#Title

‘நீட்’ மறு தேர்வுக்கு தயாராகி வந்த 17 வயது மாணவர் தற்கொலை!

அகமதாபாத், ஜூன் 21 –

குஜராத் மாநிலம் அகமதாபாத்தில் நீட் மறுதேர்வுக்கு தயாராகி வந்த 17 வயது மாணவர் ஒருவர், தனது அடுக்குமாடி குடியிருப்பின் 6-வது மாடியில் இருந்து குதித்து தற்கொலை செய்துகொண்டார்.

மருத்துவப் படிப்புகளுக்கான நீட் தேர்வு கடந்த மே மாதம் 3-ம் தேதி நடைபெற்றது. எனினும், அந்த தேர்வில் நடைபெற்ற முறைகேடுகள் காரணமாக, அந்த தேர்வு ரத்து செய்யப்பட்டது.

தொடர்ந்து, நீட் மறுதேர்வு வரும் 21-ம் தேதி நடைபெறும் என அறிவிக்கப்பட்டுள்ளது.

இந்நிலையில், குஜராத் மாநிலம் அகமதாபாத்தில் நீட் மறுதேர்வுக்கு தயாராகி வந்த 17 வயது மாணவர் கஹான் பாட்டீல், தனது அடுக்குமாடி குடியிருப்பின் 6-வது மாடியில்இருந்து குதித்து தற்கொலைசெய்துகொண்டார்.

அதிகாலை 2.30 மணியளவில், பால்கனியில் இருந்த கம்பி வலையை அறுத்துவிட்டு, அங்கிருந்து மாணவர் குதித்தது விசாரணையில் தெரியவந்தது. இதற்கிடையே, நீட் தேர்வு அச்சத்தால், கோவையில் மாணவி அனு கீர்த்தனா விஷம் குடித்து தற்கொலை செய்து கொண்ட நிலையில், அடுத்த நாளே மீண்டும் ஒரு தற்கொலை சம்பவம் அரங்கேறியுள்ளது.

மேலும், நீட் மறு தேர்வு அறிவிப்பை தொடர்ந்து கடந்த ஒரு மாதத்தில் மட்டும் 12 பேர் தற்கொலை செய்து கொண்டது அதிர்ச்சியை ஏற்படுத்தியுள்ளது.

ராஜஸ்தான், உத்தரப்பிரதேசம், மத்தியப் பிரதேசம், உத்தரகாண்ட், கர்நாடகா, தமிழ்நாடு, குஜராத், கோவா மற்றும் டெல்லி ஆகிய மாநிலங்களில் கடந்த ஒரு மாதத்தில் மட்டும் நீட் தேர்வு அச்சம் காரணமாக 12 பேர் தற்கொலை செய்துகொண் டுள்ளனர்.