நாகர்கோவில், ஜூன் 18–
நாகர்கோவில் மாநகராட்சி அலுவலகத்தில் மாநகரப் பகதியில் நடைபெற்றும் வரும் பல்வேறு வளர்ச்சித் திட்டப்பணிகள் குறித்து ஆலோசனை கூட்டம் நேற்று நடந்தது. கூட்டத்திற்கு நாகர்கோவில் தொகுதி எம்எல்ஏ ஆஸ்டின் தலைமை வகித்தார். மேயர் (பொறுப்பு) மேரிபிரின்சி லதா, மாநகராட்சி ஆணையர் நிஷாந்த் கிருஷ்ணா ஆகியோர் முன்னிலை வகித்தனர். கூட்டத்தில் மண்டல தலைவர்கள் ஜவகர், அகஸ்டினா கோகிலவாணி, உதவி செயற்பொறியாளர் ரகுராமன், மாநகர் அமைப்பு அதிகாரி கெவின் ஜாய், மாநகர் நல அதிகாரி டாக்டர் சரோஜா உள்பட பலர் கலந்துகொண்டனர்.
கூட்டத்தில் மாநகர பகுதியில் தற்போது நடந்து வரும் மற்றும் புதிதாகத் தொடங்கப்பட உள்ள அரசு திட்டப்பணிகள் குறித்து விவாதிக்கப்
பட்டது. கூட்டத்தில் ஆஸ்டின் எம்எல்ஏ கூறியதாவது: நாகர்கோவில் மாநகராட்சிக்கு உட்பட்ட பகுதிகளில் தற்போது நாகர்கோவில் மாநகராட்சியில் புத்தன்அனை குடிநீர் திட்டப்பணி செயல்படுத்தப்பட்டுள்ளது. இதன் ஒரு பகுதியாக அம்ரூத் திட்டத்தின் வீட்டு இணைப்பு வழங்கப்பட்டு வருகிறது. இதனை இரண்டு மாதத்திற்கு முடித்து செயல்பாட்டிற்கு கொண்டு வரவேண்டும் என வலியுறுத்தப் பட்டது. பாதாளசாக்கடை திட்டப்பணி 2வது பேட்ஜ் அமைக்க திட்டமதிப்பீடு தயாரிக்கப்பட்டு அரசுக்கு அனுப்பப்பட்டுள்ளது.
விரைவில் அதற்கான அனுமதி பெறப்படும் என அறிவிக்கப்பட்டு பணிகள் தொடங்கப்படும் என கூறப்பட்டுள்ளது. மாநகர பகுதியில் 136 அங்கன்வாடி மையங்கள் செயல்பட்டு வருகிறது. இந்த மையங்களில் மேற்கொள்ளப்பட வேண்டிய பராமரிப்புப் பணிகள் குறித்தும், புதிதாக அங்கன்வாடி மையங்கள் தேவைப்படும் இ டங்களைக் கண்டறிந்து அங்கு புதிய மையங்களை அமைக்கவும் நடவடிக்கை எடுக்க அறிவுறுத்தப்பட்டுள்ளது. மாநகராட்சிப் பகுதியில் உள்ள 43 அரசுப் பள்ளிகளில் தேவைப்படும்பள்ளிகள் பராமரிப்பது, கூடுதல் கட்டிடம் அமைக்கவேண்டும். ஸ்மார்ட் கிளாஸ் வகுப்பறை இல்லாத நடுநிலைப்பள்ளிகளில் ஸ்மார்ட் கிளாஸ் அமைக்க நடவடிக்கை எடுக்க வேண்டும். மாநகர பகுதியில் 6 நகர்புற ஆரம்பசுகாதார நிலையங்கள் உள்ளன. மேலும் தேவைப்படும் இடங்களில் நகர்ப்புற ஆரம்பசுகாதார நிலையம் அமைக்கப்படவேண்டும். இதற்கான அனுமதியை நான் சட்டமன்றத்தில் பேசி வாங்கி கொடுக்க நடவடிக்கை எடுப்பேன். வலம்புரிவிளை குப்பை கிடங்களில் தேங்கி கிடக்கும் குப்பை பயோ மைனிங் முறையில் அகற்றப்பட்டு வருகிறது. மேலும் வேகப்படுத்த கூடதலாக ஒரு இடத்திலும் பயோ மைனிங் முறையை அமல்படுத்தவது குறித்து ஆலோசிக்கப்பட்டது. அப்படி புதிதாக வைக்கப்படும் பயோ மைனிங் இயந்திரம் மூலம் தினமும் வரும் குப்பைகளை அகற்ற வேண்டும் எனவும் ஆலோசிக்கப்பட்டது. வடசேரியில் புதிதாகப் பேருந்து நிலையம் அமைப்பதற்காக சுமார் ரூ.63 கோடி மதிப்பில் டெண்டர் விடப்பட்டுள்ளது.
இந்தத் திட்டத்தில் உள்ள சில தொழில்நுட்பக் குறைபாடுகளைக் களைந்து, பணிகளை விரைவாகத் தொடங்குமாறு அதிகாரிகளுக்கு அறிவுறுத்தப்பட்டுள்ளது. மாநகராட்சிக்கு உட்பட்ட 45 வார்டுகளிலும் பொதுமக்கள் எதிர்பார்க்கும் அனைத்து அடிப்படை வசதிகளையும் போர்க்கால அடிப்படையில் நிறைவேற்ற அதிகாரிகள் குழு முடுக்கிவிடப்பட்டுள்ளது.
இவ்வாறு அவர் கூறினார்.