திருப்பூர், ஜூன் 19 –
பள்ளி மற்றும் கல்லூரிகளில் புதிய கல்வி ஆண்டு தொடங்கியுள்ள நிலையில், தங்களது பிள்ளைகளின் உயர் கல்விக்காக கடன் தேடும் நடுத்தர மற்றும் ஏழை, எளிய பெற்றோர்களை குறிவைத்து ஆன்லைன் மோசடி கும்பல் தீவிரமாக வலைவிரித்து வரு கிறது.
இன்ஸ்டாகிராம், பேஸ் புக், வாட்ஸ் அப் போன்ற முன்னணி சமூக வலைதள பக்கங்களில், சிபில் ஸ்கோர் தேவையில்லை, வெறும் 2 சதவீத வட்டி, 24 மணி நேரத்தில் ஒன்றிய அரசின் மானியத்துடன் கூடிய கல்விக்கடன் வழங்கப்படும் என அதிரடி விளம்பரங் களை இந்த கும்பல் அறிவிக்கிறது. தனியார் வங்கிகள் மற்றும் அரசு வங்கிகளில் கடன் கிடைக்காமல் அலைந்து திரியும் பெற்றோர்கள், இந்த கவர்ச்சிகரமான விளம்பரங்களை நம்பி அதில் உள்ள எண்களை தொடர்பு கொள்கின்றனர்.
அவ்வாறு தொடர்பு கொள்ளும் பெற்றோர்களை தங்களது சாதுரியமான பேச்சால் நம்ப வைக்கும் மோசடி கும்பல், உங்களுக்கு லோன் பாஸ் ஆகிவிட்டது எனக் கூறி, போலியாக தயாரிக்கப்பட்ட வங்கி ஒப்புதல் ஆவணங்களை வாட்ஸ் அப்பில் அனுப்பி வைக்கிறது. இதனை உண்மை என்று நம்பும் பெற்றோர்களிடம், ஆவண சரிபார்ப்பு கட்டணம், ஜிஎஸ்டி, இன்சூரன்ஸ் தொகை மற்றும் முத்திரைக்கட்டணம் என பல்வேறு காரணங்களைக் கூறி, கூகுள் பே அல்லது போன் பே மூலம் சில ஆயிரம் ரூபாய்களை முன் பணமாக பெற்றுக்கொண்டு, அதன் பிறகு மொபைல் போனை சுவிட்ச் ஆப் செய்து விட்டு ஏமாற்றிவிடுகின்றனர்.
மறுபுறம், பின்னலாடை நகரான திருப்பூரின் முக்கிய அங்கமாக விளங்கும் தொழிலாளர்களின் அவசர பணத்தேவைகளையும்,
வறுமையையும் முதலீடாகக் கொண்டு ஆன்லைன் லோன், ஆப் மோசடிகள் அசுர வேகத்தில் பெருகிவிட்டன. தங்களின் அன்றாட குடும்ப செலவுகள், மருத்துவ செலவுகள் மற்றும் அவசர தேவைகளுக்காக பணத்தை தேடும் தொழிலாளர்களை குறிவைத்து. உடனடி கடன் அல்லது ஆவணங்களோ இன்றி நிமிடங்களில் கடன், மானியத்தில் கடன் என பல்வேறு கவர்ச்சிகரமான விளம்பரங்களை சமூக வலைத் பரப்புகின்றனர். அவசர தேவைக்காக இந்த ஆன்லைன் செயலிகளை தொழிலாளர்கள் தங்களது மொபைல் போனில் பதிவிறக்கம் செய்யும் போது, அவர்களின் அறியாமையை பயன்படுத்தி மொபைலில் உள்ள போன் எண்கள் மற்றும் புகைப்பட கேலரி ஆகியவற்றுக்கான அனுமதியை இந்த செயலிகள் திருடி விடுகின்றன.
