#Title

சட்டம் ஒழுங்கு சீர்கேடு – பொதுமக்கள் வீதியில் இறங்கிப் போராடுகிறார்கள்! எதிர்க்கட்சித் தலைவர் உதயநிதி ஸ்டாலின் – கட்சித் தலைவர்கள் உரையை நேரலையில் ஒளிபரப்ப வேண்டும்! சட்டப் பேரவை உறுப்பினர்களின் உரையை நேரலையில் ஒளிபரப்பாதது குறித்து முன்னாள் அமைச்சர் சா.சி.சிவசங்கர் பேட்டி!

சென்னை, ஜூன் 21–

சட்டப்பேரவையில் உறுப்பினர்களின் உரையை நேரலையாக ஒளிபரப்ப வேண்டும் என்றும்,ஆளுநர் உரை மீதான விவாதத்தில்எதிர்க்கட்சித் தலைவர் உதயநிதி ஸ்டாலின் மற்றும் கட்சித் தலைவர்கள் உரையை நேரலையில் ஒளிபரப்ப வேண்டும் என்று பேரவைக்கு வெளியே செய்தியாளர்களுக்கு பேட்டியளிக்கையில் முன்னாள் அமைச்சர் சா.சி.சிவசங்கர் குறிப்பிட்டார்.

முன்னாள் அமைச்சர் சா.சி. சிவசங்கர் செய்தியாளர்களுக்கு அளித்த பேட்டி வருமாறு :–

ஆளுநர் உரை மீதான விவாதத்தில் தி.மு.க.சார்பாக பேசுகின்ற வாய்ப்பை கழகத் தலைவர் மு.க.ஸ்டாலின் அவர்களும், எதிர்க்கட்சித் தலைவர் உதயநிதி ஸ்டாலின் அவர்களும் வழங்கி இன்றைக்கு சட்டமன்றத்தில் என்னுடைய கருத்தை பதிவு செய்தேன். அந்தக் கருத்துகள் நேரலையில் வரும் என்று நாங்கள் எதிர்பார்த்தோம். ஆனால் நேரலையில் வழங்கப்படாததன் காரணத்தினால் அந்தக் கருத்துகளை உங்களிடத்தில் பகிர்ந்து கொள்ளவே உங்களை சந்திக்கிறேன்.

மரபு மீறிய செயல்!

ஆளுநர் உரை மாத்திரமல்ல, அந்த உரை நிகழ்த்துகின்ற நேரத்தில் முன்னும் பின்னும் நடைபெற்ற சம்பவங்களையும், அது ஏற்படுத்தி இருக்கின்ற தாக்கத்தையும் குறித்து சட்டப்பேரவையில் நான் பதிவு செய்தேன். பேரவையில் ஆளுநர் உரைக்கு முன்பாக தமிழ்த்தாய் வாழ்த்துப் பாடுவதும், அவரது உரைக்கு பின்பாக தேசிய கீதம் பாடுவதும் ஒரு மரபாக தமிழ்நாட்டில் கடைப்பிடிக்கப்பட்டு வருவதை மீறி நேற்றைக்கு தேசிய கீதத்தை இரண்டு முறை பாட வேண்டிய அவசியம் என்ன என்ற வினாவை நான் எழுப்பினேன்.

அதற்கு நேற்றைக்கு எங்களுடைய எதிர்க்கட்சித் தலைவர் அவர்கள் குறிப்பிட்டதைப் போல த.வெ.க. விற்கும் பா.ஜ.க.விற்கும் ஒரு இணக்கமான உறவு இருக்கிறதோ என்ற அந்த அய்யம் தான் வலுப்பெற்று இருக்கிறது. காரணம் ஆளுநர் அவர்கள் நேற்றைக்கு நடந்த நிகழ்வை ஒரு சரித்திர நிகழ்வு என்று பதிவு செய்கிறார். ஆளுநர் உரை நிகழ்த்துவதற்கு ஒரு இணக்கமான முறையில் உரை நிகழ்த்திச் சென்று இருக்கிறார் என்று சட்டப்பேரவைத்தலைவர் நன்றி தெரிவிக்கிறார்.

இப்படி ஒருவருக்கொருவர் நன்றி தெரிவிப்பதும், பாராட்டிக் கொள்வதும் இதைத்தான்வெளிப்படுத்துகிறது என்கின்ற கருத்தைத் தான் நாங்கள் பதிவு செய்தோம். இது மக்களுக்குச் சென்று சேர வேண்டும் என்று எதிர்பார்த்தோம். நேரலையில் அதற்கான வாய்ப்பு வழங்கப்படவில்லை.

கழக ஆட்சியின் கருத்துகளை

வேறு வார்த்தைகளில் கூறுகிறார்கள்!

