#Title

புதுச்சேரி தேர்தலில் “ஃபிரண்ட்லி ஃபைட்” யார் ஆடியது என்று புதுச்சேரி மக்களுக்குத் தெரியும்! வைத்திலிங்கம் பேச்சுக்கு தி.மு.க. அமைப்பாளர் இரா. சிவா பதிலடி !

புதுவை, ஜூன் 18–

புதுச்சேரி மாநில தி.மு.க.அமைப் பாளர் இரா.சிவா வெளியிட்டுள்ள அறிக்கையில் கூறியிருப்ப தாவது:

புதுச்சேரி மாநில காங்கிரஸ் தலைவர் வைத்திலிங்கம் அவர்கள் இன்று செய்தியாளர்களிடம் தெரிவித்துள்ள கருத்துக்கள் அரசியல் உண்மைகளுக்கு முற்றிலும் முரணானவை. கூட்டணியின் தோல்விக் கான காரணங்களை சுய பரிசோதனை செய்யாமல், அதன் முழுப் பொறுப்பையும் திமுக மீது சுமத்த முயற்சிப்பது அரசியல் நேர்மைக்கு உகந்ததல்ல.

புதுச்சேரி சட்டமன்றத் தேர்தலுக்கு முன்பே, திமுகவிற்கு வெற்றி வாய்ப்பு அதிகமாக இருப்பதால் கூட்டணிக்கு திமுக தலைமை தாங்க வேண்டும் என்று விடுதலை சிறுத்தைகள் கட்சி, இந்திய கம்யூனிஸ்ட் கட்சி உள்ளிட்ட கூட்டணிக் கட்சிகள் வலியுறுத்தின. இருந்தபோதிலும், காங்கிரஸ் கட்சி தனது தலைமையில் கூட்டணி செயல்பட வேண்டும் என்று வலியுறுத்தியது.

கூட்டணி ஒற்றுமையை முன்னிறுத்திய திமுக, தனது அரசியல் வலிமை மற்றும் வளர்ச்சியைப் பொருட்படுத்தாமல் காங்கிரஸ் தலைமையை ஏற்றுக் கொண்டது. கடந்த தேர்தலில் போட்டியிட்ட அதே 13 தொகுதிகளில் போட்டியிட விருப்பம் தெரிவித்த போதிலும், காங்கிரஸ் தலைமையின் வற்புறுத்தலால் மண்ணாடிப்பட்டு தொகுதி காங்கிரசுக்கு ஒதுக்கப்பட்டு, அதற்கு பதிலாக கதிர்காமம் தொகுதி திமுகவிற்கு வழங்கப்பட்டது. கூட்டணியின் வெற்றிக்காக திமுக தொடர்ந்து விட்டுக் கொடுக்கும் மனப்பான்மையுடன் செயல்பட்டது. அதேபோன்று இந்தியா கூட்டணியில் இடம் பெற்றிருந்த, கூட்டணிக் கட்சிகளான விடுதலை சிறுத்தைகள் மற்றும் இந்திய கம்யூனிஸ்ட் கட்சிகளுக்கும் அவர்கள் கேட்ட தொகுதிகளை ஒதுக்கவில்லை. அவர்கள் போட்டியிட்ட தொகுதிகளிலும் காங்கிரஸ் சார்பில் நட்பு சண்டை என்று சொல்லக்கூடிய போட்டி வேட்பாளரை நிறுத்தினர். இதனால் இந்த கட்சிகள் நமக்கு தேர்தல் பணியாற்றிவில்லை என்பது கண்கூடு.

இதற்கிடையில், திமுக வேட்பாளர்கள் வெற்றி பெறக்கூடிய இடங்களில் “ப்ரண்ட்லி ஃபைட்” என்ற பெயரில் ஆறு தொகுதிகளில் காங்கிரஸ் சார்பில் மாற்று வேட்பாளர்கள் நிறுத்தப்பட்டனர். கூட்டணி ஒற்றுமையை பாதிக்கும் வகையிலான இந்த அணுகுமுறையையும் திமுக பொறுமையுடன் எதிர்கொண்டது. இருந்தபோதிலும், “ப்ரண்ட்லி ஃபைட்” ஆடிய ஆறு தொகுதிகளில் மூன்று தொகுதிகளில் திமுக வெற்றி பெற்றது. மொத்தத்தில் திமுக போட்டியிட்ட தொகுதிகளில் ஐந்து தொகுதிகளில் வெற்றி பெற்று தனது அரசியல் வலிமையை நிரூபித்தது.

