அ
ரசியலில் நிலைப்பாடுகளோ கூட்டணிகளோ மாறுவது புதிதல்ல. ஆனால் அதற்கான குறைந்தபட்ச நியாயங்கள் ஏதும் இல்லாவிட்டால் அதைப் பச்சோந்தித்தனம் என்றோ ஆதாய அரசியல் என்றோதான் கூறமுடியும். இன்று த.வெ.க. கூட்டணியில் இருக்கும் கட்சிகளின் தலைவர்கள் ஒவ்வொரு நாளும் தி.மு.க.விற்கு எதிராக கூறிவரும் கருத்துக்கள் அறம் பிறழ்ந்த அரசியலின் வெளிப்பாடுகளாக இருக்கின்றன. காங்கிரஸ் தி.மு.க.விற்கு இழைத்த துரோகம் வெளிப்படையானது. தி.மு.க.வின் முதுகில் ஏறி சவாரி செய்து ஒரு நாடாளுமன்ற இடத்தையும் ஐந்து சட்டமன்ற இடங்களையும் பெற்றுக்கொண்டு அடுத்த நாளே த.வெ.க.விடம் மண்டியிட்டு இடம்பிடித்தார்கள். அதற்கான கண்டனத்தை இந்தியா கூட்டணி யிலிருக்கும் பல கட்சிகளிலிடமிருந்து ராகுல் காந்தி சந்தித்து வருகிறார். தி.மு.க.விற்கு காங்கிரஸ் இழைத்த துரோகம் ‘இந்தியா’ கூட்டணியை சிதைத்துக் கொண்டிருக்கிறது.
தமிழ்நாட்டில் இடதுசாரிகள் ‘இந்தியா’ கூட்டணியை உடைத்து த.வெ.க.விடம் போய் கூட்டணி வைக்கிறார்கள். ஆனால் அவர்கள் கேரளாவில் பினராயி விஜயனுக்கு எதிராக ராகுல் காந்திதான் அமலாக்கத்துறை சோதனையைத் தூண்டினார் என்று ‘இந்தியா’ கூட்டணி கூட்டத்தில் கொந்தளிக்கிறார்கள். அதாவது தமிழ்நாட்டில் த.வெ.க.- காங்கிரஸ் கூட்டணி மந்திரி சபைக்கு ஆதரவு, கேரளத்தில் எதிர்ப்பு.
ஆனால் சொல்லாமல் கொள்ளாமல் ஓடிப்போன காங்கிரஸைவிட சொல்லிவிட்டுப் போன கட்சிகளின் நடத்தைதான் கேலிக்கூத்தாக இருக்கிறது. தி.மு.க. தலைவர் அனுமதி அளித்தால்தான் த.வெ.க.விற்கு ஆதரவு அளிப்போம் என்றெல்லாம் பேசிய இந்திய யூனியன் முஸ்லீம் லீக்கின் இன்றைய கூட்டணி அமைச்சர் ஷாஜகான் அடுத்த ஐம்பது வருடத்திற்கு தி.மு.க. துடைத்து எறியப்படும் என்று பேசுகிறார். ஐம்பது வருடத்திற்கு மேலாக இந்திய யூனியன் முஸ்லீம் லீக்கை தாங்கிப்பிடித்து தமிழ்நாட்டில் அதனை ஒரு கட்சியாக உயிரோடு வைத்திருந்தது தி.மு.க. ஒவ்வொரு தேர்தலிலும் தி.மு.க. கூட்டணி உடன்படிக்கையை அறிவிக்கும்போது முதலில் இந்திய யூனியன் முஸ்லீம் லீக்குடன் செய்துகொள்ளப்பட்ட ஒப்பந்தம்தான் முதலில் அறிவிக்கப்படும். கலைஞர் காலத்திலிருந்து கடந்த சட்டமன்றத் தேர்தல்வரை இதுதான் வழக்கம்.
