‘ உ ப்பே சாரமற்றுப் போனால் உப்புக்குச் சாரமேற்றுவார் யார்?’– என்பது பைபிள் மொழி. விஜய் ஆட்சி ஆட்சித்திறமற்று சாரமற்றுக் கிடக்கிறது. சாரமேற்ற முயன்றாலோ தேரான் தெளிவாய் அரசியலில் மழலை மொழிப் பேசுகிறது. முதல் கூட்டத் தொடரிலேயே பெரும்பாலான அமைச்சர்கள் வரவில்லை. முதல்வர் இருந்தும் அவர் சம்பந்தப்பட்ட கேள்விக்களுக்கு அவரால் பதில் அளிக்க முடிய வில்லை.

தேர்தல் சூறைக்காற்று சரிபாதி தமிழ்நாட்டைப் புழுதி மேடாக்கியது. எங்கெங்கோ பறந்து கொண்டு இருந்தவை கோபுரகலசத்தில் ஒட்டிக் கொண்டுவிட்டன. இன்னொரு சூறை அடிக்கிறபோது ஒட்டிக் கொண்டவை புழுதி மேட்டிற்கு வந்துவிடும். ஆயிரம் அடைக்கலான் குஞ்சிகளைவிட ஒரு குருவி விசேஷமானது என்று கூட நினைக்க முடியவில்லை. ‘இங்குபேட்டர்’ குழந்தையை போஷாக்கு ஆக் கலாம் என்று பார்த்தால் சபையிலே கோஷங்கள் அதிகமாகின்றன.

கடந்த ஜூன் 19 ஆம் தேதி சட்டமன்றத்தில் நடந்த ஒரு நிகழ்ச்சியை நாளேடுகளில் வந்துள்ள படி கீழே தருகின்றோம், படித்துப்பாருங்கள்.

ஆஸ்டின் (தி.மு.க.–நாகர்கோவில்) தமிழகத்தில் சிறு குழந்தைகள், பெண்கள் பாலியல் கொடுமை களுக்கு உள்ளாக்கப்பட்டாலும் சரி, வேறு எந்த அசம்பாவிதம் நடந்தாலும் சரி; வாய் திறந்து எதையும் பேசப் போவதில்லை என முதல்வர் இருக்கிறார்.

அமைச்சர் ஆதவ் அர்ஜூனா: தவறான தகவலை உறுப்பினர் தெரிவிக்கிறார். தி.மு.க. ஆட்சியின் போது தூத்துக்குடியில் 4 மாதங்களுக்கு முன்பாக பள்ளி மாணவி ஒருவர் கடத்தப்பட்டு பாலியல் வன்கொடுமைக்கு உள்ளாக்கப்பட்டு கொலை செய்யப்பட்டார். இது தொடர்பாக புகாரளித்து 36 மணி நேரமாகியும் அதுகுறித்து காவல் துறை வழக்குப் பதிவு செய்யவில்லை.

அப்போதைய முதல்வரோ, அமைச்சர்களோ, எல்.எல்.ஏக்களோ அதுகுறித்துப் பேசவில்லை.

ஆனால், தற்போதைய முதல்வரோ 24 மணி நேரமும் மக்களுக்கு பணியாற்றுகிறார். அவருக்கு என்ன பேச வேண்டும்; எப்போது பேச வேண்டும் என்பது நன்றாகத் தெரியும்.

எனவே;தொடர்ந்து எங்கள் உணர்வுகளைத் தூண்டும் வகையிலான வார்த்தைகளைப் பேசுவதை தி.மு.கவினர் தவிர்க்க வேண்டும்.

முதல்வர் ஜோசப் விஜய் கொளத்தூரில் என்ன பேசினார் என்பது உங்களுக்கு தெரியும். அதன் பின்னர் தேர்தல் முடிவுகள் என்னவானது என்பதும்உங்களுக்குத் தெரியும் என்றார். அப்போது குறுக்கிட்ட தி.மு.க. உறுப்பினர்கள், இந்தத் தருணத்தில் கொளத்தூர் தொடர்பாக எதற்குப் பேச வேண்டும் எனக் கூறி கூச்சலிட்டனர். அதற்கு எதிராக ஆளுங்கட்சியினரும் கூச்சல் எழுப்பினர்.

இதனால் அவையில் சிறிது நேரம் சலசலப்பு ஏற்பட்டது. இரு தரப்பையும் பேரவைத் தலைவர்சமாதானப்படுத்தி அமர வைத்தார்.