இன்று வைத்திலிங்கம் அவர்கள் கூட்டணிக்கு திமுக தான் தலைமை தாங்கியது, திமுக எதிரியை சரியாக மதிப்பிடவில்லை என்று கூறுவது ஆச்சரியத்தை ஏற்படுத்துகிறது. தேர்தல் காலம் முழுவதும் கூட்டணியின் தலைமைப் பொறுப்பை காங்கிரசே ஏற்றதாக தொடர்ந்து வலியுறுத்தி, தேர்தல் வாக்குறுதி அளித்தவர்கள் இன்றோ அதற்கு மாறாக பேசுவது அரசியல்வசதி வாதத்தை மட்டுமே காட்டுகிறது.

கூட்டணியில் அதிக தொகுதிகளில் போட்டியிட வேண்டும் என்று வலியுறுத்திய காங்கிரஸ், 23 தொகுதிகளில் போட்டியிட்டது. ஆனால் தேர்தல் முடிவுகள் வெளியாகியபோது, 13 தொகுதிகளில் டெபாசிட் இழக்கும் அளவிற்கு மக்கள் ஆதரவை பெறத் தவறியது. இதன் உச்சகட்டமாக, தன்னை முதல்வர் வேட்பாளராக முன்னிறுத்திக் கொண்டு தட்டாஞ்சாவடி தொகுதியில் போட்டியிட்ட காங்கிரஸ் தலைவர் வைத்திலிங்கம் அவர்களே டெபாசிட் இழந்தார்.

மேலும், நீண்ட காலமாக தன்னுடைய அரசியல் செல்வாக்கு கொண்டதாக கருதப்படும் காமராஜ் நகர் தொகுதியில் போட்டியிடாமல், அந்தத் தொகுதியை எதிர் கட்சியான லட்சிய ஜனநாயக கட்சிக்கு விட்டுக்கொடுத்து தட்டாஞ்சாவடியில் போட்டியிட்டது ஏன்? என்ற கேள்வி அப்போது காங்கிரஸ் கட்சியினரிடமே எழுந்தது. தேர்தல் தோல்விக்குப் பிறகும், காங்கிரஸ் கட்சியின் படுதோல்விக்கு மாநில தலைவர் வைத்திலிங்கத்தின் தவறான அணுகுமுறையே காரணம் என்று கூறி, அவரது இல்லத்தை முற்றுகையிட்டு பல்வேறு கட்டப் போராட்டங்களில் அக்கட்சியினரே ஈடுபட்டனர் என்பது அனைவரும் அறிந்த உண்மை.

கூட்டணிக்கு தலைமை தாங்கியது யார்? அதிக தொகுதிகளில் போட்டியிட்டது யார்? தேர்தல் வியூ கங்களை வடிவமைத்தது யார்? என்பதற்கு புதுச்சேரி மக்களுக்கே பதில் தெரியும். அத்தகைய சூழலில், தேர்தல் தோல்விக்கான முழுப் பொறுப்பையும் திமுக மீது சுமத்தும் முயற்சி உண்மையை மறைக்கும் அரசியல் நாடகம்.

திமுக எப்போதும் கூட்டணி தர்மத்தையும், அரசியல் நாகரிகத்தையும் கடைபிடித்து வந்துள்ளது. தேர்தல் தோல்வி ஏற்பட்டால் அதன் காரணங்களை நேர்மையாக ஆராய்வதே ஜனநாயக அரசியலின் அடிப்படை. அதற்கு மாறாக கூட்டணிக் கட்சிகளை குறிவைத்து குற்றம்சாட்டுவது தோல்விக்கான காரணங்களை மறைக்கும் முயற்சியாகவே பார்க்கப்படும்.

எனவே, புதுச்சேரி அரசியலில்முதிர்ந்த அனுபவம் பெற்றுள்ள வைத்தி லிங்கம் அவர்கள் உண்மைகளைத் திரித்து பேசுவதை நிறுத்தி விட்டு, புதுச்சேரி மாநிலத்தில் காங்கிரஸ் கட்சி ஏன் மக்களின் நம்பிக்கையை இழந்தது என்பதை முதலில்சுயபரிசோதனை செய்ய வேண்டும். திமுக மீது ஆதாரமற்ற குற்றச்சாட்டு களை முன் வைப்பதன் மூலம் வரலாற்று உண்மைகளை மாற்ற முடியாது.

இவ்வாறு தெரிவித்துள்ளார்.