‘சென்னை, ஜூன் 19–
கழக அயலக அணித் தலைவர் டாக்டர் கலாநிதி
வீராசாமி எம்.பி. மணவிழாவில் கழக இளைஞர் அணிச் செயலாளரும் சட்டமன்ற எதிர்க்கட்சித் தலைவருமான உதயநிதி ஸ்டாலின் அவர்கள் ஆற்றிய உரை வருமாறு:
‘’கழகத் தலைவர் அவர்களின் தலைமையில் நடைபெறுகின்ற, ஐயா ஆர்க்காட்டார் அவர்களின் இல்லத் திருமண விழாவில், கலந்துகொண்டுள்ள உங்கள் அனைவரையும் வரவேற்பதில் மிகுந்த மகிழ்ச்சி அடைகின்றேன்.
கழகத்தின் உயர்நிலை செயல்திட்டக்குழு உறுப்பினரும் முன்னாள் அமைச்சருமான ஐயா ஆர்க்காடுவீராசாமி அவர்களின் பேரனும், வடசென்னை நாடாளுமன்றஉறுப்பினர் சகோதரர் டாக்டர் கலாநிதி வீராசாமி – டாக்டர் ஜெயந்தி கலாநிதி அவர்களின் மகனுமான சகோதரர் வி.கே.சித்தார்த்–அஷ்ரயா காயத்ரி இணையர்கள் இன்று திருமண வாழ்க்கையில் அடியெடுத்து வைக்கிறார்கள்.
வரவேற்கும் வாய்ப்பு
மணமக்களுக்கு உங்களின் அத்தனை பேர் சார்பாக. முதலில் என்னுடைய வாழ்த்துகளைத் தெரிவித்துக் கொள்கிறேன். இந்தத் திருமண விழா நிகழ்ச்சியில் கழகத்தின் இளைஞர் அணி செயலாளராகவோ,தமிழ்நாட்டின் எதிர்க்கட்சி தலைவராகவோ நான் பங்கேற்கவில்லை. ஐயா ஆற்காட்டார் அவர்களின் குடும்பத்தில் ஒருவனாகத்தான் உங்களையெல்லாம் வரவேற்கின்ற வாய்ப்பைப் பெற்றிருக்கிறேன்.
முத்தமிழறிஞர் கலைஞர் அவர்களுக்கும், ஐயா ஆற்காட்டார் அவர்களுக்கும் இருக்கக்கூடிய நட்பைப் பற்றி உங்கள் அனைவருக்கும் தெரியும். ஐயா ஆற்காட்டார் அவர்கள், கலைஞரின் நிழலாக வலம் வந்தவர். முத்தமிழறிஞர் கலைஞர் அவர்களுடன் அதிக நேரம் பேசக்கூடியவர், பழகுகின்ற வாய்ப்பைப் பெற்றவர். நாங்கள் எல்லாம் சின்ன வயதில் கோபாலபுரம் வீட்டில் இருக்கும் போது, தினமும் அவர்களைப் பார்ப்போம். காலை 8:00 மணிக்கு தலைவருடன் வந்து பேச ஆரம்பித்தார் என்றால், இரவு 10:00 மணி வரைக்கும் தலைவருடன் அனைத்து நிகழ்ச்சிகளிலும் பங்கு கொண்டவர்தான் ஐயா ஆற்காட்டார் அவர்கள்.
துணையாக இருந்தவர்
அது மட்டுமல்ல, நம்முடைய கழகத் தலைவர் அவர்கள் ஒரு வருட காலம் மிசாவில், சிறையில் இருந்தபோது, அவருக்கும் துணையாக இருந்தவர்தான் ஐயா ஆற்காட்டார் அவர்கள். இன்று எந்த கட்சி ஆட்சிக்கு வருகிறதோ, அந்தக் கட்சியின் கரை வேட்டியைக் கட்டிக்கொண்டு சுற்றுகின்ற ஆட்களையெல்லாம், நாம் அதிகமாக பார்த்துக்கொண்டிருக்கிறோம். அதிலேயும் இன்று தமிழ்நாட்டில் இந்த `சோபா மாடல் ஆட்சி’ வந்தபிறகு, அதை கொஞ்சம் அதிகமாகவே நாம் பார்த்துக் கொண்டு இருக்கிறோம்.
