#Title

நெல்லை மாவட்டம் – கூடங்குளம் அனுமின் நிலையத்திற்கு நிலம் வழங்கியவர்களுக்கு விரைவில் பணி வழங்குக! விரைவில் போராட்டம் நடத்தப்படும் – மு. அப்பாவு கண்டனம்!

நெல்லை, ஜூன் 18–

நெல்லை மாவட்டம் கூடங்குளம் அணுமின் நிலையத்திற்கு நிலம் வழங்கியவர்களுக்கு விரைவில் பணி ஒதுக்கீடு செய்யாவிட்டால் போராட்ட நடத்தப்படும்.என முன்னாள் சட்டப்பேரவை தலைவர் மு.அப்பாவு தெரிவித்துள்ளார்.

இது தொடர்பாக அவர் வெளியிட்டுள்ள அறிக்கையில் தெரிவித்திருப்பதாவது.

1999 ஆண்டு ஒப்பந்தப்படி நெல்லை மாவட்ட ஆட்சியர்,அப்போதைய எம்.எல்.ஏ.வாகிய நானும், மும்பை இந்திய அணுமின் திட்ட பணிக்குழு இயக்குனர் அதன்ட்ரா ஆகியோரின் முத்தரப்பு பேச்சுவார்த்தையின் முடிவில் கூடங்குளம் அணு உலைக்கு நிலம் கொடுத்தவர்களுக்கும் மற்றும் அப்பகுதி மக்களுக்குமே சி மற்றும் டி பணியிடங்கள் வழங்க வேண்டும் என்றும்,அதற்கு தேர்வு முறை இல்லாமல் தகுதியின் அடிப்படையில் பணியமர்த்த வேண்டும் என்றும் ஒப்பந்தம் செய்யப்பட்டு 2011 ம் ஆண்டு வரை நடைமுறைப்படுத்தப்பட்டு வந்தது.

2011 ல் தமிழ்நாட்டில் அ.தி.மு.க.ஆட்சி அமைத்த பிறகு அம்முறை கைவிடப்பட்டு தேர்வு முறையில் தான் தேர்ந்தெடுக்கப் படுவார்கள் என்று கூடங்குளம் அணுமின் நிலைய நிர்வாகம் நடைமுறைப்படுத்த முயற்சி செய்தபோது நான் நீதிமன்றம் மூலமும், போராட்டங்கள் நடத்தியும் இதுவரை தடுத்து நிறுத்தப்பட்டது.ஆனால் தற்போது கூடங்குளத்தில் பல நூறுபடித்த இளைஞர்கள் மற்றும் இளம்பெண்கள் நிலம் கொடுத்த சான்றிதழ்கள் வைத்திருப்பவர்கள் கூடங்குளம்அணுமின் நிலைய நிர்வாகம் டி பணியிடத்திற்கு தேர்வு வைத்த போது தேர்வும் எழுதி தேர்ச்சியும் பெற்றுள்ளார் கள்.ஆனால் அவர்களுக்கு பணி மறுக்கப்பட்டு பிற மாநிலத்தவர்கள் தேர்ந்தெடுக்கப்பட்டிருப்பது கண்டனத்திற்குரியது.

மேலும் அணு உலைக்கு நிலம் கொடுத்த உள்ளூர் மக்களுக்கு வேலை வழங்க வேண்டும் என்றும் அமைதியான முறையில் போராடியவர்கள் தமிழ்நாடு காவல்துறை கைது செய்திருப்பது கண்டனத்திற்குரியது.தேர்வில் வெற்றி பெற்றவர்களுக்கு கூடங்குளம் அணுமின் நிலைய நிர்வாகம் உடனடியாக வேலை வாய்ப்பு வழங்க வேண்டும். அக்கோரிக்கையை முன்வைத்து போராடிய பொதுமக்களை தமிழக அரசு உடனடியாக விடுவிக்க வேண்டும். தவறும் பட்சத்தில் தி.மு.க.இக் கோரிக்கையை வலியுறுத்தி போராட வேண்டிய கட்டாயம் ஏற்படும்.

இவ்வாறு அவர் அறிக்கையில் தெரிவித்துள்ளார்