சென்னை, ஜூன் 23 –
திருவள்ளூர் அருகே
அமோனியா வாயு கசிவு விபத்தில் உயிரிழந்தோரின் குடும்பத்திற்கு தலா பத்து லட்சம் ரூபாய் நிதி வழங்க வேண்டுமென்று சட்டப்பேரவையில் கழகக் கொறடா எ.வ.வேலு வலியுறுத்தினார்.
திருவள்ளூர் மாவட்டம்
பெரியபாளையம் அடுத்த கன்னிகைப்பேர் கிராமத்தில் இயங்கி வந்த தனியார் கடல் உணவு பதப்படுத்தும் தொழிற்சாலையில் எதிர்பாராத விதமாக அம்மோனியா நச்சு வாயு கசிந்தது. இந்த விபத்தில் 70-க்கும் அதிகமானோர் கடுமையாக பாதிக்கப்பட்டனர். இதில் இரண்டு பேர் சிகிச்சை பலனின்றி நேற்று முன்தினம் உயிரிழந்த நிலையில், மேல் சிகிச்சைக்காக சென்னை ராஜீவ் காந்தி அரசு மருத்துவமனையில் அனுமதிக்கப்பட்டிருந்த 11 பேரில் இளம் பெண் ஒருவர் நேற்று காலை சிகிச்சை பலனின்றி உயிரிழந்தார்.
இதேபோல் சென்னை ஸ்டான்லி அரசு மருத்துவமனையில் மேல் சிகிச்சைக்காக அனுமதிக்கப்பட்ட 11 பேரில் இளம் பெண் ஒருவரும் நேற்று காலையில் சிகிச்சை பலனின்றி உயிரிழந்தார். மேலும், பெரிய பாளையம் அருகே உள்ள
தனியார் மருத்துவமனையில் அனுமதிக்கப்பட்டிருந்த 2 பேர் இன்று காலை உயிரிழந்தனர். இதனையடுத்து அம்மோனியா வாயு கசிவு விபத்தில் உயிரிழந்தவர்களின் எண்ணிக்கை
6- ஆக உயர்ந்துள்ளது.
உயிரிழந்தவர்கள் அனை வரும் ஒடிசா, அசாம், ஜார்க்கண்ட் மாநிலங்களைச் சேர்ந்தவர்கள். இதனிடையே, அம்மோனியா வாயு கசிவு ஏற்பட்ட ஆலையின் மேலாளர் மற்றும் மேற்பார்வையாளர் உள்ளிட்ட 3 பேர் கைது செய்யப்பட்டுள்ளனர். ஆலையின் பாதுகாப்பு விதிமுறைகள் சரியாகப் பின்பற்றப்பட்டதா மற்றும் அம்மோனியா வாயு குழாய்களில்
ஏற்பட்ட பழுது குறித்தும்
அதிகாரிகள் தொடர்ந்து விசாரணை நடத்தி வருகின்றனர்.
சட்டப்பேரவையில்
நேரலை நிறுத்தம்!
கூச்சல் குழப்பம்!
திருவள்ளூர் அருகே நிகழ்ந்த அமோனியா கசிவு விவகாரத்தை சட்டப்பேரவையில் பேச எதிர்க்கட்சிகளுக்கு அனுமதி அளிக்கப்படவில்லை. எதிர்க்கட்சி உறுப்பினர்கள் பேசும்போது நேரலை நிறுத்தப்பட்டதால், கூச்சல், குழப்பம்
நிலவியது.
தமிழ்நாடு சட்டப்பேரவை கூடியதும் அமோனியா கசிவு விவகாரத்தை தி.மு.க., உள்ளிட்ட எதிர்க்கட்சிகள் எழுப்பின. ஆனால் இந்த விவகாரம் குறித்து பேச சபாநாயகர் அனுமதி மறுத்து விட்டார். அமோனியா கசிவு விவகாரம் குறித்து 110 வது விதியின் கீழ் தொழிலாளர் நலத்துறை அமைச்சர் பர்வேஸ் அறிக்கை வாசித்தார்.
அமோனியா கசிவால் பாதிக்கப்பட்ட 74 பேர் மருத்துவ மனையில் சிகிச்சை அளிக்கப்பட்டு வருவதாகவும் அவர் கூறினார். 110 வது விதியின் கீழ் அமைச்சர் படித்த அறிக்கையில் முக்கிய அறிவிப்புகள் எதுவும் இடம்பெறவில்லை. இந்த விவகாரம் குறித்து பேச எதிர்க்கட்சிகளுக்கு சபாநாயகர் வாய்ப்பு தரவில்லை. எதிர்க்கட்சி உறுப்பினர்கள் பேசும்போது சட்டப்பேரவையில் நேரலை நிறுத்தப் பட்டதால், கூச்சல், குழப்பம்
நிலவியது.
இந்நிலையில் திருவள்ளூர் அருகே நிகழ்ந்த அமோனியா கசிவு விவகாரத்தை சட்டப்பேரவையில் பேசிய திமுக கொறடா எ.வ.வேலு, அமோனியா
கசிவால் உயிரிழந்தவர்களின் குடும்பத்தினருக்கு தலா 10
லட்சம் ரூபாய் இழப்பீடு வழங்க வேண்டும் என வலியுறுத்தினார்.