ஆனால் ’அந்த சோஃபாவில்’ அமர்ந்ததும் என்ன மாயமோ தெரியவில்லை அதன் மந்திரசக்தியால் நேற்றுவரை அவ்வளவு உற்ற நண்பர்களாக இருந்தவர்கள் மனம் பிறழ்ந்து நிலை தடுமாறி விதவிதமாய் பேசுகிறார்கள். ஒரு மாநிலத்தில் ஒரு மந்திரி பதவி இவ்வளவு மயக்கத்தை கொடுக்கும் என்றால் பாஜகவுடன் போய் கூட்டணி வைத்திருந்தால் மோடி தேசிய அளவிலான பதவி
களைக் கொடுத்திருப்பார்.
வி.சி.க. தலைவர் திருமாவளவன் ஒவ்வொரு நாளும்
கூட்டணி குறித்து கூறிவரும் கருத்துக்கள் குழப்பமானவை
மட்டுமல்ல அவர் ஏதோவொரு குற்றவுணர்வுக்கு ஆட்பட்டிருப்பது போல் தெரிகிறது. யாருடைய நிர்ப்பந்தத்தாலோ முரண்பட்ட கருத்துக்களை கூறிவருகிறார்.
சமீபத்தில் நிகழ்ச்சி ஒன்றில் பேசிய திருமாவளவன் பின்வரும் கருத்தை கூறினார். “த.வெ.க.வுக்கு நாங்கள் ஆதரவு அளிக்கும் விவகாரத்தில் திமுகவும் நெகிழ்வுத்தன்மையுடன் இருந்தது எங்களுக்கு அதிர்ச்சியாக இருந்தது. ‘நம் கூட்டணிக்கு ஆதரவானவர்கள்தான் த.வெ.க.வை எதிர்த்து வாக்களித்துள்ளனர். எனவே, த.வெ.க.வுக்கு வி.சி.க., இடதுசாரிகள் ஆதரவு தரக்கூடாது’ என தி.மு.க. கூறியிருக்க வேண்டும். ஆனால், தி.மு.க. அதை செய்யவில்லை.
‘ஏற்கெனவே இடதுசாரிகள் வெளியில் இருந்து ஆதரவு அளிப்பதாக அறிவித்துள்ளன. திருமாவளவனும் அதே முடிவை எடுப்பது எந்த நேரத்திலும் பிரச்சினைதான். திடீரென ஆதரவை அவர் திரும்பப் பெற்றால் என்ன செய்வது. ஆதரவு அளிப்பதாக கூறிக்கொண்டே தி.மு.க. கூட்டணியில் தொடர்வதாக அவர் பேசுகிறாரா’ என்றெல்லாம் தவெகவினர் கவலை கொண்டனர். த.வெ.க.வின் சந்தேகத்தை போக்கத்தான் ஆட்சி அமைக்க ஆதரவு கொடுத்தோம், அதற்கு பரிசாக த.வெ.க. அமைச்சரவையில் எங்களுக்கு இடம் தரப்பட்டது.
எந்த சூழ்நிலையில் தி.மு.க. கூட்டணிக் கட்சிகள்
த.வெ.க. அரசிற்கு ஆதரவளிப்பதை தி.மு.க. தலைவர் ஏற்றுக்கொண்டார் என்பது அனைவருக்கும் தெரியும். எந்தக் கட்சிக்கும் பெரும்பான்மை கிடைக்காத நிலையில் தமிழ்நாட்டில் கவர்னர் ஆட்சி வந்துவிடும், அது பா.ஜ.க.வின் நேரடி ஆட்சியாக அமைந்துவிடும் என்ற சூழல் நிலவியபோது அதிக இடங்களை பெற்றிருந்த த.ெவ.க. அரசிற்கு வெளியே இருந்து ஆதரவளிக்கும் முடிவிற்கு தி.மு.க. தலைவர் ஒப்புதல் அளித்தார். தி.மு.க. தலைவரின் சம்மதத்துடன் வெளியே நின்று ஆதரவளிப்பதாக சொல்லிவிட்டு போனவர்கள் ஒவ்வொருவராக த.வெ.க. மந்திரி சபையில் போய் அமர்ந்தது மட்டுமல்லாமல் தி.மு.க. கூட்டணியில் இருந்து வெளியேறும் முடிவையும் அறிவித்தார்கள். த.வெ.க. அரசை ஆதரித்தாலும் தி.மு.க. கூட்டணியில் தான் நீடிக்கிறோமென்று ஒரு நாள் சொல்லுவார்கள் மறுநாள் இப்போதுள்ள சூழலில் தி.மு.க. கூட்டணி யில் நீடிக்க முடியாது என்று கூறுவார்கள்.