ஆளுநர் உரையில் இடம் பெற்றிருக்கின்ற கருத்துகள் ஏற்கனவே திராவிட முன்னேற்றக் கழக திராவிட மாடல் ஆட்சி நடைபெற்ற நேரத்தில் திராவிட முன்னேற்றக் கழகத்தின் கொள்கைகளாக பறைசாற்றப் பட்டவை. அது மும்மொழிக் கொள்கைக்கு எதிரானகருத்தாக இருந்தாலும், நீட் தேர்வுக்கு எதிர்ப்பாக இருந்தாலும் மீனவர் நலன்களை பாதுகாப்பதாக இருந்தாலும் எல்லாவற்றிலும் திராவிட முன்னேற்றக் கழக கருத்துகளையே அவர்கள் மீண்டும் இங்கே வேறு வார்த்தைகளைப்போட்டு வேறு வண்ணம் பூசி வெளிப்படுத்தியிருக்கிறார்கள்.

அவர்கள் புதிதாக சொன்னது என்றால் சிங்கப் பெண் மாத்திரம் தான். அதுவும் ஏற்கனவே இருக்கின்ற காவல் துறையில் பணியாற்றுகின்றவர்களுக்கு வேறு ஒரு சீருடையை அணிவித்து அது ஏதோ புதிய திட்டம் போல சொல்கிறார்கள் என்ற கருத்தையெல்லாம் பதிவு செய்தோம். அதற்குப் பதிலளித்த அமைச்சர் பெருமக்கள் மழுப்பலாக திசைதிருப்பு கின்ற வகையில் தான் பதிலளித்தார்கள். திங்கட்கிழமை அன்றைக்கு எங்களுடைய எதிர்க்கட்சித் தலைவர் அவர்கள் உரையாற்றஇருக்கிறார். அப்படி உரையாற்றுகின்ற போது, அவர் உரையாற்றுவதை நேரலை செய்யவேண்டும். காரணம் இந்த ஆட்சி மீது நம்பிக்கை தீர்மானம் கொண்டு வருகின்ற போது அதிலே உரையாற்றிய அனைவருடைய உரையும் நேரலையில் சென்று சேர்ந்தது.

எதிர்க்கட்சித் தலைவரின்

கேள்விகள் நியாயமானவை!

அப்படி சென்று சேர்ந்த நேரத்தில் எதிர்க்கட்சித் தலைவர் உரை நேரலையில் சென்று ஒரு மிகப் பெரிய தாக்கத்தை ஏற்படுத்தி இருக்கிறது. அவர் எழுப்பிய கேள்விகள் எல்லாம் நியாயமானவை தங்கள் மனதில் இருப்பதை என்று தமிழ்நாட்டு மக்கள் எண்ணுகின்ற அளவிற்கு அமைந்திருக்கிறது. ஆனால் அதற்கு முதலமைச்சர் அவர்கள் பதிலளிக்காமல் அமைதியாக இருந்தார். வீட்டிற்குப் போய் ஒர்க்கவுட் செய்து மாலை ட்விட்டரில் அதற்குப் பதில் அளித்தார்.

நேரலையில் ஒளிபரப்ப வேண்டும்!

அங்கே சட்டமன்றத்தில் கேட்கின்ற கேள்விகளுக்கு அவர் பதிலளிக்காமல் இருக்கின்ற காட்சியை மக்கள் பார்த்து விட்டார்கள் என்ற காரணத்தினால் தான் இன்றைக்கு நேரலை செய்யாமல் தவிர்த்து விட்டார்களோ என்ற சந்தேகம் எங்களுக்கு எழுந்திருக்கிறது. எனவே சட்டப்பேரவை எதிர்க்கட்சித் தலைவர் மரியாதைக்குரிய உதயநிதி ஸ்டாலின் அவர்கள் உரையாற்றுகின்ற நேரத்திலும், மற்ற சட்டமன்றக் கட்சித் தலைவர்கள் உரையாற்றுகின்ற நேரத்திலும் அவற்றை நேரலையில் ஒளிபரப்ப வேண்டும் என்கின்ற அந்தக் கருத்தை இந்த நேரத்தில் நான் வலியுறுத்துகிறேன்.

இதனைத் தொடர்ந்து செய்தியாளர்கள் கேட்ட கேள்விகளுக்குஅளித்த பதில்கள் வருமாறு:–

நாங்கள் முதலில் கேள்வி–பதில் பகுதியை நேரலையில் ஒளிபரப்பி வந்தோம். அதையெல்லாம் செய்யவில்லை என்று சொல்லி தான் ஒரு மாற்றம் வேண்டும் என்று சொல்லி தான் ஆட்சிக்கு வந்திருக்கிறார்கள். சொன்ன மாற்றத்தை அவர்கள் செயல்படுத்தவில்லை என்பதுதான் எங்களுடைய கருத்து.

