புதுடெலி, ஜூன் 22–
ஆர்.எஸ்.எஸ்.-உடன் தொடர்புடைய அமைப்புகளின் தூண்டுதல்களால், பாஜக ஆளும் மாநிலங்களில் உள்ள பல்கலைக்கழகங்கள், தங்களது மதிப்பெண் சான்றிதழ்கள் மற்றும் பட்டப் படிப்புகளுக்கான சான்றிதழ்களில், இந்தியா என்ற சொலுக்கு மாற்றாக பாரத் என்ற சொல்லை பயன்படுத்தத் தொடங்கி உள்ளன.
இந்தியா என்ற பெயரை அகற்றிவிட்டு, அதற்கு மாற்றாக பாரத் என்ற சொல்லை மட்டுமே நாட்டிற்கான அதிகாரப்பூர்வ பெயராகப் பயன்படுத்த வேண்டும் என ஆர்.எஸ்.எஸ். தீவிர முயற்சிகளை மேற்கொண்டு வருகிறது.
இந்நிலையில், மத்தியப் பிரதேச மாநிலம் இந்தூரில் உள்ள தேவி அகில்யா விஸ்வவித்யாலயா பல்கலைக்கழகம், சிந்த்வாராவில் உள்ள ராஜா சங்கர் ஷா பல்கலைக்கழகம், சத்தீஸ்கர் மாநிலம் பிலாஸ்பூரில் அமைந்துள்ள அடல் பிஹாரி வாஜ்பாய் விஸ்வ வித்யாலயா மற்றும் குரு காசிதாஸ் விஸ்வ வித்யாலயா மத்தியப் பல்கலைக்கழகம், உத்தரப் பிரதேச மாநிலத்தின் பிரயாக்ராஜ் நகரில் உள்ள பேராசிரியர் ராஜேந்திர சிங் பல்கலைக்கழகம், உள்ளிட்ட பா.ஜ.க. ஆளும் மாநிலங்களில் உள்ள பல பல்கலைக்கழகங்கள், தங்களது மதிப்பெண் சான்றிதழ்கள் மற்றும் பட்டப் படிப்புகளுக்கான சான்றிதழ்களில்,இந்தியா என்ற சொலுக்கு மாற்றாக பாரத் என்ற சொல்லை பயன்படுத்தத் தொடங்கி உள்ளன.
தேசிய உணர்வையும், பாரம்பரிய அறிவு முறைகளையும் வளர்க்க இந்த நடவடிக்கை எடுக்கப்பட்டுள்ளதாக கூறும் பல்கலைக்கழ கங்கள் தேசியக் கல்விக் கொள்கையை திணிக்கும் வகையில் செயல்படுகின்றன.
இந்நிலையில், மத்தியப் பிரதேச மாநிலம் ஜபல்பூரில் உள்ள ராணி துர்காவதி பல்கலைக்கழகத்தின் பட்டமளிப்பு விழாவில் குடியரசுத் தலைவர் திரௌபதி முர்மு, இன்றையதினம் கலந்து கொள்ளவுள்ளார்.
இந்த பட்டமளிப்பு விழாவில் வழங்கப்படும் அனைத்துப் பட்டங்களிலும் ‘இந்தியா’ என்பதற்குப் பதிலாக ‘பாரத்’ என்ற பெயர் இடம் பெறும் என அறிவிக்கப்பட்டுள்ளது.