திருப்பூர், ஜூன் 19–
திருப்பூர் காலேஜ் ரோடு பகுதியில் ரூ.3 கோடி மதிப்பீட்டில் கட்டப்பட்டுள்ள ஒருங்கிணைந்த தபால் நிலைய (ஆர்எம்எஸ் சேவைக்காக) கட்டிடம் பயன்பாட்டிற்கு வரும் முன்பே சேவையை நிறுத்த முடிவு இதனால் ஊழியர்களின் வாழ்வாதாரம் கேள்விக்குறியாக உள்ளது.
தொழில் நகரமான திருப்பூரில் இயங்கி வரும் ஆர்எம்எஸ் (ரயில்வே மெயில் சர்வீஸ்) சேவையை நிறுத்திவிட்டு அதனை கோயம்புத்தூர் அலுவலகத்துடன் இணைக்கும் அஞ்சல் துறையின் நடவடிக்கைக்கு ஊழியர்கள் எதிர்ப்பு தெரிவித்து வருகின்றனர்.
திருப்பூர் ஆர்எம்எஸ் அலுவலகம் மூலம் நாள் தோறும் சுமார் 1,500 பார்சல்கள் முன்பதிவு செய்யப்படுவதுடன், 2,500-க்கும் மேற்பட்ட பார்சல்கள் தரம் பிரிக்கப்பட்டு விரைவாக அனுப்பி வைக்கப்படுகின்றன. இதுதவிர, தினசரி 8,000 விரைவு தபால்கள் மற்றும் 26,000-க்கும் மேற்பட்ட சாதாரண தபால்களை பொதுமக்களுக்கு உரிய நேரத்தில் விநியோகிப்பதில் இந்த அலுவலகம் மிக முக்கிய பங்காற்றி வருகிறது. நடப்பு ஆண்டு ஜனவரி முதல் மே மாதம் வரை பார்சல் முன்பதிவு மூலம் மட்டுமே சுமார் 1 கோடியே 70 லட்சம் ரூபாய் வருவாய் ஈட்டப்பட்டுள்ளது. இவ்வளவு முக்கியத்துவம் வாய்ந்த அலுவலகத்தை மூடுவதால், அங்கு பணியாற்றும் 75க்கும் மேற்பட்ட நிரந்தர மற்றும் தற்காலிக ஊழியர்களின் வாழ்வாதாரம் கேள்விக்குறியாகும் சூழல் ஏற்பட்டுள்ளதாக ஊழியர்கள் தெரிவிக்கின்றனர்.
மேலும், திருப்பூரில் இருந்து பார்சல்களை கோவைக்கு கொண்டு சென்று அங்கிருந்து அனுப்புவது என்பது நடைமுறைக்கு சாத்தியமற்றது. இதனால், தபால்கள் விநியோகிப்பதில் பெரும்கால தாமதம் ஏற்பட்டு வருவாய் இழப்பு ஏற்படும். இந்த, விவகாரம் தொடர்பாக திருப்பூர் நாடாளுமன்ற உறுப்பினர் சுப்பரா யன் ஏற்கனவே ஒன்றிய தகவல் தொடர்புத்துறை அமைச்சருக்குக் கடிதம் எழுதியுள்ளார். திருப்பூரின் வளர்ந்து வரும் தேவையை கருத்தில் கொண்டு, கடந்த ஓராண்டுக்கு முன்பு 3 கோடி ரூபாய் நிதி ஒதுக்கீட்டில் கல்லூரி சாலையில் பிரம்மாண்டமான புதிய கட்டிடம் கட்டப்பட்டது. அந்த புதிய கட்டிடம் முழுமையான பயன்பாட்டிற்கு வரும் முன்பே ஆர்எம்எஸ் சேவையை மூடும் நடவடிக்கை எடுக்கப்பட்டுள்ளது குறிப்பிடத்தக்கது.