திருவாரூர், ஜூன் 19 -–
தமிழ்நாடு மத்தியப் பல்கலைக்கழக தமிழ்த்துறை மற்றும் சோழமண்டல வரலாற்றுத் தேடல் குழு நடத்திய இராஜேந்திர சோழன் முடிசூட்டு விழா சிறப்பு கருத்தரங்கம் மத்திய பல்கலைக்கழக சோழா மைய நூலக கருத்தரங்கக் கூடத்தில் நடைபெற்றது.
திருவாரூரில் அமைந்துள்ள தமிழ்நாடு மத்தியப் பல்கலைக்கழக தமிழ்த் துறை கல்வெட்டியல் மற்றும் மரபு மேலாண்மை பட்டயப் படிப்பு மற்றும் சோழமண்டல வரலாற்றுத் தேடல் குழு இணைந்து ராஜேந்திர சோழனின் 1012 -ஆவது முடி சூட்டு விழாவை 5 ஆம் ஆண்டாக சிறப்பாக நடத்தியது. ஒவ்வொரு ஆண்டும் மத்திய பல்கலைக்கழக கருத்தரங்க கூடத்தில் தொல்லியல் அறிஞர்கள் சோழர் காலத்தில் சோழர்கள் செய்த சாதனை சாதனைகளை மாணவர்கள்,சோழர் வரலாற்று ஆர்வலர்களுக்கு கருத்துகளை பகிர்ந்து ராஜேந்திர சோழனின் சாதனையை எடுத்துரைப்பர், அதனைத் தொடர்ந்து திருவாரூர் தியாகராஜர் கோயிலில் உள்ள இராஜேந்திர சோழன் பரவை நங்கை சிலைக்கு மாலை அணிவித்து மரியாதை செய்வர்.
அந்நிகழ்வில், தமிழ்த்துறை உதவிப் பேராசிரியர் வெ.இரமேஷ்குமார் வரவேற்புரை ஆற்றினார்.
பல்கலைக்கழக பதிவாளர் பேராசிரியர் இரா.திருமுருகன் தலைமையுரை ஆற்றினார். பல்கலைக்கழக புல முதன்மையர், பேராசிரியர் ச. இரவி நோக்கவுரை ஆற்றினார். தமிழ்த் துறை த் தலைவர் க.இரமேஷ் வாழ்த்துரை வழங்கினார்.
சோழ மண்டல வரலாற்றுத் தேடல் குழு தலைவர், மருத்துவர் சா. உதயசங்கர் தலைமை- ஆய்வுரை நிகழ்த்தினார்.
“சோழர் காலச் செப்புப் பட்டயங்கள்’’ என்கிற தலைப்பில் சோழமண்டல வரலாற்றுத் தேடல் குழு பொருளார் ஆண்டவர் கனி, “நிலவியல்நோக்கில் கங்கைகொண்ட சோழபுரம்” என்கிற தலைப்பில் பேராசிரியர் முனைவர் ஜெ.ஆர்.சிவராம கிருஷ்ணன்,”
சோழர் கால சாதனைப் பெண்கள்” என்கிற தலைப்பில் சோழமண்டல வரலாற்றுத் தேடல் குழு துணைச் செயலாளர் செல்வி. டாஃப்னி, “வரலாற்றுச் சின்னங்களை பாதுகாத்தலும், பராமரித்தலும்’’ என்கிற தலைப்பில் சோழமண்டல வரலாற்றுத் தேடல் குழு துணைச் செயலாளர் கபிலன் ராமராஜன் ஆகியோர் சிறப்பு உரையாற்றினர். நிகழ்ச்சியில் சிறப்பு விருந்தினராக பங்கேற்ற கலைப் பண்பாட்டுத் துறை மண்டல உதவி இயக்குனர் ம. இராஜாராமன் மைய உரையாற்றி சிறப்பித்தார். பல்கலைக்கழக உதவிப் பேராசிரியர் முனைவர் ச.சுபாஷ் நன்றியுரை நிகழ்த்தினார். சேக்கிழார் நிகழ்வை தொகுத்து வழங்கினார்.
பள்ளி, கல்லூரி, மாணவர்கள், சோழர் வரலாற்று ஆர்வலர்கள் என பெருந்திரலானோர் பங்கேற்றனர்.