மதுராந்தகம், ஜூன்.20–
உத்திரமேரூர் அருகே தளவராம்பூண்டி ஊராட்சி ஒன்றிய தொடக்கப்பள்ளியில், மாணவர்கள் பாடம் படித்துக் கொண்டிருந்தபோது திடீரென உள்ளே நுழைந்த த.வெ.க. கட்சியினர் முதல்வர் விஜய்யின் படத்தை மாட்டி ரீல்ஸ் எடுத்ததால் பரபரப்பு ஏற்பட்டது.
காஞ்சிபுரம் மாவட்டம், உத்திரமேரூர் ஒன்றியம், தளவராம்பூண்டி ஊராட்சியில் வினோபா நகர் பகுதியில் ஊராட்சி ஒன்றிய தொடக்கப்பள்ளி செயல்பட்டு வருகிறது.
நேற்று முன்தினம் காலை 11 மணியளவில் த.வெ.க. கட்சியின் ஒன்றிய செயலாளர் ராஜேஷ் உள்ளிட்ட 10க்கும் மேற்பட்ட இளைஞர்கள் கட்சியின் சால்வையை அணிந்து பள்ளிக்கு வந்தனர். பள்ளி வகுப்பறையில் மாணவ, மாணவிகள் பாடம் படித்துக் கொண்டிருந்தபோது திடீரென உள்ளே நுழைந்து செல்போன்களுடன் ரீல்ஸ் எடுத்தனர். மேலும் கையில் வைத்திருந்த படத்தைக் காட்டி இவர் யார் என்று தெரிகிறதா என்று மாணவ, மாணவிகளுக்கு பாடம் எடுக்கத் தொடங்கினர்.
அதில் ஒருவர் மாணவர்களிடம் பேசுகையில், இது யார் என்று தெரிகிறதா, இவர்தான் தமிழ்நாடு முதலமைச்சர் விஜய், உங்களுக்கெல்லாம் மாமா, எனக்கு அண்ணா என்று பாடம் எடுத்துள்ளார். மேலும் வகுப்பறையில் முதல்வர் விஜய்யின் படத்தை மாட்டி ரீல்ஸ் எடுத்துள்ளனர். இதேபோன்று பட்டாங்குளம் கிராமங்களில் உள்ள அரசு பள்ளிகளுக்கும் சென்று முதல்வர் விஜய்யின் படத்தை பள்ளியின் வகுப்பறைகளில் மாட்டி ரீல்ஸ் எடுத்துள்ளனர்.
இந்த அநாகரிகமான செயலில் ஈடுபட்டதை கண்டிக்கும் விதமாக அப்பகுதியைச் சேர்ந்த ஒன்றியக் குழு உறுப்பினரும், தி.மு.க. ஒன்றிய செயலாளருமான ஞானசேகரன் மாவட்ட கலெக்டர், பள்ளிக்கல்வித் துறை அதிகாரி ஆகியோருக்கு ஒரு கடிதம் அனுப்பினார். அதில், த.வெ.க. கட்சி நிர்வாகிகள் பள்ளி நேரத்தில் சென்று வகுப்பறையில் முதல்வர் விஜய் படத்தை சுவரில் மாட்டி ரீல்ஸ் எடுத்ததை மாவட்ட நிர்வாகமும், கல்வி துறையும் இணைந்து விசாரணை நடத்த வேண்டும். இது போன்று அநாகரிக செயலில் ஈடுபட்டவர்கள் யார் என்று கண்டறிந்து அவர்கள் மீதும் நடவடிக்கை எடுக்க வேண்டும்.
உத்திரமேரூர் ஒன்றியத்தில் உள்ள பள்ளிகளில் இதுபோன்று தவறு நடைபெறாதவாறு பள்ளிக் கல்வித் துறை கண்காணிக்க வேண்டும் என்று தெரிவிக்கப்பட்டுள்ளது.