திருமாவளவன் ஒருபடி மேலே போய் தாங்கள் அமைச்சரவையில் இடம்பெற்றுவிட்டதாலேயே தவெக கூட்டணியில் இருக்கிறோம் என்று பொருளல்ல என்கிறார். இவ்வளவையும் எந்தத் தயக்கமும் இன்றிச் செய்துவிட்டு தி.மு.க. தலைவர் த.வெ.க.விடம் நெகிழ்வுத் தன்மையுடன் இருந்தாராம், அது திருமாவளனுக்கு அதிர்ச்சி அளித்ததாம். யாரை சந்தோசப்படுத்த இந்த அவதூறு திருமா அவர்களே? இதையெல்லாம் பார்த்து அதிர்ச்சியடைய வேண்டியது தி.மு.க.வே தவிர திருமாவளவன் அல்ல.
த.வெ.க. அரசை வெளியே இருந்து ஆதரிக்கப் போனவர்கள் உள்ளே போய் உட்கார்ந்துகொண்டு தி.மு.க. தலைவர் எங்களை தடுத்திருக்க வேண்டுமென்று சொன்னால் என்ன வகையான நிலைப்பாடு இது ?
‘’த.வெ.க.வின் சந்தேகத்தை போக்கத்தான் ஆட்சி அமைக்க ஆதரவு கொடுத்தோம், அதற்கு பரிசாக த.வெ.க. அமைச்சரவையில் எங்களுக்கு இடம் தரப்பட்டது.’’ என்றால் இந்தக் கூட்டணி எத்தகைய பரஸ்பர நம்பிக்கையில் அமைந்திருக்கிறது? மந்திரி சபைக்குள் போனால்தான் தங்கள் கற்பை நிரூபிக்க முடியும் என்ற அவல நிலையில் விசிக இருந்ததா?
திருமாவளவன் தி.மு.க. தலைவர்பற்றி பதிவுசெய்யும்
இன்னொரு கூற்றையும் பாருங்கள். “தி.மு.க., - அ.தி.மு.க. இணைந்து ஆட்சியமைப்பது குறித்து ஒரு கருத்து நிலவுவதாக தி.மு.க. தலைவர் எங்களிடம் கூறினாரே தவிர,
தி.மு.க., - அ.தி.மு.க. இணைந்து ஆட்சியமைக்கலாம் என கூறவில்லை.’’
ஆனால் இதற்குமுன் ’தி.மு.க.,- அ.தி.மு.க. கூட்டணி பற்றி உங்களிடம் யாரும் பேசினார்களா என்று திருமாவிடம் கேட்டபோது ’தி.மு.க. தலைமையில் இருந்து அப்படி யாரும் பேசவில்லை. இரண்டாம் கட்டத் தலைவர்களிடையே அப்படி ஒரு பேச்சு அடிபடுவதாக கேள்விப்பட்டதாக’ கூறுகிறார். இரண்டில் எது உண்மை? ஏன் இத்தனை தடுமாற்றங்கள் ?