ஆரம்பத்தில் மிகக் குறைந்த தொகையைக் கடனாக வழங்கும் இந்த நிறுவனங்கள், அடுத்த சில நாட்களிலேயே கந்துவட்டியை விட மோசமான வட்டி மற்றும் அபராதங்களை விதிக்கின்றன. தொழிலாளர்கள் தாங்கள் வாங்கிய அசல் தொகையை விடப் பல மடங்கு தொகையை திருப்பி செலுத்திய பிறகும், கடன் தீரவில்லை என்று கூறி அவர்களின் மொபைலில் இருந்து திருடப்பட்ட புகைப்படங்களை ஆபாசமாக சித்தரித்து, அவர்சுளின் நண்பர்கள் மற்றும் உறவினர்களுக்கு அனுப்பி விடுவதாக மிரட்டுகின்ற னர். இந்த அவமானத்திற்கும், மிரட்டலுக்கும் பயந்து தொழிலாளர்கள் தங்களின் உழைப்புப் பணத்தை மொத்தமாக இழந்து தவிக்கின்றனர்.
இதுமட்டுமன்றி, வீட்டுச் செலவுகளுக்குத்துணையாக இருக்க வேண்டும், வீட்டிலிருந்தபடியே மொபைல்போன் மூலம் வருமானம் ஈட்டலாம் என நினைக்கும் நடுத்தர குடும்பத்து இல்லத்தரசிகள் மற்றும் இளம் பெண்களை குறிவைத்து பகுதி நேர வேலை என்ற பெயரில் நூதன மோசடியும் நகரில் அரங்கேறி வருகிறது. உங்களது மொபைல் போனில் வரும் விளம்பரங் களை பார்த்தால் போதும், அல்லது யூடியூப் வீடியோக்களுக்கு லைக் செய்து, கூகுள் மேப்ஸில் பிரபல நிறுவனங்களுக்கு ரேட்டிங் கொடுத்தால் போதும், தினமும் ரூ.5,000 வரை சம்பாதிக்கலாம் என டெலிகிராம் மற்றும் வாட்ஸ் அப் மூலம் ஆசை வார்த்தைகளைக் கூறுகின்றனர். இதனை நம்பி ஆரம்பத்தில் இணையும் பெண்களுக்கு. அவர்கள் செய்யும் சிறு வேலைகளுக்கு உடனுக்குடன் சில நூறு ரூபாய்களை லாபமாக அவர்களது வங்கிக் கணக்கில் செலுத்தி அசைக்க முடியாத நம்பிக்கையை ஏற்படுத்துகின்றனர். பெண்கள் இதனை முழுமையாக நம்பியவுடன். அடுத்த கட்ட டாஸ்க் என்று கூறி, அதிக லாபம் பெற வேண்டும்
என்றால் குறிப்பிட்ட தொகையை முதலீடு செய்ய வேண்டும் என வற்புறுத்துகின்றனர். இதனை நம்பி பெண்கள் தங்களது சேமிப்பு பணம் மற்றும் நகைகளை அடகு வைத்து நூறுகள் தொடங்கி பல்லாயிரக் கணக்கான ரூபாய் வரை ஆன்லைனில் முதலீடு செய்தவுடன், அந்த பணத்தை எடுக்க முடியாதவாறு அக்கவுண்ட் லாக் செய்துவிட்டு மொத்தமாக ஏமாற்றி விடுகின்றனர்.
தொழில் நகரான திருப்பூர் மாநகரில் நாளுக்கு நாள் அதிகரித்து வரும் இத்தகைய திட்டமிட்ட ஆன்லைன் மோசடிகளால், அப்பாவி பொதுமக்கள், ஏழை எளிய தொழிலாளர்கள் மற்றும் இல்லத்தரசிகள் என ஏராளமானோர் தங்களின் வாழ்நாள் உழைப்பையும், சேமிப்பையும் இழக்கும் அவலநிலை ஏற்பட்டுள்ளது. திருப்பூர் மாநகர சைபர் கிரைம் காவல் நிலையத்தில், கடந்த 12 நாட்களில் மட்டுமே இது போன்ற பல்வேறு சைபர் கிரைம் மோசடிகள் தொடர்பாக 167 வழக்குகள் பதிவு செய்யப்பட்டுள்ளது.