இந்த ஆட்சி அமைந்ததும், புதுசு புதுசு என்று பேசுகிறீர்கள், எங்கள் கழகத் தலைவர் ஆறுமாதம் அவகாசம் கொடுத்தார். அது எதற்கு என்றால் புதிய திட்டங்களை நீங்கள் அறிவித்த திட்டங்களை செயல்படுத்து வதற்கு புதிய கொள்கையை வழி வகுப்பதற்கு.

சட்டம் ஒழுங்குப் பிரச்சினைக்கு

வாய் திறக்காத முதல்வர்!

ஆனால் நடைமுறையில் அன்றாடம் சட்டம் ஒழுங்கு பிரச்சினையை சரி செய்வதற்கும், மிகக் குறிப்பாக மக்கள் இன்றைக்குப் பாலியல் பிரச்சினைக்குஎதிராக இன்றைக்கு வெகுண்டெழுந்திருக்கிறார்கள். அது கோவையில் நடந்ததாக இருந்தாலும், கும்மிடிப்பூண்டியில் நடந்ததாக இருந்தாலும், சிறு குழந்தைகள் பாதிக்கப்பட்டிருக்கிறார்கள், அதை எதிர்த்து எதிர்க்கட்சிகள் நாங்கள் களத்திற்கு வருவதற்கு முன்பாக, எல்லா இடங்களிலும் மக்கள் போராட்டம் நடத்திக் கொண்டிருக்கிறார்கள். எனவே அதற்கு வாய் திறக்க வேண்டும் என்பதற்காகத்தான் நாங்கள் வலியுறுத்தினோம்.

இன்றைக்கும் முதலமைச்சர் அவர்கள் பதில் சொல்லவில்லை. காவல்துறைக்கு பொறுப்பான அமைச்சர் அவர். ஆனால் அவர் பதில் சொல்லாமல், காவல் துறைக்கு நிழல் அமைச்சர் போல் ஆதவ் அர்ஜூனா பதில் சொல்லிக் கொண்டிருக்கிறார். எனவே முதலமைச்சர் இதற்கெல்லாம் பதில் சொல்ல வேண்டும் என்பதுதான் எதிர்க்கட்சிகள் என்ற முறையில் மக்களுடைய குரலாக இன்றைக்கு நாங்கள் இங்கே பதிவு செய்துகொண்டிருக்கிறோம்.

நாங்கள் புதிதாக ஆட்சி அமைத்திருக்கிறோம், புதியதாக வந்திருக்கிறோம் கேள்வி பதில், ஜீரோ அவர்ஸ் எல்லாம் அடுத்த கூட்டத் தொடரில் பார்த்துக் கொள்ளலாம் என்று அலுவல் ஆய்வுக் குழுவில் அவர்கள் கூறினார்கள். அவர்கள் கோரிக்கையை நாங்கள் ஏற்றுக் கொண்டோம்.

முதல்வரை கேள்வி கேட்டால்

ஆதவ் பதில் கூறுகிறார்!

ஏற்கனவே இருக்கின்ற காவல் துறைதான் இவை எல்லாம் செய்துக்கிட்டு இருக்கு. நீங்கள் புதியதாக என்ன செய்தீர்கள் என்று ஆஸ்டீன் கேட்டார். அதற்கு முதலமைச்சர் பதில் சொல்லவில்லை என்றுதான் ஆஸ்டின் சொன்னார். அதற்கு பதில் சொல்லாமல் திசை திருப்புகின்ற வகையில் கொளத்தூரையெல்லாம் இழுத்துப் பேசினார் ஆதவ் அர்ஜூனா. நாங்கள் எங்கள் எதிர்ப்பை காண்பித்தோம்.

பாலியல் பிரச்சினைகளை

6 மாதம் கழித்து பேசமுடியுமா?

நீண்ட திட்டங்களுக்கு, சட்டம் ஒழுங்கு அன்றாடம் பாதுகாக்க காவல்துறை இருக்கு, அந்தக் காவல் துறைக்குத் தலைவராக முதலமைச்சர் இருக்கிறார். இதனை உடனடியாக செய்ய வேண்டும். இன்றைக்கு ஒரு உயிர் போய்இருக்கு, அதனை 6 மாதம் கழித்து திருப்பிக் கொடுக்க முடியுமா? ஒரு சிறுமிக்கு மிகப் பெரிய கொடூரம் நடந்திருக்கு 6 மாதம் கழித்து பேச முடியுமா? இது அன்றாடம் பேச வேண்டியது. நாங்கள் பேசியது இல்லை. பொதுமக்கள் பேசுகிறார்கள். பொதுமக்கள் வீதியில் இறங்கி போராடிக் கொண்டிருக்கிறார்கள். நீங்களே பார்க்கிறீர்கள். பொதுமக்களுக்கு அவர்கள் பதில் சொல்ல வேண்டும். அவர்கள் பொதுமக்களையும் மதிப்பதாக இல்லை.

இவ்வாறு முன்னாள் அமைச்சர் சா.சி.சிவசங்கர் பேட்டியளித்தார்.