திருவள்ளூர், ஜூன் 19–-
திருவள்ளூர் மாவட்டம் மப்பேடு ஊராட்சிக்குட்பட்ட காந்திபேட்டை பகுதியில் கடந்த ஒரு மாதமாக நீடித்து வரும் குறைந்த மின்னழுத்தம் மற்றும் அடிக்கடி ஏற்படும் அறிவிக்கப்படாத மின்வெட்டால் பொதுமக்கள் கடும் அவதிக்குள்ளாகி வருகின்றனர். இதனைத் தொடர்ந்து ஆத்திரமடைந்த அப்பகுதி மக்கள் பூந்தமல்லி – அரக்கோணம் நெடுஞ்சாலையில் அமர்ந்து சுமார் 4 மணி நேரம் சாலை மறியல் போராட்டத்தில் ஈடுபட்டதால் அப்பகுதியில் பெரும் பரபரப்பு நிலவியது.
காந்திபேட்டை பகுதியில் சுமார் 600-க்கும் மேற்பட்ட குடியிருப்புகளில் 2,000-க்கும் அதிகமான மக்கள் வசித்து வருகின்றனர். கடந்த ஒரு மாதமாக அப்பகுதியில் மின்விநியோகம் மிகவும் சீர்குலைந்துள்ள தாகவும், பகல் மற்றும் இரவு நேரங்களில் அடிக்கடி மின்வெட்டு ஏற்படுவதால் பொதுமக்களின் இயல்பு வாழ்க்கை முற்றிலும் பாதிக்கப்பட்டுள்ளதாகவும் அவர்கள் தெரிவித்தனர்.
கைகுழந்தைகளை பராமரிக்கும் தாய்மார்கள், கர்ப்பிணிப் பெண்கள், முதியவர்கள் ஆகியோர் இரவு முழுவதும் தூக்கமின்றி கடும் சிரமத்திற்கு ஆளாகி வருவதாகவும், மின் மோட்டார்கள் இயங்காததால் குடிநீர் விநியோகம் பாதிக்கப்பட்டு அத்தியாவசிய தேவைகளுக்கே தண்ணீர் கிடைக்காமல் மக்கள் தவித்து வருவதாகவும் குற்றம்சாட்டினர்.
மேலும், பள்ளி மாணவர்கள் போதிய வெளிச்சமின்றி படிக்க முடியாமல் தவிப்பதாகவும், தேர்வு மற்றும் கல்வி பாதிக்கப்படும் நிலை ஏற்பட்டுள்ளதாகவும் பெற்றோர்கள் வேதனை தெரிவித்தனர்.மின்சார வாரிய அதிகாரிகளிடம் பலமுறை புகார் அளித்தும் நிரந்தர தீர்வு கிடைக்கவில்லை என்றும், புகார் தெரிவிக்கும் நபர்களின் தொலைபேசி எண்களையே தடை செய்து விடுகின்றனர் என்ற குற்றச் சாட்டையும் பொதுமக்கள் முன்வைத்தனர். அதே நேரத்தில், அப்பகுதியில் செயல்படும் தொழிற்சாலைகளுக்கு எந்தவித மின்தடையும் இன்றி 24 மணி நேரமும் சீரான மின்சாரம் வழங்கப்படுவதாகவும், ஆனால் குடியிருப்பு பகுதிகள் முற்றிலும் புறக்கணிக் கப்படுவதாகவும் மக்கள் வேதனையுடன் கூறினர்.
இந்தப் பிரச்சினை தொடர்பாக மாவட்ட ஆட்சியர் அலுவலகம், மின்வாரியம் மற்றும் ஊராட்சி நிர்வாகத்திற்கு பலமுறை மனுக்கள் அளிக்கப்பட்டும் எந்தவித நடவடிக்கையும் எடுக்கப்படவில்லை என பொதுமக்கள் குற்றம்சாட்டி னர்.
இதனால் ஆத்திரமடைந்த மக்கள் நேற்று இரவு பூந்தமல்லி – அரக்கோணம் நெடுஞ்சாலையில் அமர்ந்து திடீர் சாலை மறியல் போராட்டத்தில் ஈடுபட்டனர். இதன் காரணமாக இருபுறமும் நூற்றுக்கணக்கான வாகனங்கள் நீண்ட வரிசையில் நின்று போக்குவரத்து கடுமையாக பாதிக்கப்பட்டது.
இந்நிலையில், திருவள் ளூர் மாவட்டத்தின் பல்வேறு பகுதிகளிலும் கடந்த சில நாட்களாக அறிவிக்கப்படாத மின்வெட்டு, குறைந்த மின்னழுத்தம் போன்ற பிரச்சினைகள் தொடர்ந்து ஏற்பட்டு வருவதாக பொதுமக்கள் புகார் தெரிவித்து வருகின்றனர். இதனால் பல இடங்களில் சாலை மறியல், மின்வாரிய அலுவலக முற்றுகை உள்ளிட்ட போராட்டங்கள் தொடர்ந்து நடைபெற்று வருவது குறிப்பிடத்தக்கது.
இதுகுறித்து பொதுமக்கள் கடும் கண்டனம் தெரிவித்தனர் “த.வெ.க. ஆட்சியில் சட்டம்-ஒழுங்கு மட்டு மல்ல, மின்சாரம், குடிநீர் உள்ளிட்ட அடிப்படை சேவைகளும் கடுமையாக பாதிக்கப்பட்டுள்ளன. தொழிற்சாலைகளுக்கு தடையின்றி மின்சாரம் வழங்கப்பட்டாலும், பொதுமக்களின்
தேவைகள் புறக்கணிக்கப் படுகின்றன என்ற குற்றச்சாட்டுகள் கவலைக்குரியவை. மக்கள் பலமுறை புகார் அளித்தும் நடவடிக்கை எடுக்காததால், நெடுஞ்சாலையில் அமர்ந்து போராட வேண்டிய நிலைக்கு தள்ளப்பட்டுள்ளனர். இது நிர்வாகத் தோல்விக்கான வெளிப்படையான சான்று. பொதுமக்க ளின் அடிப்படை தேவைகளை கூட நிறைவேற்ற முடியாத ஆட்சிக்கு மக்கள் விரைவில் தக்க பதிலளிப்பார்கள்” என்று தெரிவித்துள்ளனர்.