சென்னை, ஜூன் 18–
த.வெ.க. அரசின் சார்பில், நிதி அமைச்சர் – நேற்று மாலை, தமிழ்நாடு அரசின் நிதி நிலவரம் குறித்து “வெள்ளை அறிக்கை” எனும் பெயரில் அறிக்கை ஒன்றினை வெளியிட்டார்.
முந்தைய கழக அரசைப்
பழிதூற்றுவதையே நோக்கமாகக் கொண்டு சமர்ப்பிக்கப்பட்ட இவ்வறிக்கை குறித்து – முன்னாள் நிதி அமைச்சர் தங்கம் தென்னரசு, “த.வெ.க. அரசின் இயலாமையை மறைக்கவே இந்த ‘வெள்ளை அறிக்கை’ வெளியிடப்பட்டுள்ளது” என்றும் – “த.வெ.க.அரசு வெளியிட்டது, வெள்ளைஅறிக்கை அல்ல; வெற்று அறிக்கை!” என்றும் கண்டனம் தெரிவித்துள்ளார்.
மேலும் அவ்வலைதளப் பதிவில் தங்கம் தென்னரசு, “உரிய விளக்கங்களை விரைவில் விரிவாகக் கூறுகிறேன்” என்றும் குறிப்பிட்டுள்ளார்.
சென்னை – தலைமைச் செயலகத்தில், நேற்று முன்தினம் மாலை, த.வெ.க. அரசின் நிதி அமைச்சர் மரிய செல்வன்,“தமிழ்நாட்டின் நிதி மேலாண்மைகுறித்த வெள்ளை அறிக்கை”யினை வெளியிட்டார். நிதித்துறைச் செயலாளர் சித்திக் ஐ.ஏ.எஸ்.ஸும் அப்போது உடனிருந்தார்.
முந்தைய கழக அரசைக் குறைகூறும் நோக்கில் சமர்ப்பிக்கப்பட்ட அந்த அறிக்கைக்கு – கழக அரசின் நிதித்துறை அமைச்சராக இருந்த தங்கம் தென்னரசு எம்.எல்.ஏ., தமது கண்டனத்தைத் தெரிவித்து ‘எக்ஸ்’ வலைதளத்தில் பதிவொன்றினை வெளியிட்டுள்ளார்.
அப்பதிவு வருமாறு:–
தமிழ்நாட்டின் நிதிநிலை குறித்து ஏற்கனவே நிதிநிலை அறிக்கையில் தெளிவாக விளக்கிக் கூறப்பட்டிருக்கின்றது. ஆனால், “வாணவேடிக்கை வாக்குறுதிகளை” அள்ளித் தெளித்து மக்களை ஏமாற்றி பொறுப்பிற்கு வந்துள்ள இந்த அரசு, தனது நிர்வாகத் திறமையின்மையாலும், “ ஆழம் தெரியாமல் காலைவிட்டு” அளித்த வாக்குறுதிகளை நிறைவேற்ற முடியாத இயலாமையாலும் “புஸ்வாணமாக” மாறிவிட்டதை மறைக்க, “ஹைப்” ஏற்றிய அறிக்கை ஒன்றினை ‘வெள்ளை அறிக்கை’ என்ற பெயரில் வெளியிட்டு , அதனையும் “ஃப்ளாப்” ஆக்கியிருக்கிறது.
கொடுத்த வாக்குறுதிகளை நிறைவேற்றச் சொல்லி பொதுமக்கள் தெருவுக்கு வந்து போராடத் தொடங்கி விடுவார்களோ என அஞ்சி, அவர்களின் கோபக் கனலில் இருந்து தப்பித்துக் கொள்ளும் உத்தியாக (Escapism) தங்களின் இயலாமையை மறைக்கவே இந்த ‘வெள்ளை அறிக்கை வெளியீட்டு நாடகம்’ நடத்தப்பட்டு இருக்கின்றதே தவிர, வேறு எதற்குமல்ல!
எனினும், உரிய விளக்கங்களை விரைவில் விரிவாகக் கூறுகிறேன்.
இவ்வாறு அப்பதிவில் – தங்கம்தென்னரசு குறிப்பிட்டுள்ளார்.