சென்னை, ஜூன் 21–
தமிழ்நாடு சட்டப்பேரவை நேற்று கூடியதும் மறைந்த உறுப்பினர்கள் சி.இராமசுவாமி, தா.வீராசாமி, சி.சுவாமிநாதன், அ.க.ஆறுமுகம், பெ.கண்ணன், அ.நாஞ்சில் முருகேசன் ஆகியோர் மறைவிற்கு இரங்கல் தெரிவிக்கப்பட்டது.
அதனைத் தொடர்ந்து இந்திய கம்யூனிஸ்ட் மூத்த தலைவர் தோழர் ஆர்.நல்லகண்ணு அவர்கள் மறைவிற்கு இரங்கல் தீர்மானம் நிறைவேற்றப்பட்டது.
இரங்கல் தீர்மானத்தில், சுதந்திரப் போராட்ட வீரரும், இந்தியக் கம்யூனிஸ்ட் கட்சியின் முதுபெரும் தலைவருமான தோழர் நல்ல கண்ணு அய்யா அவர்கள் 25.2.2026 அன்று மறைவுற்ற செய்தி அறிந்து இப்பேரவை அதிர்ச்சியும் ஆற்றொண்ணா துயரமும் கொள்கிறது.
தோழர் நல்லகண்ணு அய்யா அவர்கள் இளம் வயதிலேயே சுதந்திரப் போராட்டத்தில் ஈடுபட்டு சிறைவாசம் மேற்கொண்டவர். தமிழகத்தின் காந்தி என எல்லோராலும் போற்றப்படும் அய்யா நல்லகண்ணு அவர்கள் எளிமையிலும் நேர்மையிலும் முன்னாள் அமைச்சர் கக்கன் அவர்களைப் போல எளிமையோடு வாழ்ந்தார் என்று மக்களால் போற்றப்படுபவர்.
விவசாயப் பெருமக்கள், தொழிளார் மற்றும் விளிம்பு நிலை மக்கள் என அனைவரின் நலனுக்காக தமதுவாழ் நாள் முழுமையும் அர்ப்பணித்தவர். தமிழ்நாடு அரசால் வழங்கப்பெரும் உயரிய விருதான தகைசால் தமிழர் விருது பெற்ற பெருமைக்குரியவர்.
தமிழர் நலனிலும், தேசிய நலனிலும் தன் வாழ்நாள் முழுதும் தன்னை அர்பணித்துக் கொண்டு வாழ்ந்த பெருந்தகை அவர்கள்.
அன்னாரது மறைவால் அவரை இழந்து வாடும் அவர் தம் குடும்பத்தின ருக்கும் இந்திய கம்யூனிஸ்ட் கட்சியைச் சார்ந்த அனைவருக்கும் இப்பேரவை தனது ஆழ்ந்த இரங்கலையும் அனுதாபத்தையும் தெரிவித்துக் கொள்கிறது.
இதே போன்ற மறைந்த சட்டப்பேரவை முன்னாள் செயலாளர் சி.கு.இராமசாமி, பிரபல திரைப்படத் தயாரிப்பாளர்கள் ஆர்.பி.சௌத்ரி, கே.ராஜன், பிரபல திரைப்பட இயக்குநர் பாரதிராஜா ஆகியோர் மறைவிற்கும் பேரவையில் இரங்கல் தீர்மானம் நிறைவேற்றப்பட்டது.
மறைந்த இப்பெருந்தகைகளுக்கு மரியாதை செலுத்தும் வகையில் பேரவையில் உறுப்பினர்கள் அனைவரும் ஒரு நிமிடம் எழுந்து நின்று அமைதி காத்தனர்.