இந்த அரசு எதை கொள்முதல் செய்கிறதோ இல்லையோ, அடுத்த கட்சி ஆட்களையும், அடுத்த கட்சி சட்டமன்ற உறுப்பினர்களையும் தொடர்ச்சியாக இந்த அரசு கொள்முதல் செய்துகொண்டு வருகிறது. இப்படிப்பட்டவர்களுக்கு மத்தியில், இன்று ஒரே கொடி, ஒரே இயக்கம், ஒரே லட்சியம் என்று ஐயா ஆற்காட்டார் அவர்கள் இன்றைக்கும் பயணம் செய்து கொண்டிருக்கிறார். கொண்ட கொள்கையில் தடம் மாறாமல் பயணிக்கக் கூடிய இன்றைய தலைமுறைக்கு ஐயா ஆற்காட்டார் அவர்கள் ஒரு வழிகாட்டியாக செயல்பட்டு வருகிறார். அவர் வழியில் நம் நாடாளுமன்றஉறுப்பினர் சகோதரர் டாக்டர் கலாநிதி வீராசாமி அவர்களும்,இன்று கழகத்தின் குரலாக பாராளுமன்றத்தில் தொடர்ந்து எதிரொலித்துக் கொண்டிருக்கிறார்.
தயங்கியது கிடையாது
கலாநிதி வீராசாமி அவர்கள் வெளியே பார்ப்பதற்கு மிகவும் சாஃப்டாகத் தெரிவார். ஆனால், நாடாளுமன்றத்திற்குச் சென்றால், அங்கு பேச வேண்டிய கருத்துக்களை சரியான நேரத்தில் சரியாகப் பேசி தன்னுடைய கருத்துகளைப் பதிய வைப்பார். குறிப்பாக, தமிழ்நாட்டின் உரிமை சார்ந்த விஷயங்களைப் பேசுவதற்கு அவர் என்றைக்குமே தயங்கியது கிடையாது.
நம்முடைய திராவிட மாடல் ஆட்சி அமைந்தபோது நமக்கு வாக்களிக்காத மக்கள் எல்லாம் இந்த ஆட்சிக்கு வாக்களிக்காமல் தவறிவிட்டோமோ என்ற
எண்ணத்தோடு இருந்தார்கள். ஆனால், இன்று இந்த ‘சோபா மாடல் அரசு’ அமைந்த பிறகு,
‘இப்படிப்பட்ட ஒரு மோசமான
ஆட்சிக்கு நாம் ஓட்டு போட்டுவிட்டோமே’ என்று மக்கள் வருத்தப்பட ஆரம்பித்திருக்கிறார்கள்.
சோபா மாடல் ஆட்சி
இந்த சோபா மாடல் ஆட்சியை, மக்கள் வீட்டுக்கு அனுப்ப வேண்டிய நாள் வெகு தொலைவில் இல்லை. தலைவர் அவர்கள் தலைமையில் மீண்டும் நம் கழக ஆட்சி நிச்சயம் அமையும். தமிழ்நாடு மீண்டும் வளர்ச்சிப்பாதையில் நடைபோடும் என்று சொல்லி மணமக்களுக்கு உங்கள் அனைவரின் வாழ்த்துகளையும் தெரிவித்து நம் இல்ல திருமணத்தை நடத்தி வைக்க வருகை தந்திருக்கக்கூடிய கழகத் தலைவர் அவர்களை வருக வருக என வரவேற்கிறேன்.
மூத்த முன்னோடிகள்
வாழ்த்துரை வழங்க உள்ள கழகத்தின் பொருளாளர் டி.ஆர்.பாலு அவர்களையும், முதன்மைச் செயலாளர் அண்ணன் கே.என்.நேரு அவர்களையும், முன்னாள் முதலமைச்சர் ஓ.பி.எஸ். அவர்களையும், கழகத்தின் துணைப் பொதுச் செயலாளர்கள் ஆ.ராசா அவர்களையும், கனிமொழி
கருணாநிதி அவர்களையும், மாவட்டக் கழகச் செயலாளர்கள் எ.வ.வேலு அவர்களையும், மா.சுப்பிரமணியன் அவர்களையும், அன்பில் மகேஷ் பொய்யாமொழி அவர்களையும், மாதவரம் சுதர்சனம் அவர்களையும் வந்திருக்கக்கூடிய அனைத்து மாவட்டக் கழகச் செயலாளர்களையும், அனைத்து முன்னாள் இந்நாள் நாடாளுமன்ற சட்டமன்ற உறுப்பினர்களையும், கழகத்தின் அனைத்து நிர்வாகிகளையும், அனைத்து அணிகளின் நிர்வாகிகளையும், உள்ளாட்சி அமைப்புகளின் பிரதிநிதிகளையும், கழகத்தின் அனைத்து மூத்த முன்னோடி களையும், மணமக்களின் உற்றார் உறவினர்களையும், நண்பர்களையும், முத்தமிழறிஞர் கலைஞரின் உயிரினும் மேலான அன்பு உடன் பிறப்புகளான உங்கள் அத்தனை பேரையும் இந்த திருமண விழாவுக்கு வருக வருக என வரவேற்று அமர்கிறேன்.
இவ்வாறு கழக இளைஞர் அணிச் செயலாளரும் சட்டமன்ற எதிர்க்கட்சித் தலைவருமான
உதயநிதி ஸ்டாலின் மணவிழாவுக்கு வந்தவர்களை வரவேற்றுப் பேசினார்.