழுந்துள்ள புகார்கள் பெற்றோர்களிடையே கடும் அச்சத்தை ஏற்படுத்தியுள்ளன. இளைஞர்கள் மற்றும் மாணவர்களின் எதிர்காலத்தை பாதுகாக்கும் வகையில் விரிவான தடுப்பு நடவடிக்கைகள் மேற்கொள்ளப்பட வேண்டும் என்றும் அவர்கள் வலியுறுத்துகின்றனர். “போதைப்பொருட்களை முழுமையாக ஒழிப்போம், இளைஞர்களை பாதுகாப்போம்” என்ற வாக்குறுதிகளுடன் ஆட்சிக்கு வந்த த.வெ.க. அரசின் காலகட்டத்தில், தொடர்ந்து இதுபோன்ற பறிமுதல் சம்பவங்கள் நடைபெறுவது அரசின் நிர்வாக திறன் மற்றும் சட்டம்–ஒழுங்கு பராமரிப்பு குறித்து கடுமையான சந்தேகங்களை எழுப்புவதாக எதிர்க்கட்சிகள் விமர்சனம் முன்வைக்கின்றன.
போதைப்பொருட்கள் மற்றும் தடை செய்யப்பட்ட புகையிலைப்பொருட்கள் தொடர்பாக பெரிய அளவிலான கடத்தல் வலையமைப்பு செயல்படுகிறதா, இதற்கு பின்னால் உள்ள முக்கிய நபர்கள் யார், மாநிலங்களுக்கு இடையேயான கும்பல்களுக்கு தொடர்பு உள்ளதா என்பதையும் முழுமையாக விசாரித்து, சம்பந்தப்பட்ட அனைவரையும் சட்டத்தின் முன் நிறுத்த வேண்டும் என்று பொதுமக்கள் மற்றும் சமூக ஆர்வலர்கள் வலியுறுத்தியுள்ளனர்.
தொடர்ச்சியாக வெளிவரும் இதுபோன்ற சம்பவங்கள், தமிழகத்தில் போதைப்பொருள் மற்றும் தடை செய்யப்பட்ட புகையிலைப் பொருட்களின் நடமாட்டத்தை முழுமையாக கட்டுப்படுத்துவதில் அரசு இன்னும் தீவிரமான, ஒருங்கிணைந்த நடவடிக்கைகளை மேற்கொள்ள வேண்டிய அவசியத்தை உணர்த்துவதாக பொதுமக்கள் கருத்து தெரிவித்து வருகின்றனர்.