#Title

பெருகும் வருமானத்தால் திருக்கோயில் பணிகளுக்கு உதவும் என்பதால் – நகராட்சி பரிந்துரையின் அடிப்படையில் குன்னூரில் ‘மல்டி லெவல் கார் பார்க்கிங்’ கொண்டு வரப்பட்டது! சட்டப்பேரவையில் பி.கே.சேகர்பாபு தகவல்!

சென்னை, ஜூன் 24–

சட்டப் பேரவையில் இந்து சமய அறநிலையத்துறை அமைச்சர் பேசும்போது குறுக்கிட்டு கழக உறுப்பினர் பி.கே.சேகர்பாபு பேசியதாவது:–

இந்து சமய அறநிலையத்துறை கொடைகள் என்ற ஒரு சட்டம் இருக்கின்றது. அந்தச் சட்டத்தில் விதி 69 என்று குறிப்பிடப்பட்டிருக்கின்ற அந்தப் பணிகள், சட்ட விதிகளுக்கு உட்பட்டு, சட்டத்தின் 36-வது பிரிவிலிருந்துதான் மேற்கொள்ளப்பட்டன. குறிப்பாக, ஏதோ அமைச்சரே முடிவு செய்து திருமண மண்டபங்களையும், வணிக வளாகங்களையும் ஏற்படுத்துவதற்கு உத்தரவிட்டதாக, அமைச்சர் அவர்கள் அவைக்கு உண்மைக்குப் புறம்பான தகவலைத் தந்துகொண்டிருக்கின்றார்.

ஒவ்வொரு திட்டமும் அன்றைய காலகட்டத்தில் இருந்த சட்டப்பேரவை உறுப்பினர்களுடைய பரிந்துரையின் அடிப்படை யிலும், சட்டப்பேரவை உறுப்பினர்கள்கேட்டுக்கொண்டதன் அடிப்படையிலும்தான் அந்தந்தக் காலகட்டங்களில் கொண்டுவரப்பட்டது.

அதோடு மட்டுமல்லாமல், உறுப்பினர் அவர்கள்குறிப்பிட் டுக் கூறினார்; குன்னூரிலே ‘மல்டி லெவல் கார் பார்க்கிங்’ கொண்டுவரப்பட்டது என்று. நான் குன்னூரிலும், ஊட்டியிலும் ஐந்து நாட்கள் முகாமிட்டு, அங்கே இருக்கின்ற 56 கோயில்களுக்கும் நேரடியாகச் சென்று ஆய்வு செய்தோம். அந்த ஆய்வின் அடிப்படையில், அந்தத் திருக்கோயில்களுக்கு வருகின்ற பக்தர்களுடைய அடிப்படைத் தேவைகளை நிறைவேற்றத் தேவையான வருமானத்தை உயர்த்துவதற்காகவும், குன்னூருக்குச் சுற்றுலாவிற்கு வருகின்ற மக்களுடைய வாகனங்களை நிறுத்துவதற்குப் போதிய இடமில்லாமல் தவிக்கின்ற சூழ்நிலை யைக் கருத்தில் கொண்டும், நகராட்சியின் பரிந்துரையின் அடிப்படையில் ‘மல்டி லெவல் கார்பார்க்கிங்’ கொண்டுவந்தால், வருமானம் பெருகும்; அந்த வருமானம் திருக்கோயிலுடைய மேம்பாட்டுப் பணிகளுக்கு உதவும் என்பதற்காகத்தான் அந்தப் பணிகளை மேற்கொண்டோம் என்பதை அமைச்சர் அவர்களுக்குத் தெரிவித்துக் கொள்கிறேன்.