(தினமணி 20.06.2026)

ஆஸ்டின் எழுப்பிய வினாவுக்கு உரிய பதிலை ஆதவ் அர்ஜூனா தெரிவிக்கவில்லை. கொளத்தூர் சம்பந்தமாகவா ஆஸ்டின் வினா தொடுத்தார். இந்த வினாவுக்கு முதல்வர் பதில் அளிக்கவில்லை. முதல்வர் மௌனமாக இருந்தார். ஆதவ் கொளத்தூர் முடிவைப் பற்றி பொருத்தமில்லாமல் பதில் கூறுகிறார். இந்த ஆட்சியா ‘புரட்சியாக’ வந்து இருக்கிறது. முதல்வர் விஜய்யின் மௌனத்தைப் பார்த்து நாம் மட்டுமா ஆச்சரியம் அடைந்தோம். தினத்தந்தியும் ஆச்சரியம் அடைந்து இருக்கிறது. அதைச் செய்தியாக வெளியிட்டு இருக்கிறது.

அதனைத் தருகிறோம். படித்துப்பாருங்கள்.

அனைத்து விவாதத்தையும் கவனித்தபடி

அமைதி காத்த முதல்–அமைச்சர் விஜய்

சட்டசபையில் 5 மணி நேரம் அமர்ந்திருந்தார்

சென்னை, 20–

தமிழக சட்டசபையில் ஆளும் கட்சி தரப்புக்கும், எதிர்க்கட்சி தரப்புக்கும் காரசார மோதல்கள் வெடிக்கும் போது, முத்தாய்ப்பாக முதல்–அமைச்சர் பேசி சில விவரங்களை பதிவு செய்வது வழக்கம். அதன் பிறகு அந்த பிரச்சினை பெரிதாக பேசப்படாது. முதல்–அமைச்சரே பதிலளித்துவிட்டார். இனி அடுத்த பிரச்சினைக்கு செல்லுங்கள் என்று விவாதிக்கும் எம்.எல்.ஏ.க்கு சபாநாயகர் அறிவுரை வழங்குவது வழக்கம்.

ஆனால், தமிழகத்தில் புதிதாக அரசு அமைத்துள்ள த.வெ.க.வுக்கு சட்டமன்றம் புதிது. எனவே நேற்று நடந்த விவாதத்தில் அமைச்சர்கள் பலர் பங்கேற்கவில்லை. அவை முன்னவர் என்ற முறையில் அமைச்சர் செங்கோட்டையன்,அமைச்சர்கள் ஆதவ் அர்ஜூனா, அருண்ராஜ் உள்ளிட்ட ஒரு சிலர் மட்டும் எம்.எல்.ஏ.க்களின் விவாதத்தின் போது குறுக்கிட்டு பதிலளித்தனர்.

தி.மு.க. தரப்பில் ஆஸ்டின் சில குற்றச் சம்பவங்களை குறிப்பிட்டு பேசியபோதும் அதற்கு காவல் துறையின் சில புள்ளிவிவரங்களை அமைச்சர் ராஜ்மோகன்தான் முன்வைத்தாரே தவிர, எம்.எல்.ஏ.க்கள் எதிர்பார்த்தபடி முதல்–அமைச்சர் விஜய் பதிலளிக்கவில்லை. இது சற்று ஆச்சரியத்தை ஏற்படுத்தியது.

என்றாலும், முதல்–அமைச்சர் விஜய் ஒவ்வொருவரின் விவாதத்தையும், அதற்கு அளிக்கப்படும் பதில்களையும் மிக உன்னிப்பாக கவனித்தபடி இருந்தார். விவாதங்களில், அனுபவம் வாய்ந்த தி.மு.க., அ.தி.மு.க. கட்சிகளின்கை ஓங்கி இருந்தால் கூட, அமைச்சர்களின் பதில்களும் குறைவுபட்டதாக இருக்கவில்லை சட்டசபைக்கு முதல்–அமைச்சர் விஜய் நேற்று காலை 9.25 மணியளவில் வருகை தந்தார். மேகதாது தொடர்பான அரசினர் தீர்மானத்தை முன்மொழிந்து, நிறைவேற்றியதும், அடுத்ததாக எடுக்கப்பட்ட கவர்னர் உரைக்கு நன்றி தெரிவிக்கும் தீர்மானத்தின் மீதான எம்.எல்.ஏ.க்களின் முழுவிவாதத்திலும் பங்கேற்றார். இடையில் ஒரு சில நிமிடங்கள் மட்டுமே வெளியே சென்றுவிட்டு மீண்டும் அவைக்கு வந்துவிட்டார். அவை நிகழ்ச்சிகள் 2.20 மணியளவில் நிறை வடைந்தன. அந்த வகையில் 5 மணி நேரம் முதல்–அமைச்சர் அமர்ந்திருந்தார் என்பது குறிப்பிடத்தக்கது.

(தினத்தந்தி 20.06.2026)

இறைவனைத்தான் தாயுமானார் ‘பேசாத பெரிய மோனம்’ என்றார். விஜய் மனிதராயிற்றே ஒரு சொல் எடுத்து இயம்பிக் காட்டக் கூடாதா?