சென்னை, ஜூன் 21 –

தமிழ்நாடு சட்டமன்றத்தில் எதிர்க்கட்சித் தலைவர் உதயநிதி ஸ்டாலின் அவர்கள், மேகதாது அணை தொடர்பாக, முதல்வர் விஜய் முன்மொழிந்த தீர்மானம் மீதான விவாதத்தில் கலந்துகொண்டு பேசுகையில், ‘இத்தீர்மானத்தில், புதிய நடுவர் மன்றம் அமைக்க வேண்டும் என ஒன்றிய அரசை வலியுறுத்தும் வாசகத்தையும் சேர்த்துக் கொள்ள வேண்டும்’ என வேண்டுகோள் விடுத்தார்.

எதிர்க்கட்சித் தலைவர் அவர்கள் முன்மொழிந்த இந்தக் கருத்தை ஏற்று தமது உரையில் அறிவித்தார், முதல்வர் விஜய்!

சட்டப் பேரவையில் மேகதாது அணை தீர்மானம் தொடர்பான விவாதத்தில் எதிர்க்கட்சித் தலைவர் உதயநிதி ஸ்டாலின் அவர்கள் இதுகுறித்து குறிப்பிட்டதாவது:–

இந்த அரசு இங்கே கொண்டுவந்திருக்கின்ற இந்தத் தீர்மானத்தில் மேகதாது அணை கட்டுவது தொடர்பாக தமிழ்நாடு அரசு மார்ச் 4 ஆம் தேதி 2026 ஆம் ஆண்டு அன்றைக்கு எழுதிய கடிதத்தில் கேட்டுக் கொண்டபடி மாநிலங்களுக்கு இடையிலான நதிநீர் தாவா சட்டம் 1956 பிரிவு 4ன் கீழ் – அந்த அடிப்படையில் புதிய நடுவர் மன்றம் அமைக்க வேண்டும் என ஒன்றிய அரசை இப்பேரவை வலியுறுத்துகிறது என நான் முன்மொழிந்துள்ள அந்தத் திருத்தத்தையும் சேர்க்க வேண்டும் என்று உங்களை நான் கேட்டுக் கொள்கிறேன் என்று குறிப்பிட்டார்.

அதனை அடுத்து முதல்வர் பேசுகையில் “எதிர்க்கட்சித் தலைவர் ஒரு கருத்தை சேர்க்க வேண்டும் என்று கேட்டார். அவரது கோரிக்கையை ஏற்று இந்தத் தீர்மானத்தின் 4வது பத்திக்கு அடுத்து அதனை கூடுதலாகச் சேர்க்கலாம் என்றுதெரிவித்துக் கொள்கிறேன்” என்றார்.

இதனையடுத்து தீர்மானம் ஒருமனதாக நிறைவேறியது.