பொதுவாக அரசியல் தலைவர்கள் தனிப்பட்ட உரையாடல்களை மேற்கோள் காட்ட மாட்டார்கள். ஏனெனில் அதற்கு சான்றுகள் ஏதுமில்லை. அதோடு தனிப்பட்ட உரையாடலில் சொன்னதாக மனம்போன போக்கில் மாற்றி மாற்றி பேசிக்கொண்டே இருந்தால் நாளை எந்த தலைவரும் உரை
யாடவே அஞ்சுவார்கள். அது மிகப்பெரிய நம்பகத்தன்மை யின்மையை ஏற்படுத்தும்.
விஜய், பா.ஜ.க. கூட்டணியிலிருக்கும் அ.தி.மு.க.
ஆதரவை கோராமல் தி.மு.க. கூட்டணி கட்சிகளின் ஆதரவை கோரியதால் அவரது மதச்சார்பற்ற நிலையை ஆதரித்து தாங்கள் த.வெ.க.வை ஆதரித்ததாக திருமாவளவன் வியாக்கி யானம் கூறுகிறார். விஜய் மதச்சார்பற்ற கட்சிகளின்மேல் அவ்வளவு நம்பிக்கை கொண்டிருந்தால் எல்லா கட்சித் தலைவர்களையும் போய் பார்க்கும்போது அ.தி.மு.க.வின் பொதுச்செயலாளர் எடப்பாடி பழனிச்சாமியை தவிர்த்துவிட்டு அங்கே கலகம் செய்துவரும் எஸ்.பி.வேலுமணியை ஏன் போய் சந்தித்தார்? பா.ஜ.க. கூட்டணியி லிருந்து வென்ற அ.ம.மு.க. வேட்பாளரை ஏன் குதிரை பேரத்தில் வாங்கினார். வேலுமணி கோஷ்டி த.வெ.க. அரசிற்கு ஆதரவாக நம்பிக்கை வாக்கெடுப்பில் வாக்களித்ததும் நான்கு அ.தி.மு.க. சட்டமன்ற உறுப்பினர்கள் தங்கள் பதவியை ராஜினாமா செய்துவிட்டு த.வெ.க.வில் போய் இணைந்ததும் எந்த மதச்சார்பின்மையை வலுப்படுத்த ?
திருமாவளவன் அவர்கள் அதிகாரத்தில் பங்கேற்க விரும்புவதில் தவறில்லை. ஆனால் ஒரு மந்திரி சபை இடத்திற்காக த.வெ.க.விற்கு தகுதியற்ற சான்றிதழ்களை வழங்குவதும் வந்தே மாதரத்தில் தொடங்கி ஊரக வேலைவாய்ப்பு திட்டம் வரை ஒன்றிய அரசிடம் ஒடுங்கிப்போய் நிற்கும் த.வெ.க. அரசின் தோல்விகளுக்கு முட்டுக்கொடுப் பதும் பரிதாபகரமானது.
விடுதலைச் சிறுத்தைகள் கட்சி என்ற எல்லையைத்
தாண்டியும் அனைத்து தரப்பு மக்களின் மதிப்பை பெற்றவர் திருமாவளவன். ஆனால் இன்று த.வெ.க. தமது பாசிச கோர முகத்தை மறைக்க திருமாவளவனையும் இடதுசாரிகளையும் ஒரு முகமூடியாக பயன்படுத்திக் கொண்டிருக்கிறது. திருமாவளவனுக்கோ இடதுசாரி தலைவர்களுக்கோ தாங்கள் எதை இழந்து கொண்டிருக்கிறோம் என்பதைப்பற்றி எந்தக் கவலையும் இல்லை,
திருமாவளவன் அவர்கள் ’நாங்கள் எந்த நேரத்திலும் த.வெ.க. அமைச்சரவையில் இருந்து வெளியேறுவோம்
என்கிறார். திருத்திக் கொள்ளுங்கள் நீங்கள் எந்த நேரத்திலும் த.வெ.க. அமைச்சரவையில் இருந்து வெளியேற்றப்படலாம். உங்கள் கூற்று உங்கள் நிச்சயமின்மையையே வெளிப்படுத்துகிறது.